ނެތިދިއުމުގެ ބިރު ހީވެފައިވާ ދިރޭއެއްޗެއް ހުއްދަނެތި އެތެރެކޮށްފި ނަމަ، 30،000 ރުފިޔާގެ ޖޫރިމަނާއެއް

ނެތިދިއުމުގެ ބިރު ހީވެފައިވާ ދިރޭ ތަކެތި އެތެރެކުރާނަމަ، އެތެރެކުރާ ކޮންމެ އެއްޗަކަށް 30،000 ރުފިޔާގެ މަގުން އެތެރެކުރާ ފަރާތް ޖޫރިމަނާކުރާ ގޮތަށް ޤަވާއިދު އިސްލާޙުކޮށްފިއެވެ.

ނެެތި ދިޔުމުގެ ބިރުހީވެފައިވާ ދިރޭ ތަކެތީގެ ބައިނަލްއަގުވާމީ ވިޔަފާރި ކޮންޓްރޯލްކުރުމަށް ދޫކުރާ ހުއްދައާއި ވިޔަފާރިކުރާ ފަރާތްތަކާއި ތަކެތި ރަޖިސްޓަރީކުރުމާ ގުޅޭ ޤަވާއިދަށް އިސްލާހު ގެނެސްފައެވެ.

އެ އިސްލާހުގައި، ނެތި ދިއުމުގެ ބިރު ހީވެފައިވާ ދިރޭ އެއްޗެއް ހުއްދަނެތި އިމްޕޯޓްކުރުމާއ،ި އެކްސްޕޯޓްކުރުމާއި ރީއެކްސްޕޯޓްކުރުމާއ،ި ކަނޑުން އެތެރެކުރުމަކީ މަނާކަމެއް ވަނީ ކަނަޑައަޅާފައެވެ. އަދި އެފަދަ ދިރުމެއް އެތެރެކުރުމަށް ބޭނުންވާ ހުއްދަނެތި ރާއްޖެއަށް އެތެރެކޮށްފިނަމަ، އެ އެތެރެކުރި ކޮންމެ އެއްޗަކަށް 30،000 ރުފިޔާގެ މަގުން އެ އެއްޗެއް އެތެރެކުރާ ފަރާތް ޖޫރިމަނާ ކުރާނެއެވެ.

އަދި ނެތި ދިއުމުގެ ބިރު ހީވެފައިވާ ދިރޭ އެއްޗެއްގެ ބައެއް ނުވަތަ އެއިން އެއްޗެއްގެ އުފެއްދުމެއް ގާނޫނާއި ޤަވާއިދުގެ ދަށުން ދޫކުރާ ހުއްދަޔާއެކު މެނުވީ އިމްޕޯޓްކުރުމާއ،ި އެކްސްޕޯޓްކުރުމާއ،ި ރީއެކްސްޕޯޓްކުރުމާއ،ި ކަނޑުން އެތެރެކުރުމަކީ ވެސް މަނާކަމެއް ކަމަށް ވެސް އިސްލާހުގައިވެއެވެ.

މީގެ އިތުރުން އެފަދަ ދިރުމެއްގެ ބައެއް ނުވަތަ އެއިން އެއްޗެއްގެ އުފެއްދުމެއް އެތެރެކުރުމަށް ބޭނުންވާ ހުއްދަ ނެތި އެތެރެކޮށްފިނަމަ އެތެރެކުރި ކޮންމެ އެއްޗަކަށް 10,000 ރުފިޔާގެ މަގުން އެ އެއްޗެއް އެތެރެކުރާ ފަރާތެއް ޖޫރިމަނާކުރެވޭނެ ކަމަށް މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވުޒާރާއިން ވިދާޅުވެއެވެ.

މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވުޒާރާއިން ވިދާޅުވީ ދިރޭ އެއްޗެއް ނުވަތަ އެއިން އެއްޗެއްގެ ބައެއް ނުވަތަ އެއިން އެއްޗެއްގެ އުފެއްދުމެއް ޤާނޫނާއި ޚިލާފަށް އަމިއްލަ ބޭނުމަށް ގެންގުޅުމާއި ކޮންޓްރޯކުރުމާއި ވިއްކުމާއި ވިއްކުމަށް މަސައްކަތްކުރުމާއި އާންމުންނަށް ފެންނަ ތަންތަނުގައި ބެހެއްޓުމަކީ މަނާކަމެއްކަމަށެވެ. އެގޮތުން މި ފަދަ އަމަލެއް ކޮށްފިނަމަ އެ މައްސަލައިގައި ހިމެނޭ ކޮންމެ އެއްޗެއްގެ އުފެއްދުމަކަށް 10،000 ރުފިޔާގެ މަގުން އެކަން ކުރި ފަރާތް ޖޫރިމަނާކުރެވޭނެކަމަށެވެ.

އެ ވުޒާރާއިން ވިދާޅުވީ މި ޤާނޫނުގެ ދަށުން ދޫކުރާ ހުއްދައިގެ ޝަރުތުތަކާއި ނުވަތަ ރަޖިސްޓްޜޭޝަނުގެ ޝަރުތަކާއި ޚިލާފުވުމަކީ މަނާކަމެއްކަމަށެވެ. މިފަދަ އަމަލެއް ފުރަތަމަ ފަހަރު ކޮށްފިނަމަ 5000ހާސް ރުފިޔާއިން ދެ ވަނަ ފަހަރަށްކޮށްފިނަ 10،000ރުފިޔާއިން 3 ވަނަ ފަހަރު ފަހަރަށްކޮށްފިނަމަ 20،000ރުފިޔާއިން ޖޫރިމަނާ ކުރެވޭނެކަމަށެވެ.

އަދި 3 ފަހަރަށް ވުރެއް ގިނައިން މިފަދަ ކަމެއް ތަކުރާރު ކޮށްފިނަމަ ތަކުރާރުކުރާ ކޮންމެ ފަހަރަކަށް 50،000 ރުފިޔާއަށް ވުރެއް ބޮޑުނޫން އަދަދަކުން ޖޫރިމަނާ ކުރެވޭނެކަމަށެވެ.

ނެެތި ދިޔުމުގެ ބިރުހީވެފައިވާ ދިރޭ ތަކެތީގެ ބައިނަލްއަގުވާމީ ވިޔަފާރި ކޮންޓްރޯލްކުރުމަށް ދޫކުރާ ހުއްދައާއި ވިޔަފާރިކުރާ ފަރާތްތަކާއި ތަކެތި ރަޖިސްޓަރީކުރުމާ ގުޅޭ ޤަވާއިދު ގެޒެޓްގައި ޝާއިއުކުރުމާއެކު އެ ޤަވާއިދަށް މިހާރު ވަނީ އަމަލުކުރަން ފަށާފައެވެ.

ސަރުކާރުން މިހާރު ވަނީ ވަނީ ޤަވާއިދާ ޚިލާފަށް ރާއްޖެއަށް ގެންނަ ޖަނަވާރާއި، ދިރޭ ތަކެތި ނައްތާލުމަށް ނުވަތަ އެހެން ތަނަކަށް އަނބުރާ ފޮނުވާލުމަށް ހިނގާ ޚަރަދާއި އިންތިޒާމުތައް، އެ އެއްޗެއް އެތެރެކުރި ފަރާތްތަކުން ހަމަޖައްސަން ޖެހޭގޮތަށް ހަދާފައެވެ.