ހދ. އަތޮޅުގައި ހުޅުވާ ފުރަތަމަ ރިސޯޓް އަންނަ އަހަރުގެ އެޕްރީލްމަހު ހުޅުވުމަށް ތައްޔާރުވަމުން އަންނަކަމަށް މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން އެމްޓީޑީސީން ހާމަކޮށްފިއެވެ. ޕީއެސްއެމް ނިއުސްއަށް މަޢުލޫމާތުދެއްވަމުން އެމްޓީޑީސީގެ މެނޭޖިންގ ޑިރެކްޓަރ އަޙުމަދު ނިޔާޒު ވިދާޅުވީ ހދ. ނާގޯށީގައި އެމްޓީޑީސީން ތަރައްޤީކުރާ މި ރިސޯޓްގެ ފަންސާސް އިންސައްތަ މަސައްކަތް ނިމިފައިވާކަމަށެވެ.
ރިސޯޓްގެ ނުނިމި ހުރި މަސައްކަތްތައް ރޯދަމަހަށްފަހު ފަށައި، އަންނަ އަހަރުގެ އޭޕްރީލްގެ ކުރިން ނިންމާނެކަމަށް ނިޔާޒު ވިދާޅުވިއެވެ. ހދ. ނާގޯށީގައި އެމްޓީޑީސީން ތަރައްޤީކުރަނީ 600 އެނދުގެ ރިސޯޓެކެވެ.
ދެހާސް ހަތްވަނަ އަހަރު ރިސޯޓެއް ތަރައްޤީކުރަން އެމްޓީޑީސީއަށް ސަރުކާރުން ކުއްޔަށް ދެއްވާފައިވާ ނާގޯށީގައި ތްރީކޭ އިންޓަނޭޝަނަލް ކުންފުނިން ތަރައްޤީކުރާ މި ރިސޯޓްގެ ކޮންސްޓްރަކްޝަން މަސައްކަތުގެ ބޮޑު ބައެއް މިހާރު ނިމިފައިވާކަމަށް އެމްޓީޑީސީން ބުނެއެވެ. ފަސްތަރީގެ މި ރިސޯޓުގެ މަސައްކަތް ހަލުއިކުރުމުގެ ގޮތުން ބަޙްރައިންގެ ތަޖުރިބާކާރު ކުންފުންޏަކާއެކު ވަނީ ޕާޓްނާޝިޕެއްވެސް ހަދާފައެވެ.
މި ރިސޯޓް ހުޅުވުމުން ހދ. އަތޮޅު ރައްޔިތުން ކުރަމުން އަންނަ ދިގު އިންތިޒާރަށް ނިމުމެއް އަންނާނެއެވެ. އަދި މި ރިސޯޓާއެކު އެ އަތޮޅުގައި އިތުރު ވަޒީފާގެ ފުރުސަތަކެއްވެސް ހުޅުވިގެންދާނެއެވެ.
ސަރުކާރުން އެމްޓީޑީސީސީއަށް ރިސޯޓު ތަރައްޤީކުރުމަށް ނުވަ ރަށެއް ދެއްވާފައިވެއެވެ.