ޑިސެމްބަރުމަހުގެ 15 ވަނަ ދުވަހުން ފެށިގެން ރާއްޖޭގައި ވޭޕްކުރުން މަނާކުރަން ނިންމައިފި

ޑިސެމްބަރުމަހުގެ 15 ވަނަ ދުވަހުން ފެށިގެން ރާއްޖޭގައި ވޭޕްކުރުން މަނާކުރުމަށް ކުރަންޖެހޭ ކަންކަން ކުރުމަށް ރައީސުލްޖުމްހޫރިއްޔާ ނިންމަވައިފިއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށް ނިންމަވާފައިވާކަމަށެވެ. އަދި ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރުން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައިވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސް އޮފީހުން ވިދާޅުވާ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި މިވީ 11 މަސްދުވަހުގެ ތެރޭގައި، މަދަނީ އެކި ޖަމްޢިއްޔާ ޖަމާޢަތްތަކުންނާއި، ޞިއްޙީ އަދި އިޖްތިމާޢީ ކަންކަމުގައި ރައްޔިތުން ހޭލުންތެރިކުރަން މަސައްކަތްކުރާ ފަރާތްތަކުން ވޭޕްކުރުމުގެ ނުރައްކައުތެރިކަން މުޖްމަތަޢުގައި ފެތުރެމުން އަންނަ މިންވަރާމެދު ފައުޅުކުރަމުން ދިޔަ ކަންބޮޑުވުންތަކާމެދު ވަނީ ވަރަށް ސީރިއަސްކަމާއެކު ވިސްނަވަން ފަށްޓަވާފައެވެ. އަދި ވޭޕްކުރުން ހުއްޓުވުމަށްއެދި މިފަދަ އެކި ޖަމާޢަތްތަކުން މި ވޭތުވި ދެތިން މަސްދުވަހުގެ ތެރޭ ރައީސުލްޖުމްހޫރިއްޔާގެ އަރިހަށް ހުށަހެޅުއްވި އިލްތިމާސްތަކަށް އެމަނިކުފާނު ޚާއްޞަ ސަމާލުކަމެއް ދެއްވިކަމަށްވެސް ރައީސް އޮފީހުން ވިދާޅުވެއެވެ.

ރައީސް އޮފީހުން ވިދާޅުވީ ސަރުކާރުގެ އިދާރާތަކާ އަމިއްލަ ފަރާތްތަކުން ލިބިވަޑައިގަތް މަޢުލޫމާތުގެ އަލީގައި، ވޭޕްގެ ނުރައްކަލުން ދިވެހި މުޖްތަމަޢު ސަލާމަތްކުރުމަށް އަޅުއްވަންވީ ފިޔަވަޅުތައް ދިރާސާކުރެއްވުމަށް ވަޒީރުންގެ މަޖިލީހުގެ ސަބްކޮމިޓީއެއް އުފައްދަވައި، ފުޅާ ދާއިރާއެއްގައި ރައީސުލްޖުމްހޫރިއްޔާ ވަނީ މަޝްވަރާކުރައްވާފައެވެ. އަދި ވޭޕްކުރުން ރާއްޖޭގައި މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ، ދިވެހިރާއްޖޭގެ މިއަދާއި މުސްތަޤްބަލް ސަލާމަތްކުރެއްވުމަށް ނިންމެވި ވަރަށް ސީރިއަސް ނިންމެވުމެއްކަމަށްވެސް ރައީސް އޮފީހުން ވިދާޅުވެއެވެ.

