އަމާޒަކީ މިއަހަރު ނިމުމުގެ ކުރިން ޑިވެލޮޕްމަންޓް ބޭންކު އޮޕަރޭޝަނަށް ގެނައުން: އިޤްތިޞާދީ ވުޒާރާ

ޑިވެލޮޕްމެންޓް ބޭންކަށް މުވައްޒަފުން ނެގުމުގެ މަސައްކަތް ފަށާފައިވާކަމަށާއި އަމާޒަކީ މިއަހަރު ތެރޭގައި ބޭންކުގެ ޚިދުމަތްތައް ފެށުން ކަމަށް އިޤްތިޞާދީ ތަރައްޤީއާއި ބެހޭ ވުޒާރާއިން ވިދާޅުވެއްޖެއެވެ.

ރާއްޖޭގެ ފުރަތަމަ ޑިވެލޮޕްމެންޓް ބޭންކް ހުޅުވުމަށް ބޭނުންވާ ލައިސެންސް މޯލްޑިވްސް މަނިޓަރީ އޮތޯރިޓީ، އެމްއެމްއޭ އިން ދީފައިވަނީ މިދިޔަ އާދިއްތަ ދުވަހުއެވެ. މިއީ ސައްތައިންސައްތަ ދިވެހި ސަރުކާރު ހިއްސާ ބޭންކްކެވެ. އެމްއެމްއޭއިން ލައިސެންސް ދީފައިވަނީ ބޭންކުގެ މަސައްކަތް އަންނަ އަހަރުގެ އޮކްޓޯބަރ މަހުގެ 12 ގެ ކުރިން ފަށަންޖެހޭ ގޮތަށެވެ. އެމްއެމްއޭއިން ވަނީ އެ ބޭންކްގެ ޚިދުމަތް ފެށިގެން ދިއުމަކީ މާލީ ދައިރާ ހަރުދަނާކުރުމަށް އެޅޭ ފިޔަވަޅެއް ކަމުގައި ފާހަގަކޮށްފައެވެ.

މި ބޭންކް ހުޅުވުމަށް ބޭނުންވާ ލައިސެންސް ދިނުމާ ގުޅިގެން، އިޤްތިޞާދީ ތަރައްޤީއާއިބެހޭ ވުޒާރާއިން ނެރުނު ބަޔާނުގައި ވިދާޅުވީ، ލައިސެންސް ލިބުމާއެކު ބޭންކުގެ ޚިދުމަތް ފެށުމަށް ބޭނުންވާ ފަންނީ މުވައްޒަފުން ނެގުމުގެ މަސައްކަތް ފަށާފައިވާ ކަމަށެވެ. އަދި ސަރުކާރުގެ އަމާޒަކީ ޚިދުމަތްތައް މިއަހަރު ނިމުމުގެ ކުރިން ފެށުން ކަމަށް އިޤްތިޞާދީ ވުޒާރާއިން ވިދާޅުވެއެވެ.

ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގެ ޑިވެލޮޕްމެންޓް ބޭންކު އުފައްދާވާފައި ވަނީ މޭމަހުގެ 16 ވަނަ ދުވަހުއެވެ. އަދި އެ ބޭންކު އުފެއްދުމަށް ބޭނުންވާ ލައިސަންސް ހޯދުމަށް އެމްއެމްއޭއަށް ހުށަހަޅާފައިވަނީ މިދިޔަ ޖުލައިމަހުއެވެ.

މި ބޭންކް ވެގެންދާނީ ރާއްޖޭގައި ޚިދުމަތްދޭ އެހެނިހެން މާލީ މުއައްސަސާތަކާއި ބައިނަލްއަޤްވާމީ މާލީ މުއައްސަސާތަކާ އަދި އިންވެސްޓްރުންނާއި ގުޅިގެން ތަރައްގީގެ މަޝްރޫއުތަކަށް ބޭނުންވާ ފައިސާ ދިވެހިރާއްޖޭއަށް ފަހިކުރުމުގެ ބައިވެރިއެއްކަމަށް ސަރުކާރުން ވަނީ ވިދާޅުވެފައެވެ. މިގޮތުން ސަރަޙައްދީ އަދި ފަރުދީ ތަނަވަސްކަމުގެ ފަރަގު ކުޑަކުރުން، ރަނގަޅު ފެންވަރުގެ ބޯހިޔާވަހިކަމާއި ވަޒަންވެރިވާނެ ޒަމާނީ މާހައުލުތައް އުފެއްދުން އަދި ދައުލަތުގެ ދަރަނި އަނބުރާދެއްކުމާއި ދަރަނީގެ ބުރަ އަންނަން އޮތް ޖީލުތަކަށް ލުއިކުރުން މި ބޭންކު އުފެއްދުމުގެ މަޤްޞަދުތަކުގެ ތެރޭގައި ހިމެނެއެވެ.

މީގެ އިތުރުން ޑިލޮޕްމަންޓް ބޭންކުން ފައިސާ ދޫކުރާނީ ހަމައެކަނި ދަރަނީގެ ގޮތުގައި ނޫންކަމަށާއި، އޭގެ އިތުރަށް އިކުއިޓީ ފައިނޭންސް، ފަންޑު ސިންޑިކޭޝަން، ރިސްކް އިންޝިއުރެންސް ހިެމެނޭނެ ކަމަށް ސަރުކާރުން ފާހަގަކުރެއެވެ.

އަދި ބޭންކުން މަސައްކަތް ކުރާނެ މައިގަނޑު ފަސް ދާއިރާ ހިމެނޭއިރު، އެ ދައިރާތަކަކީ ހަތައާއި ކާބޯތަކެތީގެ ޔަގީންކަން އަދި އަގުތައްް ހިފެހެއްޓުން، ވަޒަންވެރިކަމާއި ބޯހިޔާވަހިކަން، ތިމާފެށި ހިމާޔަތްކުރުމިގެ އިތުރުން ޓޫރިޒަމް އަދި ވައިގެ ދަތުރުފަތުރުތަކުގެ ޚިދުމަތްތައް އަދި ކަނޑުގެ މަންފާއާއި ކަނޑާއި ގުޅިފައިވާ އިޤްތިސާދީ ހަރަކާއްތަކުގެ ދާއިރާއެވެ.

ޑިވެލޮޕްމަންޓް ބޭންކުގެ ބޯޑަށް މާލީ ދައިރާގެ ތަޖުރިބާކާރުން އައްޔަންކޮށްފައިވާއިރު، މޯލްޑިވްސް އެ ބޭންކުގެ އިމާރާތް ޤާއިމްކުރުމަށް ހަމަޖެހިފައިވަނީ ޗާންދަނީ މަގާއި އަމީރު އަޙްމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގެ ތިރީ ފަންގިފިލަގައެވެ.