ރާއްޖޭގައި އިންޓަރނެޓް މެދުވެރިކޮށް ހިންގާ ކުށްތައް އަންނަނީ އިތުރުވަމުން، ރައްކާތެރިވޭ!

ރާއްޖޭގައި އިންޓަރނެޓް މެދުވެރިކޮށް ހިންގާ ކުށްތައް ނުވަތަ ސައިބަރ ކްރައިމްތައް ވަރަށް ގިނަ ކަމަށާއި ކުރިޔަށް އޮތް ތަނުގައިވެސް އެ ކުށްތައް އިތުރުވާނެ ކަމަށް ލަފާ ކުރެވޭ ކަމަށް ފުލުހުން ވިދާޅުވެއްޖެއެވެ. އިންޓަރނެޓް މެދުވެރިކޮށް ހިންގާ ކުށްތަކުގެ ތެރެއިން 4 ވައްތަރެއްގެ ކުށް ގިނަ އަދަދަކަށް ހުށައަޅާކަމަށް ފުލުހުން ވިދާޅުވެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޗީފް އިންސްޕެކްޓާ އޮފް ޕޮލިސް، ރައޫފުއްދީން ސައީދު ވިދާޅުވީ އިންޓަރނެޓް މެދުވެރިކޮށް ހިންގާ ކުށްތައް ދުވަހެއް ދުވަހަކަށް އިތުރުވަމުން އަންނަކަމަށާއި އޭގެތެރެއިން ސޯޝަލް މީޑިއާ ބޭނުންކޮށްގެން މީސްމީހުންގެ އަތުން އޮޅުވާލައިގެން ފައިސާ ހޯދާ މައްސަލަތައް މި އަހަރުގެ ތެރޭގައި ވަރަށް ބޮޑަށް އިތުރުވެފައިވާ ކަމަށެވެ.
އޭނާ ވިދާޅުވީ މިފަދަ ކުށްތަކަށް އަރައިގަންނަނީ ޓެކްނޮލޮޖީގެ އެހީގައި އެކި ދުވަސްވަރު އެކި އުކުޅުތައް ބޭނުންކޮށްގެނެވެ.

"އެކިއެކި ޓެކްނިކްސް ބޭނުންކޮށްގެން ހިންގާ ސައިބަ ކްރައިމްސް ދަނީ ދުވަހަކަށްވުރެ ދުވަހެއް އިތުރުވަމުން. އޭގެ އިތުރަށް ޓެކްނިކަލީ މިކުރާ ގޮތް ވެސް ކުރިން ކުރި ގޮތަށްވުރެ ތަންކޮޅެއް ކޮމްޕްލެކްސްކޮށް ފަހުން މި ކުރަނީ. ކުރާ ގޮތް ވެސް އެބަ ބަދަލުވޭ. އެ ހިންގާ މިންވަރު ވެސް ދަނީ އިތުރުވަމުން" ޗީފް އިންސްޕެކްޓާ އޮފް ޕޮލިސް، ރައޫފުއްދީން ސައީދު ވިދާޅުވިއެވެ.

އެންމެ ގިނައިން ފުލުހުންނަށް ހުށަހެޅޭ ސައިބަ ކްރައިމްގެ މައްސަލަތަކުގެ ތެރޭގައި ޖިންސީ ކުށުގެ މައްސަލަތަކާއި މަކަރާ ހީލަތުގެ މައްސަލަތަކާއި ފައިސާ ގެއްލުމުގެ މައްސަލަތަކާއި ބިރުދެއްކުމުގެ މައްސަލަތައް ހިމެނެއެވެ.

ރައޫފުއްދީން ވިދާޅުވީ މިފަދަ މައްސަލައެއް ދިމާވުމުން ވީހާވެސް އަވަހަކަށް ފުލުހުންނަށް އެ ކަމެއް ރިޕޯޓު ކުރުމަކީ ވަރަށް މުހިންމު ކަމެއް ކަމަށެވެ. އިންޓަރނެޓް މެދުވެރިކޮށް ހިންގާ ކުށްތަކުގެ މައްސަލަތަކުގެ ހެއްކަކީ ވެސް ވަރަށް ތަފާތު އެއްޗެއްކަން ފާހަގަކުރައްވައި އޭނާ ވަނީ، އެ ފަދަ މައްސަލަތައް ރިޕޯޓު ކުރައްވާއިރު، ހެއްކާއެކު ހުށަހެޅުމަށް އެދިވަޑައިގެންފައެވެ.

