ހަތިޔާރާއި ގޮވާތަކެއްޗާއެކު ޝަޢުޤުވެރިގޮތަކަށް، ދިވެހި ސިފައިންގެ އަސްކަރީ ޤާބިލުކަން ދައްކާލައިފި

ނަސްރުގެ ދުވަހުގެ މުނާސަބަތުގައި ދިވެހި ސިފައިންގެ އަސްކަރީ ޤާބިލުކަން ދައްކާލުމުގެ ޚާއްސަ ހަރަކާތެއް ކުރިއަށްގެންގޮސްފިއެެވެ.

"ދިވެހި ސިފައިންގެ އަސްކަރީ ހުށަހެޅުން" ނަމުގައި ކުރިއަަށްދިޔަ މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއެވެ.

ސިފައިންގެ އަސްކަރީ ހަރަކާތް ބައްލަވާލެއްވުމަށް ރައީސުލްޖުމްހޫރިއްޔާ ޖުމްހުރީ މައިދާނަށް ވަޑައިގެންނެވުމުން ވަނީ ރިޔާސީ ކުރުނީހެއް އަރުވާފައެވެ. މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީއާއި ދިފާޢީ ވަޒީރު ޣައްސާން މަޢުމޫނުގެ އިތުރުން ވަޒީރުންނާއި ދަޢުލަތުގެ އިސްވެރިން ބައިވެރިވެވަޑައިގެންނެވިއެވެ. އަދި ގިނަ ޢަދަދަކަށް ޢާއްމު ރައްޔިތުންވެސް ބައިވެރިވިއެވެ.

ސިފައިންގެ އަސްކަރީ ހުށައެޅުމުގައި ވަނީ ޤައުމުގެ ދިފާޢުގައި ދިވެހި ސިފައިންގެ ޚިދުމަތުގައި ޤާއިމުކޮށްފައިވާ އެކި ވިންގުތަކުގެ އޮޕަރޭޝަންތައް ދައްކާލާފައެވެ. ރެކޯޑްކޮށްފައިވާ މައްޒަރުތައް އަދި ޖުމްހޫރީމައިދާނުގައި ވަގުތުން ގެނެސްދިން މަންޒަރުތަކުގައި ވަނީ، ނިރުބަވެރި ޙާމަލާއެއް ދިވެހި ސިފައިންގެ ޚިދުމަތުުން ރޫޅާލުމުގެ އޮޕަރޭޝަނެއް ރާވާ ކުރިއަށްގެންދާނެ ގޮތް ގެނެސްދީފައެވެ.

ކޯސްޓް ގަރޑް، މެރިން ކޯޕްސް، އެއަރ ކޯޕްސް، ޑިފެންސް އިންޓެލިޖެންސް ސަރވިސް އަދި ސްޕެޝަލް ފޯސަސްގެ ދަޢުރު މި އޮޕަރޭޝަންގައި ވަނީ ދައްކުވައިދީފައެވެ. އެގޮތުން އުޕަރޭޝަންގެ ރޭވުންތެރިކަމާއި އެކަމުގައި ބޭނުންކުރާ އުކުޅުތަކާއި ސިފައިގެ ވަސީލަތްތައް ބޭނުންކުރާނެ ގޮތްތައް ދައްކާލިއެވެ.

މި ރަސްމިއްޔާތުގައި އެންމެ ޚާއްސަ ކަމެއްގެގޮތުން ވަނީ ކަނޑުމަތީގައި އަސްކަރިއްޔާގެ ހަރަކާތްތެރިވުން އިތުރުކޮށް ޚާއްސަ އޮޕަރޭޝަންތައް ހިންގުމަށް "ސްޕެޝަލް ބޯޓް ސްކޮޑްރަން" އިފްތިތާޙުކޮށްދެއްވާފައެވެ. މިއީ ކަނޑުމަތީގެ ޚާއްސަ ބޮޑެތި އޮޕަރޭޝަންތަކުގައި ހަރަކާތްތެރިވުމަށް މުޅިން އަލަށް އުފެއްދެވި އަސްކަރީ ޔުނިޓެކެވެ.

އަދި ސްކޮޑްރަން"ގެ އެއްވަނަ ކޮލިފިކޭޝަން ކޯހުގެ ސިފައިންނަށް ބްލޫ ބެރޭ އަދި ޕެނަންޓް ހަވާލުކޮށްދެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއެވެ. މީގެއިތުރުން ސްޕެޝަލް ފޯސަސްގެ 5ވަނަ ކޮލިފިކޭޝަން ކޯސް ފުރިހަމަކުރެއްވި ސިފައިންނަށްވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ބެރޭ ހަވާލުކޮށްދެއްވީ އެވެ.

މި ހަރަކާތުގެ ތެރެއިން ސިފައިންގެ ބޭންޑުން ދުވަހާ ގުޅޭ ލަވަތައްވެސް ވަނީ ހުށަހަޅާދީފައެވެ.