"ޑިވެލޮޕްމަންޓް ބޭންކުވާނީ ތަރައްޤީގެ މަޝްރޫއުތަކަށް ބޭނުންވާ ފައިސާ ރާއްޖެއަށް ފަހިކުރުމުގެ ބައިވެރިއަކަށް"

މޯލްޑިވްސް ޑިވެލޮޕްމަންޓް ބޭންކް ވެގެން ދާނީ ދިވެހިރާއްޖެއާ ބައިނަލްއަޤްވާމީ މާލީ އިދާރާތަކާއި އިންވެސްޓަރުންނާއި ގުޅިގެން ތަރައްޤީގެ މަޝްރޫއުތަކަށް ބޭނުންވާ ފައިސާ ރާއްޖެއަށް ފަހިކުރުމުގެ ބައިވެރިއަކަށްކަމަށް އިޤްތިސާދީ ތަރައްޤީއާ ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެެވެ.

ވަޒީރު މިހެން ވިދާޅުވީ ޑިޕްލޮޕްމަންޓް ބޭންކްގެ މުހިއްމުކަމާ ގުޅޭގޮތުން އެކްސްގައި ހިއްސާކުރެއްވި ޕޯސްޓެއްގައެވެ.

އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވީ ދިވެހިރާއްޖެ މެދުފަންތީގައި އާމްދަނީ ލިބޭ ގައުމަކަށްވުމާއި ގުޅިގެން ދިވެހި ރާއްޖެއަށް ކުރިން ލިބެމުންދިޔަ ހިލޭ އެހީއާއި ލުއިގޮތްތައް ދަރަނީގެ ގޮތުގައި ލިބެމުން ދިޔަ ފައިސާގެ ނިސްބަތް ވަރަށް ބޮޑުތަނުން މަދުވެފައިކަމަށެވެ. އެގޮތުން ރާއްޖޭގެ ދަރަނި އިންތިހާއަށް ބޮޑުވެފައިކަމަށް ވަޒީރު ވިދާޅުވިއެވެ.

މީގެ އިތުރުން ރާއްޖެއަކީ އިމްޕޯޓަށް ބަރޯސާވާ ގައުމަކަށްވުމުން ރާއްޖޭގެ ބޭރުފައިސާގެ ރިޒާވް ޖީޑީޕީގެ ނިސްބަތުން ބަދަލުވެފައި ނުވާކަމަށް ސައީދު ވިދާޅުވިއެވެ.

ސައީދު ވިދާޅުވީ ރާއްޖޭގެ މާލީ ނިޒާމުގައި ދުރުރާސްތާގެ ތަސައްވުރެއް އޮތް ބޭންކެއް އުފެއްދުމަކީ ވަރަށް މުހިންމު ކަމެއްކަމަށެވެ. އަދި މި ބޭންކް ވެގެންދާނީ ރާއްޖޭގެ ޚިދުމަތްދޭ އެހެނިގެން މާލީ މުއައްސަސާތަކާއި ބައިނަލްއަޤްވާމީ މާލީ މުއައްސަސާތަކާ އަދި އިންވެސްޓްރުންނާއި ގުޅިގެން ތަރައްގީގެ މަޝްރޫއުތަކަށް ބޭނުންވާ ފައިސާ ދިވެހިރާއްޖޭއަށް ފަހިކުރުމުގެ ބައިވެރިއެއްކަމަށް ވަޒީރު ސައީދު ވިދާޅުވިއެވެ.

