ލައިސަންސް ދޫކުރުމުގެ ހުއްދަ އަލަށް، 10 ސެންޓަރަކަށް ދީފި
-
ލައިސަން ދޫކުރުމުގެ ހުއްދަ ޖުމުލަ 39 ސެންޓަރަކަށް މިހާރު ވަނީ ދީފައި
-
އޮންނަ އުޞޫލުގެ ދަށުން އިތުރު ސެންޓަރުތަކަށްވެސް އެ ހުއްދަ ދޫކުރާނެ
ލައިސަންސް ދޫކުރުމުގެ ހުއްދަ އަތޮޅުތަކުގެ 10 ސެންޓަރަކަށް ދިނުމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ނިންމައިފިއެވެ.
މިއީ އަތޮޅުތަކުގެ ރައްޔިތުންނަށް ލައިސަންސް ހޯދުމުގައި ދިމާވާ ދަތިތައް ޙައްލުކުރުމަށްޓަކައި ނިންމަވާފައިވާ ނިންމުމެއްކަމަށް އެ ވުޒާރާއިން ވިދާޅުވއެވެ.
ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވީ ލައިސަންސް ދޫކުރުމުގެ ހުއްދަ ދިނުމަށް ނިންމާފައިވާ ސެންޓަރުތަކުގައި މަސައްކަތްކުރާ މުވައްޒަފުންގެ ޤާބިލުކަން އިތުރުކުރުމަށްޓަކައި ޚާއްޞަ ތަމްރީން ޕްރޮގްރާމްތަކެއް ބާއްވާފައިވާކަމަށެވެ. މިހާރު ލައިސަންސް ދޫކުރަމުންދާ ސެންޓަރުތައް މޮނިޓަރކުރުމުގެ މަސައްކަތްވެސް ވަނީ ފަށާފައެވެ. މި މަސައްކަތުގެ މަޤްޞަދަކީ ލައިސަންސް ދޫކުރުމުގައި ގެންގުޅޭ މިންގަނޑުތައް ހިފެހެއްޓުމާއި، ޚިދުމަތުގެ ފެންވަރު ރަނގަޅުކުރުންކަމަށް އެ ވުޒާރާއިން ވިދާޅުވެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވީ އަލަށް ހުއްދަ ދިން ސެންޓަރުތަކާއެކު ޖުމުލަ 39 ސެންޓަރަކަށް ލައިސަންސް ދޫކުރުމުގެ ހުއްދަ ދޫކޮށްފައިވާކަމަށެވެ. އަދި އިތުރު ސެންޓަރުތަކުންވެސް ލައިސަންސް ދޫކުރުމުގެ ހުއްދައަށް އެދުމުން އޮންނަ އުޞޫލްގެ ދަށުން ލައިސަންސް ދޫކުރުމުގެ ހުއްދަ ދެމުންގެންދާނެކަމަށް އެ ވުޒާރާއިން ވިދާޅުވެއެވެ.
އަލަށް ހުއްދަ ދޫކުރި 10 ސެންޓަރު
- ހއ. މޮޅަދޫ ކައުންސިލް
- ހއ. އިހަވަންދޫ ކައުންސިލް
- ހއ. ކެލާ ކައުންސިލް
- ބ. ކެންދޫ ކައުންސިލް
- ވ. އަތޮޅު ކައުންސިލް
- ރ. ހުޅުދުއްފާރު ކައުންސިލް
- ތ. ވިލުފުށީ ކައުންސިލް
- ފ. ދަރަނބޫދޫ ކައުންސިލް
- މ. ދިއްގަރު ކައުންސިލް
- ގދ. ގައްދޫ ކައުންސިލް
ރާއްޖޭގައި ލައިސަންސް ދޫކުރުމުގެ ނިޒާމު އިތުރަށް ހަރުދަނާކުރުމަށްޓަކައި އަޅާ ފިޔަވަޅުތަކަކީ ރާއްޖޭގެ މަގުތަކުގެ ރައްކާތެރިކަން އިތުރުކުރުމަށާއި، ލައިސަންސް ދޫކުރުމުގެ ނިޒާމަށް ރައްޔިތުންގެ އިތުބާރު އިތުރުކުރުމަށް އެޅޭ މުހިންމު ފިޔަވަޅުތަކެއްކަމަށް ދަތުރުފަތުރާ ބެހޭ ވުޒާރައިން ވިދާޅުވެއެވެ. މި އައު ފިޔަވަޅުތަކުގެ ސަބަބުން ރާއްޖޭގައި ލައިސަންސް ދޫކުރުމުގެ ނިޒާމު އިތުރަށް ހަރުދަނާވެ، ރައްޔިތުންނަށް ލުއިފަސޭހަވާނެކަމަށްވެސް އެ ވުޒާރާއިން ވިދާޅުވެއެވެ.