ޒަމާނީ ދަނޑުވެރިކަމަށް ގިނަ ފުރުސަތުތަކެއް، ސަރުކާރުގެ އެއްބާރުލުން ބޮޑު

ދަނޑުވެރިކަމަކީ ޒަމާނުއްސުރެން ދިވެހިން ކުރަމުންއައި މުހިންމު މަސައްކަތެކެވެ. ކާނާގެ ޔަޤީންކަން ކަށަވަރުކުރުމުގައިވެސް އެންމެ މުހިންމު ބަޔަކީ ދަނޑުވެރިންނެވެ.

ދަނޑުވެރިން ކުރާ ބުރަ މަސައްކަތުގެ އަގު ވަޒަންކުރުމަށާއި، ދަނޑުވެރިކަމުގެ މަސައްކަތް ރާއްޖޭގެ އިޤްތިޞާދުގައި ޙިއްސާކުރާ މިންވަރު އިތުރުކުރުމަށްޓަކައި ޒުވާނުންނާއި މަސައްކަތްކުރާ ޢުމުރުގެ މީހުން ދަނޑުވެރިކަމަށް ޝައުޤުވެރިކުރުވުމަށް ކޮންމެ އަހަރެއްގެވެސް އޮކްޓޫބަރުމަހުގެ 15ވަނަ ދުވަސް ފާހަގަކުރަނީ ދަނޑުވެރިންގެ ދުވަހުގެގޮތުގައެވެ.

ދަނޑުވެރިކަން ކުރިއެރުވުމަށް ގިނަ މަސައްކަތްތަކެއް

ދަނޑުވެރިކަމަކީވެސް ޒަމާނީ ބަދަލުތަކާއެކު ކުރިއެރުވިދާނެ ދާއިރާއެކެވެ. މިއީ ގިނަ ފުރުސަތުތަކެއްވެސް ހުރި ދާއިރާއެކެވެ. ނަމަވެސް އެކަމަށްޓަކައި ކުރަން ޖެހޭ މަސައްކަތްތައް ނުކުރެވި އޮތުމުގެ ނަތީޖާއަކަށްވީ މި ދާއިރާއަށް އަންނަން ޖެހޭ ބަދަލުތައް އެދެވޭ ދުވެއްޔެއްގައި އައިސްފައި ނުވުމެވެ.

ރާއްޖޭގެ އިޤްތިސާދު ސިންދަފާތުކޮށް، އެއް ސިނާއަތަކަށް ބަރޯސާވެފައި އޮންނަ އޮތުން ކުޑަކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މަސްވެރިކަމުގެ ސިނާއަތާއި ދަނޑުވެރިކަމުގެ ސިނާއަތް ކުރިއެރުވުމަށް ސަރުކާރުން ޚާއްސަ އިސްކަމެއް ދެއްވައެވެ.

މީގެކުރިން ދަނޑުވެރިކަމާއި މަސްވެރިކަން އެއް ވުޒާރާއެއްގެ ދަށުން ހިންގަމުން އައި ނަމަވެސް މި ސަރުކާރުންވަނީ މިއީ ވަކި ދެ ވުޒާރާއެއްގެގޮތުގައި ކަނޑައަޅާފައެވެ. މި ބަދަލާއެކު ބަޖެޓު އިތުރުވެ، ދަނޑުވެރިކަމުގެ ޕްރޮގްރާމުތައް އިތުރުކުރުމުގެ މަގުވަނީ ތަނަވަސްވެފައެވެ.

ދަނޑުވެރިކަމުގެ މަންޒަރު ދަނީ ބަދަލުވަމުން

ދިވެހިންގެ ދަނޑުވެރިކަމަށް މިހާރުވަނީ ބޮޑެތި ބަދަލުތަކެއް އަންނަންފަށާފައެވެ. ދަނޑުވެރިކަމާއި ބެހޭ ވުޒާރާއިންވެސް ފާހަގަކުރާގޮތުގައި ކޯވިޑަށްފަހު މި ދާއިރާއަށް ވަންނަ ޒުވާނުންވަނީ އިތުރުވެފައެވެ. އަދި ޒުވާނުންގެ ޝައުގުވެރިކަން ހުރީ ޒަމާނީ ދަނޑުވެރިކަމަށްކަންވެސް އެ ވުޒާރާއިން ފާހަގަކުރެއެވެ.

