ކޮސްޓަރީކާގެ ވެރިރަށް ސަން ހޮސޭއަށް ދަތުރު ކުރަމުން ދިޔަ މަތިންދާބޯޓެއް ވެއްޓި، ފަސް މީހުން މަރުވެއްޖެއެވެ. ސަން ހޮސޭގެ ރަށްބޭރުގައިވާ ފަރުބަދަމަތީ ސަރަޙައްދަކަށް މަތިންދާބޯޓު ވެއްޓިފައި ވަނީ ހަ މީހުންނާ އެކު ދަތުރު ކުރަމުން ދިޔަ މަތިންދާބޯޓެކެވެ. ވެއްޓުނު މަތިންދާބޯޓުގެ ބައިތައް ފެނިފައިވާ ކަމުގައި އެ ޤައުމުގެ ރެޑް ކްރޮސާއި، އަލިފާން ނިއްވާ އިދާރާއިން ހާމަކުރިއެވެ.
މަތިންދާބޯޓު ވެއްޓިފައި ވަނީ ސަން ހޮސޭގެ ހުޅަނގުދެކުނުން އޮތް ޕީކޯ ބްލަންކޯގެ ފަރުބަދަމަތީ ހިސާބަކަށެވެ. މަތިންދާބޯޓު ވެއްޓެން މެދުވެރިވި ސަބަބު އަދި ސާފެއް ނޫނެވެ. ރެޑް ކްރޮސުން ބުނީ، މަތިންދާބޯޓުގައި ދަތުރު ކުރަމުން ދިޔަ ހަ މީހުންގެ ތެރެއިން ފަސް މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައެވެ. އަދި، ސަލާމަތްވެފައި ވަނީ 31 އަހަރުގެ އަންހެނެއް ކަމަށާއި، އެ މީހާގެ ހާލު ސީރިޔަސް ކަމުގައެވެ. އޭނާގެ ފުރާނަ ސަލާމަތް ކުރުމަށް މަސައްކަތް ކުރަމުންދާ ކަމުގައި ރެޑް ކްރޮސްގެ ތަރުޖަމާނު ޕަތުރީސިޔާ ސޮލޮރްސަނޯ ކޮރްދޭރޯ ވިދާޅުވިއެވެ.
މަތިންދާބޯޓު ވެއްޓުނު ސަރަޙައްދުން އިތުރު މީހެއްގެ ހަށިގަނޑު ފެނޭތޯ ބެލުމަށް ކަމާ ގުޅޭ އިދާރާތަކުން އަދިވެސް ދަނީ މަސައްކަތް ކުރަމުންނެވެ. ވެއްޓުނު މަތިންދާބޯޓުގައި ތިބީ، ޕައިލެޓާއި، ކޯ-ޕައިލެޓުގެ އިތުރުން އެއް ޢާއިލާއަކަށް ނިސްބަތްވާ ފަސިންޖަރުންތަކެއް ކަމުގައި ކޮސްޓަ ރީކާގެ ކަމާ ގުޅޭ އިދާރާތަކުން ހާމަކުރިއެވެ. އެ ހަ މީހުންނަކީ ވެސް ކޮސްޓަ ރީކާގެ ރައްޔިތުންނެވެ.