ޕާކިސްތާނުގެ ހުޅަނގުއުތުރު ޚައިބަރް ޕަޚްތުންޚާގެ ރަށެއްގައި ދަތުރު ކުރަމުން ދިޔަ ބަހަކަށް ޙަމަލާދީ، އޭގައި ތިބި ފަސިންޖަރުންގެ ތެރެއިން 40 މީހުން މަރައިލައިފިއެވެ. ބަޑީގެ ޙަމަލާތައް ދީފައިވާ ބަހަކީ ޚައިބަރް ޕަޚްތުންޚާގެ ފަރުބަދަމަތީ ރަށެއް ކަމުގައިވާ ޕަރާޗަނާރުގައި، ސަލާމަތީ ބާރުގެ ރައްކާތެރިކަމުގެ ދަށުން ދަތުރު ކުރަމުން ދިޔަ އުޅަނދެކެވެ. އެ ބަހުގައި ތިބީ ޝިޔަޢީ މަޒުހަބުގެ މުސްލިމުންނެވެ.
ޚައިބަރް ޕަޚްތުންޚާއަކީ ގިނަ އަދަދެއްގެ ހަތިޔާރު އެޅި ޖަމާޢަތްތަކުން ހަރަކާތްތެރިވަމުންދާ، ހަމަނުޖެހުން ބޮޑު ސަރަޙައްދެކެވެ. އަދި، މި ފަދަ ނިރުބަވެރި ޙަމަލާތައް ޢާންމު ސަރަޙައްދެކެވެ. ޕަރާޗަނާރުގައި ދަތުރު ކުރަމުން ދިޔަ ބަހަށް ޙަމަލާދީ، ޝިޔަޢީ މަޒުހަބުގެ 40 މުސްލިމުން މަރައިލި ޙަމަލާއާ ގުޅިގެން، އެ ކަން ކުށްވެރި ކުރުމުގެ ގޮތުން ގިނަ އަދަދެއްގެ ބަޔަކު ވަނީ މަގުތަކަށް އެއްވެ، އަޑުއުފުލަން ފަށާފައެވެ.
ބަހަށް ދީފައިވާ ޙަމަލާގެ ފަހަތުގައި އޮތީ އެ ސަރަޙައްދުގައި ހަރަކާތްތެރިވާ ނިރުބަވެރި ޖަމާޢަތް، ތަހްރީކް ޠާލިބާން ޕާކިސްތާން (ޓީޓީޕީ) ކަމަށް ބެލެވުނު ނަމަވެސް، އެ ޖަމާޢަތުން ޙަމަލާތަކުގެ ޒިންމާ އުފުލާފައެއް ނެތެވެ. ޕަރާޗަނާރުގެ އޮފިޝަލެއް ކަމުގައިވާ ޖާވިދުالله މަޙްސޫދު ވިދާޅުވީ، ބަހަށް އަމާޒުކޮށް ދީފައިވާ ބަޑީގެ ޙަމަލާތަކުގައި މަރުވި މީހުންގެ ތެރޭގައި އަށް އަންހެނުން ހިމެނޭ ކަމުގައެވެ. އަދި، ޒަޚަމުވެފައިވާ އިތުރު 29 މީހަކަށް ހަސްފަތާލުގައި އެޑްމިޓު ކޮށްގެން ފަރުވާދެމުންދާ ކަމުގައެވެ. އޭގެ ތެރެއިން ނުވަ މީހެއްގެ ހާލު ސީރިޔަސް ކަމުގައި ވެސް އޭނާ ވިދާޅުވިއެވެ.
ބަހަށް އަމާޒުކޮށް ދީފައިވާ ޙަމަލާތަކާ ގުޅިގެން ޕަރާޗަނާރުގައި ހަމަނުޖެހުންތަކެއް ހިންގާފައިވެއެވެ. އެ ހަމަނުޖެހުންތަކުގައި ޢާންމުންގެ ދެ މީހަކު މަރުވެފައިވާ ކަމުގައި މަޙްސޫދު ވިދާޅުވިއެވެ. ހަމަނުޖެހުންތަކާ ގުޅިގެން ޕަރާޗަނާރުގެ މަދަރުސާތަކާއި ތަޢުލީމީ މަރުކަޒުތަކުގެ އިތުރުން މާރުކޭޓުތައް ވަނީ ބަންދުކޮށްފައެވެ. އަދި، ޢާންމު ދަތުރުފަތުރަށް ވަނީ ހުރަސް އެޅިފައެވެ. ވިޔަފާރިތައް ވެސް ވަނީ ބަންދުކޮށްފައެވެ.