ކުށުގެ ވެށީގައި އުޅޭ އުމުރުން އަށާރަ އަހަރުން ދަށުގެ ކުދިން އިސްލާޙުކުރުމުގެ ޕްރޮގްރާމް" އުއްމީދު" ރަސްމީގޮތުން ފަށައިފިއެވެ.
ހޯމް މިނިސްޓްރީން ވިދާޅުވީ މާލޭއާއި ރާއްޖޭގެ އެކިކަންކޮޅުތަކުގައި ކުށުގެ ވެށީގައި އުޅޭ އެކާވީސް ކުއްޖަކު މިޕްރޮގްރާމްގެ ދަށުން ދ. އަތޮޅު ވާނީގައި ހުންނަ ތަމްރީނުދޭ މަރުކަޒަށް ގެންގޮސްފައިވާކަމަށެވެ. އަންހެންކުދިންވެސް ބައިވެރިވާ މި ޕްރޮގްރާމްގެ ކުދިންނާއެކު ހަތާވީސް ޓްރެއިނަރުންވެސް ވާނީއަށް މިއަދު ގޮސްފައިވާކަމަށް ހޯމް މިނިސްޓްރީން މަޢުލޫމާތުދެއެވެ.
މި ޕްރޮގްރާމާ ބެހޭ ގޮތުން މަޢުލޫމާތުދެއްވަމުން ހޯމް މިނިސްޓަރު އުމަރު ނަޞީރު ވިދާޅުވީ މި ޕްރޮގްރާމްގައި މިކުދިން އެއް އަހަރުދުވަސް ހޭދަކުރާއިރު ފުރަތަމަ ދެމަސްދުވަސް ހޭދަކުރާނީ ވާނީގައި ކަމަށާ އެއަށްފަހު މަސައްކަތް ދަސްކުރުމަށް އިންޓަރންޝިޕެއްގައި އުޅުމަށްފަހު ވަޒީފާތަކަށްވެސް މިކުދިން ދާނެކަމަށެވެ. މިނިސްޓަރ ވިދާޅުވީ މިކުދިންގެ ތަމްރީނު މޮޑިއުލްގެ ތެރޭގައި ކަސްރަތާއި، ތަޢުލީމާއި، ދީނީ ހޭލުންތެރިކަން އިތުރުކުރުމާއި، އަޚްލާގް ރަނގަޅުކުރުމަށް އެކިކަންތައްތައް ހިމެނޭކަމަށެވެ.
މި ޕްރޮގްރާމަށް ކުރިޔަށްއޮތް ތަނުގައިވެސް ކުށުގެ ވެށީގައި އުޅޭ ކުދިން ނަގަމުންދާނެކަމަށާ، މިކަމުގައި މައިންބަފައިންނާއި އެހެންހުރިހާ ފަރާތްތަކުގެ އެއްބާރުލުން ބޭނުންވާކަމަށް މިނިސްޓަރ ވިދާޅުވިއެވެ.