ކަނޑުގެ މަގުން ރާއްޖެ އެތެރެކުރަން އުޅުނު 1.5 ކިލޯގެ މަސްތުވާތަކެތި އަތުލައިގެންފި

ކަނޑުގެ މަގުން ރާއްޖެ އެތެރެކުރަން އުޅުނު ޖުމްލަ 1.5 ކިލޯގްރާމްގެ މަސްތުވާތަކެތި ކަސްޓަމްސްއިން އަތުލައިގެންފިއެވެ.

މިތަކެތި އަތުލައިގެންފައިވަނީ މާލެ ކޮމާޝަލް ހާބަރަށް ގެނެސްފައިވާ ސީފްރައިޓް ޝިޕްމަންޓެއް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައެވެ.

ކަސްޓަމްސްއިން ބުނީ މިއަދު ބަލާފާސްކުރި ސީފްރައިޓް ޝިޕްމަންޓެއްގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން، އިތުރަށް ބެލިބެލުމުން، އެ ޝިޕްމަންޓުގައި ހިމެނޭ މުދަލުގެ ތެރޭގައި ފޮރުވާފައި ހުރި، މަސްތުވާތަކެތިކަމަށް ޝައްކުކުރެވޭތަކެތި އަޅާފައި ހުރި ޕެކެޓުތަކެއް ފެނިފައިވާކަމަށެވެ. އަދި އެ ޕެކެޓުތަކުގައި ފޮރުވާފައި ހުރި ތަކެތި ފުރަތަމަ މަރުޙަލާގައި ކަސްޓަމްސްއިން ތަޙުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ މެތަމްފެޓަމިންއަށް ވަނީ ޕޮޒިޓިވްވެފައެވެ. އަދި އެތަކެތީގެ ބަރުދަނުގައި ޖުމްލަ 1.518 ކިލޯގްރާމް ހުރި އިރު މިތަކެތީގެ މަގުމަތީގެ އަގު ތިން މިލިޔަން ރުފިޔާ އަށްވުރެ މަތިވާނެކަމަށް ކަސްޓަމްސްއިން ބުނެއެވެ.

މި މައްސަލަ އިތުރަށް ތަޙްޤީޤްކުރުމަށްޓަކައި، މައްސަލައިގައި އަތުލައިގަނެވުނު މަސްތުވާތަކެތި މިހާރު ވަނީ ދިވެހި ފުލުހުންގެ ޚިދުމަތާއި ޙަވާލުކޮށްފައެވެ. 1.518 ކިލޯގެ މަސްތުވާ ތަކެތި ކަސްޓަމްސް އިން އަތުލައިގަނެފައިވާއިރު ރާއްޖެ ސަރަހައްދުގައި ޤަވާއިދާއި ޙިލާފަށް ހަރަކާތްތެރިވަމުންދިޔަ ސްރީލަންކާގެ ބޯޓަކުން ބައި ޓަނެއްހާ މަސްތުވާތަކެތި ފުލުހުން ވަނީ އަތުލައިގަނެފައެވެ.