ރާއްޖޭގެ ބޯޑަރުތަކުގެ ސިއްޙީ ޤާބިލްކަން އިތުރުކުރުމަށް ބޭނުންވާ ސާމާނު ހަދިޔާކޮށްފި

ރާއްޖޭގެ ބޯޑަރތަކުގެ ސިއްޙީ ޤާބިލްކަން އިތުރުކުރުމަށް ސިއްޙީ އާލާތްތަކެއް ރާއްޖެއަށް ހަދިޔާކޮށްފިއެވެ. މިއާލާތްތައް ހަދިޔާކޮށްފައިވަނީ އިންޓަރނޭޝަނަލް އޮގަނައިޒޭޝަން އޮފް މައިގްރޭޝަން، އައިއޯއެމްއާ ޖަޕާން ސަރުކާރު ގުޅިގެންނެވެ.

ވެލާނާ އިންޓަރނޭޝަނަލް އެއަރޕޯޓްގެ ސީޕްލޭން ޓާމިނަލްގައި ބޭއްވި ރަސްމިއްޔާތުގައި މި ތަކެއްޗާއި ހަވާލުވެވަޑައިގެންނެވީ ޚާރިޖީ ވަޒީރު ޑރ. އަބްދުﷲ ޚަލީލާއި، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދެވެ.

މިރަސްމިއްޔާތުގައި ވާހަކަދައްކަވަމުން ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވީ، އެއަރޕޯޓްތަކަކީ ގައުމަށް އެތެރެވާ މީހުންގެ ފަރާތުން އަންނަ ބަލިތައް ދެނެގަނެ އެކަންކަން ކޮންޓްރޯލް ކުރުމަށް އެންމެ މުހިންމު ދައުރެއް އަދާކުރެވޭނެ ތަންކަމަށެވެ. ކޯވިޑް19 އިން ދަސްވެގެންދިޔަ ފިލާވަޅަކީ ސިއްޙީ ގޮތުން ދިމާވެދާނެކަމަކަށް ބޯޑަރުތައް ތައްޔާރުވެފައި އޮތުމުގެ މުހިންމުކަންކަމަށް ވަޒީރު ވިދާޅުވިއެވެ.

އައިއޯއެމްއާއި ޖަޕާން ސަރުކާރުގެ އެހީގައި ހަދިޔާކުރި މިއިކުއިޕްމަންޓްތަކުގެ ސަބަބުން ދިވެހިންނާއި ރާއްޖެ އެތެރެވާ މީހުންގެ ސަލާމަތާއި ރައްކާތެރިކަން ކަށަވަރުކުރުމަށް އެހީވެދޭނެކަމަށް ވަޒީރު ވިދާޅުވިއެވެ.

"މިއަދު މި ހަދިޔާކުރެވޭ އިކުއިޕްމަންޓްތަކާއިއެކު ހެލްތް ސްކްރީނިންގ ވަރުގަދަވެ، އެސެސްމަންޓް އަވަސްވެގެންދާނެ. މި ހުރިހާ ކަމެއްވެސް ވެގެންދާނީ ސިއްޙީގޮތުން ބަލަންޖެހޭ އެންމެހައި ކަންކަމަށް ބެލުމަށްފަހު. ފިޒިކަލް ކޮންޓެކްޓްވުން މަދުވެ، ދަތުރުވެރިންގެ މެދުގައި އިތުބާރާއި ޔަޤީންކަން އިތުރުވެ، ފަތުރުވެރިކަމަށް އެހީތެރިވެދޭނެ". ޚާރިޖީ ވަޒީރު ވިދާޅުވިއެވެ.

މިރަސްމިއްޔާތުގައި ވާހަކަދައްކަވަމުން އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް ވިދާޅުވީ، ހަދިޔާކުރި މިއިކުއިޕްމަންޓްތަކާއެކު ރާއްޖޭގެ ބޯޑަރ ހެލްތު މެނޭޖްމަންޓަށް ވަރަށް ބޮޑު ފަސޭހައެއް ލިބިގެންދާނެކަމަށެވެ. އެއަރޕޯޓް ބޮޑުކުރުމުގެ މަޝްރޫޢާއެކު އައު ޓަރމިނަލުން އަހަރަކު 7.5 މިލިއަން ފަސިންޖަރުންނަށް ޚިދުމަތްދެވޭނެކަމަށެވެ. އެހެންކަމުން މިއީ ވަރަށް މުހިންމު ޕްރޮޖެކްޓަކަށް ވެގެންދާނެކަމަށް އޭނާ ވިދާޅުވިއެވެ.

"އެއަރކްރާފްޓް މޫމަންޓްސްއާއި ޕެސެންޖަރ މޫމަންޓްސްވެސް އިތުރުވެގެންދާނެ. ރާއްޖެ އަންނަ ފަތުރުވެރިންގެ އަދަދު އިތުރުވުމަކީ ރާއްޖޭގެ އިޤްތިޞާދަށް އޭގެ ހެޔޮ ބަދަލު ފެންނާނެކަމެއް. މިއަދު މި ހަދިޔާކުރާ އިކުއިޕްމަންޓްތަކާއި އަދި މުވައްޒަފުން ތަމްރީންކުރުމުގެ ފުރުސަތުތަކަކީ މުހިންމު ފުރުސަތުތަކެއް". އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް ވިދާޅުވިއެވެ.

ހަދިޔާކުރި މިއިކުއިޕްމަންޓްތައް ބޭނުންކުރާނީ ވެލާނާ އިންޓަރނޭޝަނަލް އެއަރޕޯޓާއި، ގަން އިންޓަރނޭޝަނަލް އެއަރޕޯޓްގައެވެ. މި އިކުއިޕްމަންޓްތަކުގެ ތެރޭގައި ޑިޖިޓަލް ފުލް ބޮޑީ ސްކޭނަރއާއި، ފުލީ އިކުއިޕްޑް އެމްބިއުލާންސްއާއި، ޕޯޓް ހެލްތްގައި ބޭނުންކުރުމަށް ވެހިކަލްތަކާއި، މެޑިކަލް އެހެން ބައެއް އިކުއިޕްމަންޓްތައް ހިމެނެއެވެ. މުޅި މިޕްރޮޖެކްޓްގެ އަގު 8.4 މިލިޔަން ޑޮލަރަށް އަރައެވެ.