އިންޑޮނީޝިޔާގެ އުތުރު ސުމާތުރާ ޕުރޮވިންސަށް ކުރަމުންދާ ވިއްސާރައާ ގުޅިގެން ކުރިމަތިވި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކެއްގައި 15 މީހުން މަރުވެ، ގިނަ އަދަދެއްގެ ބަޔަކު ގެއްލިއްޖެއެވެ. މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން ސުމާތުރާގެ ގިނަ ރަށްތަކެއްގައި ވަނީ ފެންބޮޑުވެފައެވެ.
ބިންގަނޑު ކެނޑި، ކިސަޑު ފޭބުމުގެ ހާދިސާތައް ހިނގާފައިވާ ސަރަޙައްދުތަކުގެ ތެރޭގައި ސުމާތުރާގެ ކާރޯއާއި، ޕަޑަންގ ލަވާސް އަދި ތަޕަނުލީ ސްލާތާން ހިމެނެއެވެ. އެ ހާދިސާތަކުގައި 11 މީހުން މަރުވިއެވެ. އަދި، ދޭލީ ސަރްދާންގގައި ފެންބޮޑުވުމާ ގުޅިގެން ހިނގި ނުރައްކާތެރި ހާދިސާތަކުގައި ހަތަރު މީހުން މަރުވިއެވެ.
އިންޑޮނީޝިޔާގެ ކާރިސާތަކާ ބެހޭ އިދާރާގެ ތަރުޖަމާނު ޢަބްދުލް މުހާރީ ވިދާޅުވީ، ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި ހަތް މީހުން ގެއްލިފައިވާ ކަމުގައެވެ. އަދި، އެ މީހުން ހޯދައި ސަލާމަތް ކުރުމަށް ކަމާގުޅޭ އިދާރާތަކުން މަސައްކަތް ކުރަމުންދާ ކަމުގައެވެ. ނަމަވެސް، މެދުކެނޑުމެއް ނެތި ބޯކޮށް ވާރޭވެހެމުން ދިޔުމާ ގުޅިގެން އެ މަސައްކަތަށް ދަނީ ހުރަސް އެޅެމުންނެވެ.
"މެންދުރުން ފެށިގެން ހަވީރު ވީއިރުވެސް އަދިވެސް މެދުކެނޑުމެއް ނެތި ދަނީ ވާރޭވެހެމުން. ގެއްލިފައިވާ މީހުން ހޯދުމަށް ކުރަމުންދާ މަސައްކަތަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ އެއީ،" ޢަބްދުލް ވިދާޅުވިއެވެ. ކުރިއަށް އޮތް ދުވަސްތަކުގައި ވެސް އުތުރު ސުމާތުރާގެ ސަރަޙައްދުތަކަށް ބޯކޮށް ވާރޭވެހޭނެ ކަމަށް ލަފާ ކުރެވޭ ކަމުގައި ޢަބްދުލް ވިދާޅުވިއެވެ. މި ކަމާ ގުޅިގެން، ފެންބޮޑުވުމާއި ބިންގަނޑު ކެނޑުމުގެ ހާދިސާތައް ކުރިމަތިވުމުގެ ނުރައްކާ އޮތް ސަރަހައްދުތަކުގައި ދިރިއުޅޭ ރައްޔިތުން ދަނީ ރައްކާތެރި ކަމުގެ ފިޔަވަޅުތައް އަޅަމުންނެވެ. އަދި، ގިނަ އަދަދެއްގެ ބަޔަކު ވަނީ ރައްކާތެރި ހިސާބުތަކަށް ބަދަލުވެފައެވެ.
ބިންގަނޑު ކެނޑުމާއި ކިސަޑު ފޭބުން އަދި ފެންބޮޑުވުމާ ގުޅިގެން އުތުރު ސުމާތުރާގެ ރަށްތަކަށް އުމްރާނީ ގޮތުން ވަނީ ބޮޑެތި ގެއްލުންތަކެއް ލިބިފައެވެ. މި ގޮތުން، ގިނަ އަދަދެއްގެ ރައްޔިތުންގެ ގެދޮރާއި މިސްކިތްތަަކަށް ގެއްލުން ލިބިފައިވާއިރު، ގިނަ އަދަދެއްގެ ހަނޑޫ ދަނޑުތަކުގައި ފެންބޮޑުވެ، ދަނޑުވެރިކަމަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
އިންޑޮނީޝިޔާއަކީ ވިއްސާރަ މޫސުމުގައި ބިންގަނޑު ކެނޑުމާއި ކިސަޑު ފޭބުމުގެ ނުރައްކާ ބޮޑު ޤައުމެކެވެ. މި ފަދަ ނުރައްކާތެރި ހާދިސާތައް އިތުރުވެފައި ވަނީ ޖަންގަލިތަކުން ގަސްކެނޑުން އިތުރުވުމާއި، ނުޤަވާޢިދުން މައިން ކުރުމުގެ މަސައްކަތް ކުރާ ސަރަޙައްދުތަކުގައި ކަމުގައި އެ ޤައުމުގެ ކަމާ ގުޅޭ އިދާރާތަކުން ހާމަކުރިއެވެ.