ފައިދާހުރި ކާނާއާމެދު ހޭލުންތެރިކަން އިތުރުކޮށް، ދުނިޔެއިން ހައިހޫނުކަން ނައްތާލުމަށް އައު އަޒުމެއް

ތަފާސްހިސާބުތައް ދައްކާގޮތުގައި ދުނިޔޭގެ 2.8 ބިލިޔަން މީހުންނަކީ ފައިދާ ހުރި ކާނާގެ ބާވަތްތަކުން މަހުރޫމްވެފައިވުމުގެ ސަބަބުން ނުވަތަ އެފަދަ ކާނާ ލިބެން ނެތުމުން ސިއްޙީ އެކި ބަލިތައް ތަހައްމަލުކުރަމުންދާ މީހުންނެވެ.

ފައިދާހުރި ކާނާގެ ބާވަތްތައް ކެއިންބުއިމުގައި ބޭނުންކުރުމާއި، ދުނިޔޭގައި ބަނޑުހައިހޫނުކަން ތަހައްމަލުކުރަމުންދާ ފަރާތްތަކާއި މެދު އާއްމުން ހޭލުންތެރިކުރުވުމަށްޓަކައި ކޮންމެ އަހަރެއްގެވެސް އޮކްޓޫބަރު މަހުގެ 16ވަނަ ދުވަސް ފާހަގަކުރަނީ ދުނިޔޭގެ ކާބޯތަކެތީގެ ދުވަހުގެގޮތުގައެވެ.

މިދުވަސް ފާހަގަކުރަން ނިންމީ 1979ވަނަ އަހަރު ބޭއްވި ޔުނައިޓަޑު ނޭޝަންސް ފުޑް އެންޑު އެގްރިކަލްޗަރ އޮގަނައިޒޭޝަން، އެފްއޭއޯގެ 20ވަނަ ޖެނެރަލް ކޮންފަރެންސްގައެެވެ.

މިފަދަ ދުވަހެއް ފާހަގަކުރުމުގެ އެންމެ މުހިއްމު އެއް ބޭނުމަކީ ބަނޑުހައިހޫނުކަމާއި، ފައިދާހުރި ކާނާގެ ބާވަތްތައް ނުލިބި ސިއްޙިގޮތުން ބަލިމަޑުކަން ތަހައްމަލުކުރަމުންދާ ފަރާތްތަކުގެ ހައްގުގައި މަސައްކަތްކުރުމެވެ. އަދި ދެމެހެއްޓެނިވި ގޮތެއްގައި ދަނޑުވެރިކަންކުރުމާއި ކާބޯތަކެތީގެ ކަށަވަރުކަން ޔަޤީންކުރުމަށް ގުޅިގެން މަސައްކަތްތައް ކުރުމަކީވެސް މިދުވަސް ފާހަގަކުރުމުގެ ބޭނުމެކެވެ.

1981ވަނަ އަހަރުން ފެށިގެން ދުނިޔޭގެ ކާބޯތަކެތީގެ ދުވަސް ފާހަގަކުރަމުން އަންނަނީ ކޮންމެ އަހަރެއްގައިވެސް ވަކި ޝިއާރެއްގެ ދަށުންނެވެ. އެގޮތުން މިއަހަރުގެ ޝިއާރަކީ "ރަނގަޅު ދިރިއުޅުމަކާއި ރަނގަޅު މުސްތަގުބަލަކަށް ކާބޯތަކެތީގެ ޙައްގު" މި ޝިޔާރެވެ.

ދުނިޔޭގެ ކާބޯތަކެތީގެ ދުވަހަކީ ރާއްޖޭގައި އެކި ފެންވަރުގައި ފާހަގަކުރާދުވަހެވެ. އަދި ރާއްޖޭގެ ދަނޑުވެރިކަމުގެ ދުވަސްވެސް މިވަނީ މިދުވަހާއި ގުޅުވާފައެވެ. އެގޮތުން 2020ވަނަ އަހަރުން ފެށިގެން ރާއްޖޭގެ ދަނޑުވެރިންގެ ދުވަސް ފާހަގަކުރަނީ އޮކްޓޫބަރުމަހުގެ 15ވަނަ ދުވަހުއެވެ. އޭގެކުރިން ރާއްޖޭގެ ދަނޑުވެރިންގެ ދުވަސް ފާހަގަކުރަމުން އައިސްފައިވަނީ އޮގަސްޓު 10ވަނަ ދުވަހުއެވެ.

ސަރުކާރުން ދަނޑުވެރިންގެ ދުވަސް އޮކްޓޫބަރު 15އަށް ބަދަލުކޮށްފައިވަނީ، ދުނިޔޭގެ ފެންވަރުގައި ފާހަގަކުރާ، ދުނިޔޭގެ ކާބޯތަކެތީގެ ދުވަސްކަމުގައިވާ އޮކްޓޫބަރުމަހުގެ 16 ވަނަ ދުވަހާ ގުޅޭގޮތަށް ދަނޑުވެރިންގެ ދުވަސް ފާހަގަކުރުމުން،ދަނޑުވެރިންނާއި، އެ މީހުން އުފައްދާ ތަކެއްޗާ ގުޅޭގޮތުން ފުޅާ ދާއިރާއެއްގައި ތަފާތު ހަރަކާތްތައް ހިންގުމަށް މަގުފަހިކޮށްދިނުމަށެވެ.

ރާއްޖޭގައި ކާބޯތަކެތީގެ ދުވަަހާއި ގުޅުވައިގެން އާއްމުކޮށް އެކި ރަށްރަށުގައި ކާބޯތަކެތީގެ މައުރަޒުތައް ބާއްވައެވެ. މިއީ ދަނޑުވެރިންނަށާއި، ކާބޯތަކެތި ތައްޔާރުކުރާ ފަރާތްތަކަށް ލިބިގެންދާ ވަރަށް ބޮޑު ފުރުސަތެކެވެ. މި ފަދަ މައުރަޒުތަކުގެ ސަަބަބުން އުފެއްދުންތައް މަރކެޓު ކުރުމަށްވެސް އެހީވެދެއެވެ.

ކާބޯތަކެތީގެ ރައްކާތެރިކަމާއި ޔަޤީންކަން ގުޅެނީ ދަނޑުވެރިކަމާއެވެ. ރާއްޖެއަކީ ބިން ކުޑަ ޤައުމެއް ނަމަވެސް، ރާއްޖޭގެ މިސްރާބު ހުރީ ޒަމާނީ ދަނޑުވެރިކަމާއި ދިމާއަށެވެ. ހައިޑްރޯފޯނިކްސް ގައި ގަސް ހެއްދުމާއި ވަރޓިކަލް ފާމިންގެ މަސައްކަތްތައް ދަނީ ކުރެވެމުންނެވެ.

ރާއްޖޭގެ ހައްދާ ބާވަތްތަކުގެ ފެންވަރު ރަނގަޅުކޮށް އަދި ދެމެހެއްޓެނިވިގޮތެއްގައި އެ މަސައްކަތްތަތައް ކުރެވޭނެ މަގުތައް ދަނޑުވެރިންނަށް ތަނަވަސްކޮށްދިނުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރަމުންނެވެ. އެގޮތުން ދަނޑުވެރިންނަށް ބޭނުންވާ މާލީ އެހީތެރިކަމާއި މިކަމަށް ބޭނުންވާ ތަމްރީންތައް ފަހިކޮށްދިނުމަށް ސަރުކާރުން އިސްކަންދެއެވެ.