"ޓެކްނޮލޮޖީ ބޭނުންކުރާއިރު ރަނގަޅު ގޮތް ފުރަތަމަ ދަސްކުރަން ވެސް އެބަޖެހޭ. އަދި އޭގެ އިތުރުން ރައްކާތެރިކަމުގެ ފިޔަވަޅުތައް ވެސް އަޅަން އެބަ ޖެހޭ" ޗީފް އިންސްޕެކްޓާ އޮފް ޕޮލިސް، ރައޫފުއްދީން ސައީދު ވިދާޅުވިއެވެ.

އިންޓަރނެޓް މެދުވެރިކޮށް ހިންގާ ކުށްތައް ގުޅޭ ތިން ބިލެއް ރައްޔިތުންގެ މަޖިލީހަށް ވަނީ ހުށައަޅާފައެވެ. އެގޮތުން ގާނޫނުލް އުގޫބާތަށް ގެންނަ ބަދަލުތަކެއްގެ ތެރެއަށް އިންޓަރނެޓް މެދުވެރިކޮށް ހިންގާ ކުށްތަކުގެ މައްސަލަތައް އިތުރުކޮށް އަދި ޖިނާއީ އިޖުރާއަތުގެ ގާނޫނަށް ބަދަލު ގެނައުމަށް ވެސް ހުށަހަޅާފައިވާ ކަމަށް ރައޫފުއްދީން ސައީދު ވިދާޅުވިއެވެ.

މީގެއިތުރުން ސާވިސް ޕްރޮވައިޑަރުންގެ ފަރާތުން މައުލޫމާތުހޯދުމާއި، ރާއްޖެއިން ބޭރުން މައުލޫމާތު ހޯދުމާއި، އެވިޑެންސް ކަލެކްޓުކުރުން އަދި މިކަހަލަ އެތައް ކަމެއްގައި ފުލުހުންނަށް އެއްބާރުލުން ދިނުމާ ގުޅޭގޮތުން ބިލުގައި ހިމަނާފައިވާނެ ކަމަށް ވިދާޅުވިއެވެ. މިހާރު ރާއްޖޭގެ އިންޓަރނެޓް މެދުވެރިކޮށް ހިންގާ ކުށުގެ ހާލަތު އޮތްގޮތުން، އެންމެ މަހެއްގައި ކޮށްލާ މަސައްކަތުން އެކަމަށް އެކަށީގެންވާ ގޮތެއްގައި ހޭލުންތެރި ނުކުރެވޭނެ ކަމަށާއި އަދި މިފަދަ ކުށްތައް ހުއްޓުވުމަށް ފަރުދީ ގޮތުންނާއި ގައުމީ ފެންވަރުގައި މަސައްކަތްތަކެއް ކުރަން ޖެހޭ ކަމަށްވެސް އޭނާ ވިދާޅުވިއެވެ.

އޮކްޓޫބަރު މަހަކީ އިންޓަނެޓު މެދުވެރިކޮށް ހިންގާ ކުށްތަކަށް ހޭލުންތެރިކަން އިތުރުކުރުމުގެ ބައިނަލްއަގުވާމީ މަހުގެ ގޮތުގައި ފާހަގަކުރާ މަހެވެ. މިމަހުގައި ހޭލުންތެރިކަން އިތުރުކުރުމަށްހަރަކާތްތަކެއް ކުރިއަށް ގެންދިޔުމަށް ނިންމާފައިވާއިރު ސްކޫލުތަކުގެ މުދައްރިސުންނާއި ދަރިވަރުންނާއި ބެލެނިވެރިންނަށް އަމާޒުކޮށްގެން ވެސް ހޭލުންތެރިކުރުވުމުގެ މިފަދަ ގިނަ ޕްރޮގްރާމުތަކެއް މީގެ ކުރިންވެސް ވަނީ ކުރިއަށް ގެންގޮސްފައެވެ.