ވަޒީރު ސައީދު ވިދާޅުވީ ރާއްޖޭގެ އިގްތިޞާދަކީ ވަރަށް ނާޒުކު އެއްޗެއްކަމަށާއި އެގޮތުން ތަރައްޤީގެ ފޮނިމީރުކަން އަންނަން އޮތް ޖީލިތަކަށް ވާސިލްކޮށްދިނުމަށް މާލީ ނިޒާމް ހަރުދަނާ ވާން ޖެހޭކަމަށް ވަޒީރު ފާހަގަކުރެއްވިއެވެ. އެގޮތުން ޑިވްލޮޕްމަންޓް ބޭންކް ރާއްޖޭއަށް މުހިންމުވާ އެތައް ސަބަބުތަކެއް އެބަހުރިކަމަށް ވަޒީރު ސައީދު ވިދާޅުވިއެއެވެ. އޭގެ ތެރޭގައި ސަރަޙައްދީ އަދި ފަރުދީ ތަނަވަސްކަމުގެ ފަރަގު ކުޑަކުރުން، ރަނގަޅު ފެންވަރުގެ ބޯހިޔާވަހިކަމާއި ވަޒަންވެރިވާނެ ޒަމާނީ މާހައުލުތައް އުދެއްދުން އަދި ދައުލަތުގެ ދަރަނި އަނބުރާދެއްކުމާއި ދަރަނީގެ ބުރަ އަންނަން އޮތް ޖީލުތަކަށް ލުއިކުރުން ހިމެނެއެވެ. މީގެ އިތުރުން މަންފާއެއް ނުލިބި ގިނަދުވަސްވެފައިވާ ރަށްތަކާއި ފަޅުތައް ތަރައްޤީކުރުންކަމަށް ވަޒީރު ވިދާޅުވިއެވެ.

އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވީ ޑިވްލޮޕްމަންޓް ބޭންކުން ފައިސާ ދޫކުރާނީ ހަމައެކަނި ދަރަނީގެ ގޮތުގައި ނޫންކަމަށާއި ޑިވްލޮޕްމަންޓް ބޭންކުން މާލީ އެހީއާއި ފަންނީ އެހީ ފޯރުކޮށްދިނުމުގެ އިތުރު ގޮތްތައް ތައާރަފް ކުރެވިގެން ދާނެކަމަށެވެ. އޭގެ ތެރޭގައި އިކުއިޓީ ފައިނޭންސް، ފަންޑުތައް ސިންޑިކޭޝަން. ރިސްކް އިންޝިއުރެންސް ހިމެނޭކަމަށެވެ.

ވަޒީރު ސައީދު ވިދާޅުވީ ޑިވްލޮޕްމަންޓް 5 ދާއިރާއަކަށް ފޯކަސްކުރެވިގެން ދާނެކަމަށެވެ. އެ ފަސް ދާއިރާއަކީ ހަކަތައާއި ކާބޯތަކެތީގެ ޔަގީންކަން އަދި އަގުތައްް ހިފެހެއްޓުން، ވަޒަންވެރިކަމާއި ބޯހިޔާވަހިކަން، ތިމާފެށި ހިމާޔަތްކުރުމިގެ އިތުރުން ޓޫރިޒަމް އަދި ވައިގެ ދަތުރުފަތުރުތަކުގެ ޚިދުމަތްތައް އަދި ކަނޑުގެ މަންފާއާއި ކަނޑާއި ގުޅިފައިވާ އިޤްތިސާދީ ހަރަކާއްތަކުގެ ދާއިރާ ހިމެނެއެވެ.

ވަޒީރު ވިދާޅުވީ އިޤްތިސާދީ ތަރައްޤީގެ ޕްލޭންގައި ހިމެނޭ އެކި ސިނާއައްތަަކަށް ބޭނުންވާ ފައިނޭންސް ހޯދުމުގައި ޑިވްލޮޕްމަންޓް ބޭންކް މުހިންމު ދައުރެއް އަދާކުރާނެކަމަށެވެ.

އިޤްތިސޯދީ ތަރައްޤީއާއި ވިޔަފާރިއާއި ބެހޭ ވަޒީރު މުހައްމަދު ސައީދު ވިދާޅުވީ ހަގީގަތުގައި އެމަރިކާ ޑޮލަރުގެ ދަތިކަން މިއީ އިޤްތިސާދުގައި ހުރި މައްސަލަތަކާއި ގުޅިފައިހުރި ކަމެއްގެ ބަދަލުގައި ރާއްޖޭގެ މާލީ ނިޒާމުގެ ރޭވިފައިވާ ގޮތުން ދިމާވާ ދަތިތަކެއްކަމަށެވެ. އެގޮތުން ޑިވްލޮޕްމަންޓް ބޭންކް މެދުވެރިކޮށް ރާއްޖޭއަށް ފޮރިން ޑިރެކްޓް އިންވެސްޓްމަންޓްތައް އިތުރުކޮށް ޖުމްލަގޮތެެއްގައި ރާއްޖޭގެ މާލީ ނިޒާމް މެދުވެރިކޮށް ލިބެންހުރި ޑޮލަރުގެ އަދަދު އިތުރުކުރެވިގެން ދާނެކަމަށެވެ.