ބިމުގެ ފަސްގަނޑުގައި ދަނޑުވެރިކަން ކުރުމުގެ ބަދަލުގައި ޒަމާނީ ވަސީލަތްތަކާ އެކު ވަރޓިކަލް ފާމިންގެ ގިނަ ފުރުސަތުތަކެއް ރާއްޖޭގައި އެބަހުއްޓެވެ. ވަރޓިކަލް ފާމިންގ ފަދަ ޒަމާނީ ދަނޑުވެރިކަމަށް މާލީ އެހީތެރިކަމާއި ތަމްރީންތައް ބޭނުންވެއެވެ.

ޒަމާނީ ދަނޑުވެރިކަމަކަށް މަގު ކޮށައިދެނީ

ދަނޑުވެރިންނަކީ ރާއްޖޭގައި މުހިންމު ބަޔަކަށް ވީނަމަވެސް ދަނޑުވެރިންގެ ދަފްތަރެއް އެކުލަވާލެފައިނުވުމަކީ މި ދާއިރާ ކުރިއެރުވުމަށް އޮތް ވަރަށް ބޮޑު ގޮންޖެހުމެކެވެ. ސަބަބަކީ ދަނޑުވެރިންނަށް ބޭނުންވާ އެހީތެރިކަމާއި މި ދާއިރާގައި ހުރި ފުރުސަތުތައް ފަހިކޮށްދިނުމަށްވެސް ދަނޑުވެރިންގެ ދަފްތަރެއް މުހިންމުވާތީއެވެ.

ސަރުކާރުން ދަނީ ދަނޑުވެރިކަމާއި ގުޅޭގޮތުން މަޢުލޫމާތު އެއްކުރުމަށް ޤައުމީ ފެންވަރުގައި "އެގްރިކަލްޗަރ ސެންސަސް"ގެ ނަމުގައި ސަރވޭއެއް ފެށުމަށް ތައްޔާރުވަމުންނެވެ. މިދިރާސާއާއެކު ރާއްޖޭގެ ރަށްރަށުގައި ހައްދަމުންދާ ދަނޑުތަކުގެ ޢަދަދާއި އެކަމުގައި ޝާމިލުވާ ފަރާތްތަކާއި، ކުރާ ޚަރަދާއި، ލިބޭ ޢާމްދަނީގެ އިތުރުން ދަނޑުވެރިކަމުގެ ސަބަބުން އިޤްތިޞާދަށް ލިބޭ ނަފާ އެނގިގެންދާނެއެވެ.

ދަނޑުވެރިކަމުގެ ދާއިރާއިން ކުރިއަށްދާން ބޭނުންވާ ފަރާތްތަކަށް ބޭނުންވާ މާލީ އެހީތެރިކަން ފަހިކޮށްދިނުމަށް ސަރުކާރުންވަނީ "ދަނޑުވެރި މަންފާ" ގްރާންޓު ޕްރޮގްރާމެއް ކުރިއަށްގެންގޮސްފައެވެ.

ދަނޑުވެރިކަމުގެ ދާއިރާ ތަރައްޤީކުރުމަށް ބޭނުންވާ ޒަމާނީ ވަސީލަތްތައް ހޯދުމަށް އިސްލާމީ ޝަރީޢާއާ އެއްގޮތްވާ ގޮތުގެ މަތިން ފައިނޭންސިންގ ފެސިލިޓީއެއް ޤާއިމުކުރުމަށް ކަމާއި ގުޅުން ހުރި ފަރާތްތަކާއެކު މަޝްވަރާތައް މިހާރު ދަނީ ކުރެވެމުންނެވެ. މީގެއިތުރުން ޤުދުރަތީ ކާރިސާތަކުގެ ސަބަބުން ދަނޑުވެރިންނަށް ލިބޭ ގެއްލުންތަކުގެ ބަދަލު ހޯދައިދިނުމުގެ ގޮތުން އެލައިޑް އިންޝުއަރެންސުން ކްރޮޕް ތަކަފުލްގެ ނަމުގައި އައު އިންޝުއަރެންސް ސްކީމެއްވެސް ދާދިފަހުން ވަނީ ތައާރަފްކޮށްފައެވެ.