ކުދި ވިޔަފާރިއާއި މެދުފަންތީގެ ވިޔަފާރިތަކަށްދޭ "މޯލްޑިވްސް އެމްއެސްއެމްއީ އެވޯޑްސް 2025" ތަޢާރަފުކޮށްފި

އެންމެ ކުދި، އަދި މެދުފަންތީގެ ވިޔަފާރިތަކަށް ޚާއްސަކޮށްގެންދޭ "މޯލްޑިވްސް އެމްއެސްއެމްއީ އެވޯޑްސް 2025" ތަޢާރަފުކޮށްފިއެވެ.

މި އެވޯޑް އިފްތިތާޙުކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަތީފްއެވެ.

އެމްއެސްއެމްއީ އެވޯޑަކީ ދިވެހިރާއްޖޭގެ އިޤުތިޞާދު ސިންދަފާތުކުރުމުގައި ދެމެހެއްޓެނިވި ތަރައްޤީއެއް ހާސިލުކުރުމުގައި ދިވެހި ވިޔަފާރިވެރިން އަދާކުރަމުންދާ ދައުރު ފާހަގަކޮށް، ގައުމީ އަދި ބައިނަލްއަޤުވާމީ ފެންވަރުގައި ވިޔަފާރިތަކުން ހޯދާ ކަމިޔާބީތައް ފާހަގަކުރުމަށް ދޭން ނިންމި ޚާއްސަ އެވޯޑެކެވެ. އަދި ގައުމުގެ އުފެއްދުންތެރިކަމާއި، ހުނަރުވެރިކަން ކުރިއެރުވުމަށް ހިތްވަރުދީ، ރާއްޖޭގެ ވިޔަފާރިތަކާއި މަސައްކަތްތެރިކަމާއި ހުނަރުވެރިކަން ކުރިއަރުވުމުގެ ބޭނުމުގައެވެ.

އެވޯޑް އިފްތިތާޙުކުރުމަށް ބޭއްވި ރަސްމިއްޔާތުގައި އިޤްތިޞާދާ ވިޔަފާރިއާއި ބެހޭ ވަޒީރު މުޙައްމަދު ސަޢީދުއާއި ބިޒްނަސް ސެންޓަރ ކޯޕަރޭޝަން ބީސީސީގެ މެނޭޖިން ޑިރެކްޓަރ އިބްރާޙިމް ޒިޔާއު އަދި ވިޔަފާރީގެ ދާއިރާގައި މަސައްކަތްކުރާ ގިނަ ފަރާތްތަކަކުން ބައިވެރިވިއެވެ.

މި ރަސްމިއްޔާތުގައި ބީސީސީގެ ޑެޕިއުޓީ މެނޭޖިން ޑިރެކްޓަރ ސާމިހު އާދަމް ވިދާޅުވީ، ރާއްޖޭގެ އިޤްތިޞާދީ ސިނާޢަތް ކުރިއެރުވުމުގައި ބީސީސީން މިހާތަނަށް ގިނަމަސައްކަތްތަކެއް ކޮށްފައިވާކަމަށެވެ. އެގޮތުން 500އަށްވުރެ ގިނަ ކުދި ވިޔަފާރިތަކަށް މާކެޓް ހޯދައިދީފައިވާކަމަށެވެ. ސާމިހު ވިދާޅުވީ ކުދި ވިޔަފާރިތަކުގެ އަގު ވަޒަންކުރުމަކީ ޤާއުމުގެ އިޤްތިޞާދީ ދުވެލި ބާރުކުރުމަށް އެޅޭ އިތުރު ފިޔަވަޅެއްކަމަށެވެ.

"2040 ވަނަ އަހަރަށް ދާއިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ކުރާ މަސައްކަތަށް، ފަހިވާނެ އިތުރު ބާރަކަށް މިކަން ވާނެ. އަދި އުފެއްދުންތެރިކަން އިތުރުވެ، ވިޔަފާރިތަކުގެ ފެންވަރު ރަނގަޅުކުރުމަށްވެސް ބާތަކަށް ވާނެ." ބިސީސީގެ ޑެޕިއުޓީ މެނޭޖިން ޑިރެކްޓަރ ސާމިހު އާދަމް ވިދާޅުވިއެވެ.

މޯލްޑިވްސް އެމްއެސްއެމްއީ އެވޯޑްސް 2025 ގައި ހިމެނޭނީ:

• - 16 ކެޓަގަރީއަކުން ފަނޑިޔާރުންގެ ޕެނަލަކުން ދޭ އެވޯޑްތައް
• - 10 ކެޓަގަރީއަކުން އާންމުން ފޮނުވާ އެސްއެމްއެސް ވޯޓިންގ އިން ހޮވޭ ޕޮޕިއުލަރ އެވޯޑްތައް
• - ރާއްޖޭގެ ވަކިވަކި ސަރަޙައްދުތަކުން އެންމެ ފާހަގަކޮށްލެވޭ ވިޔަފާރިތަކުގެ އެވޯޑްތައް
• - ތަފާތު ސިނާޢަތްތަކުން އެންމެ ފާހަގަކޮށްލެވޭ ވިޔަފާރިތަކުގެ އެވޯޑްތައް
• - އެކި ފަންނުތަކުން އެންމެ ފާހަގަކޮށްލެވޭ ވިޔަފާރިތަކުގެ އެވޯޑްތައް

މި އެވޯޑު ކޮންމެ އަހަރަކު ދިނުމަށް ވަނީ ހަމަޖެހިފައެވެ. އެވޯޑްގެ ފުރަތަމަ އެޑިޝަންއަށް ހުޅުވާލާނީ ޑިސެމްބަރު މަހުގެ 1 ވަނަ ދުވަހުއެވެ.