މީގެއިތުރުން ސްކޫލް މާޙައުލުގައި އެތައް ދަރިވަރަކު މަގުގެއްލިގެން ދިއުމުން ސަލާމަތްވެ، އަޚްލާޤީގޮތުން ނޭދެވޭ އެތައްކަމެއް ސްކޫލް މާޙައުލުގައި ހިނގުން ހުއްޓުވުމަށް ރައީސްގެ ނިންމެވުމުގެ ސަބަބުން މަގުފަހިވެ، އެތައް ބެލެނިވެރީންނެއްގެ ކަންބޮޑުވުމަށް ޙައްލު ހޯދޭނެކަމަށްވެސް ސަރުކާރުން ޤަބޫލުކުރައްވައެވެ. އަދި މަސްތުވާތަކެތީގެ ވިޔަފާރިކުރުމާ، މަސްތުވާތަކެތި ޢާއްމުކުރުމަށް ކުރާ ކަންކަމަށް ރައީސްގެ މި ނިންމެވުމުގެ ސަބަބުން ބޮޑު ހުއްޓުމެއް އަންނާނެކަމަށާއި މަސްތުވާތަކެތީގެ ވަބާއިން މުޖްމަތަމަޢު ސަލާމަތްކުރުމަށް ހަރުދަނާ ފިޔަވަޅަކަށް މިކަން ވާނެކަމަށްވެސް ސަރުކާރުން ދެކެވަޑައިގަންނަވައެވެ.

ވޭޕްކުރުން ދިވެހިރާއްޖޭގައި ހުއްޓައިލުމުގެ ނަތީޖާއަކަށް ވާނީ، ދުޅަހެޔޮ އަޚްލާޤް ރަނގަޅު އުޅުންހުރި ޖީލެއް ބިނާވުމަށް މަގުފަހިވުމުގެ އިތުރުން ރަނގަޅު މުސްތަޤްބަލެއް ދަރީންނަށް ހޯދައިދިނުމަށް ބެލެނިވެރީން ކުރާ އުންމީދުތަކަށްވެސް މިކަމުގެ ސަބަބުން މަގުފަހިވެގެންދާނެކަމަށް ސަރުކާރުން ވިދާޅުވެއެވެ.

ރާއްޖޭގައި ވޭޕްކުރުން މަނާކުރުމަށް ސަރުކާރުން ނިންމަވާފައިވާއިރު ރާއްޖޭގައި ވޭޕާއި ދުންފަތުގެ ބާވަތްތައް މަނާކުރުމަށް ރާއްޖޭގެ ޑޮކްޓަރުންގެ ޖަމްޢިއްޔާ، މޯލްޑިވިއަން މެޑިކަލް އެސޯސިއޭޝަނާއި ޤައުމީ ކުޅިވަރު ޖަމްޢިއްޔާތަކުންވެސް ވެސް ވަނީ ގޮވާލާފައެވެ. މިގޮތުން ދުންފަތުގައި ހިމެނޭ 250 މާއްދާއާއި ވިހައިގެ ތެރެއިން، 70 މާއްދާއަކީ، ކެންސަރަށް މަގުފައިވާ މާއްދާކަމަށް އެ ޖަމްޢިއްޔާއިން ބުނެއެވެ. އަދި ދުންފަތުގެ ބޭނުން ނުކުރާ ފަރާތްތަކަށްވެސް، ދުމުގެ އަސަރުކޮށް ކުޑަކުދިންނަށް ނޭވާހިއްލުމާއި ފުއްޕާމޭގައި ޖަރާސީމު އަށަގަތުމާއި ލޭގެ ކެންސަރު ފަދަ މައްސަލަތައް ދިމާވާކަން އެ ޖަމްޢިއްޔާއިން ފާހަގަކުރެއެވެ. މީގެއިތުރުން ދިވެހި ކުޅުންތެރިންނާއި ތަމްރީންދޭ މީހުންގެ މެދުގައި ވޭޕް އަދި އީ-ސިނގިރޭޓް ބޭނުންކުރާ މިންވަރު އިތުރުވަމުން އަންނަކަމަށްބުނެ ޤައުމީ ކުޅިވަރު ޖަމްޢިއްޔާތަކުންވެސް ވަނީ ކަންބޮޑުވުން ފާޅުކޮށްފައެވެ.