ރެއާލް މެޑްރިޑަށް ކުޅެމުން އަންނަ ބްރެޒިލް ފޯވާޑް އެންޑްރިކް، ލޯނު އެއްބަސްވުމެއްގައި ގެންދިއުމަށް ސައުތެމްޓަނުން ޝައުގުވެރިވާކަމަށް މީޑިއާ ރިޕޯޓުތައް ބުނެފިއެވެ.
އެގޮތުން، ރެއާލް އާއެކު އެކަމުގެ މަޝްވަރާތައް ފެށުމަށް ސައުތަމްޕްޓަނުން މަސައްކަތްކުރަމުންދާ ކަމަށް ވެސް އެ ހަބަރުތައް ބުނެއެވެ.
ނަމަވެސް، ސައުތެމްޓަނަށް އެންޑްރިކް ހޯދުމަށް ފަސޭހަނުވާނެ ކަމަށާއި، އެކަމުގައި އިޓަލީގެ އޭއެސް ރޯމާ އަދި ސްޕެއިނުގެ ރެއާލް ވަޔަޑޮލިޑް ފަދަ ކްލަބުތަކާ ވާދަކުރަންޖެހޭނެ އެވެ.
ޕްރިމިއަރ ލީގުގެ އެންމެ ފުލުގައި އޮތް ސައުތެމްޓަނަށް ކުރިއަށް އޮތް ޖަނަވަރީ ޓްރާންސްފަރ ބާޒާރުގައި ބޮޑު ބަދަލެއް އަތުވެދާނެ ކަމަށާއި، އޭގެ މައިގަނޑު ސަބަބަކީ ރެއާލްގެ ޒުވާން ފޯވާޑް، އެންޑްރިކް ހޯދުމަށް އެ ކްލަބުން ކުރާ މަސައްކަތުގެ ސަބަބުން ކަމަށް ވެސް އިނގިރޭސި ނޫސްތަކުން ބުނެއެވެ.
މިދިޔަ އަހަރުގެ ކުރީކޮޅުގައި ގާތްގަނޑަކަށް 60 މިލިއަން ޕައުންޑްގެ ޓްރާންސްފާ ފީ އަކަށް ބްރެޒިލްގެ ޕަލްމެއިރާސް އިން ރެއާލަށް ބަދަލުވި 18 އަހަރުގެ މި ކުޅުންތެރިޔާ ހޯދުމަކީ ސައުތެމްޓަނަށް ފަސޭހަ ކަމަކަށް ނުވާނެ އެވެ.
އެކަމަކު، މިވަގުތު ރެއާލްގައި އެންޑްރިކް އަށް އެކަށީގެންވާ ވަރަށް ކުޅުމުގެ ފުރުޞަތު ލިބެމުންނުދާތީވެ، އެ ކްލަބު ދޫކޮށްލަން ޝައުގުވެރިވާއިރު ސައުތެމްޓަނަކީ އޭނާ ގެންދިއުމަށް މަސައްކަތްކުރަމުންދާ ކްލަބުތަކުގެ ތެރެއިން އެއްކްލަބެވެ. މިހާތަނަށްއައިއިރު ރެއާލްގެ ފުރަތަމަ އެގާރައިގައި ހިމެނިގެން އެންމެ މެޗެއްވެސް އޭނާ ކުޅެފައެއްނުވެއެވެ.
ލީގުގައި މިހާތަނަށް ކުޅުނު 11 މެޗަށްފަހު ސައުތެމްޓަން އޮތީ އެންމެ ފުލުގައެވެ.