ސީޕީގެ އިރުޝާދު ފުލުުހުންނަށް، ރައްޔިތަކު ކަމަކު އައިސްފިނަމަ މާޔޫސްނުކުރާތި!
-
ރައްޔިތުންނާ ގާތުން ފުލުހުންގެ ޚިދުމަތް ފޯރުކޮށްދިނުމަށް އިލްތިމާސްކުރެއްވި
-
ރަށްރަށުގެ ތަރައްގީގައިވެސް ފުލުހުންގެ ދައުރު މުހިންމު
އެއްވެސް ރައްޔިތަކު އެއްވެސް ކަމެއްގައި ފުލުހެއް ކައިރިއަށް އައިސްފިނަމަ މާޔޫސް ނުކުރުމަށް ކޮމިޝަނަރ އޮފް ޕޮލިސް، އަލީ ޝުޖާޢު ފުލުހުންނަށް އިލްތިމާސްކުރައްވައިފިއެވެ. ކޮމިޝަނަރ އޮފް ޕޮލިސް ފުލުހުންނަށް މިގޮތަށް އިލްތިމާސްކުރައްވާފައިވަނީ ހއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅުގެ ބައެއް ރަށްރަށުގައި މަސައްކަތްކުރާ ފުލުހުންނާ ބައްދަލުކުރައްވައެވެ.
ކޮމިޝަނަރ އޮފް ޕޮލިސް ޢަލީ ޝުޖާޢު ހއ.ގެ ރަށްރަށް ކުރައްވާ ދަތުރުފުޅުގައި ވަނީ ދިއްދޫ، ކެލާ އަދި އުތީމުގެ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި އެ ރަށްރަށުގައި މަސައްކަތް ކުރާ ފުލުހުންނާ ބައްދަލުކުރައްވާފައެވެ.
މިގޮތުން ފުލުހުންނާއެކު ކުރިއަށްގެންދިޔަ ބައްދަލުވުންތަކުގައި ކޮމިޝަނަރ އޮފް ޕޮލިސް، އަލީ ޝުޖާޢު ވަނީ ރައްޔިތުންނާ ބައްދަލުކޮށް ރައްޔިތުންގެ ކަންބޮޑުވުންތައް އޮޅުންފިލުވައި ރައްޔިތުންނާ ގާތުން ފުލުހުންގެ ޚިދުމަތް ފޯރުކޮށްދިނުމަށް އިލްތިމާސްކުރައްވާފައެވެ. އަދި އެއްވެސް ރައްޔިތަކު ބޭނުމެއް ޖެހިގެން ފުލުހުން ކައިރިއަށް އައިސްފިނަމަ މާޔޫސްކޮށްނުލުމަށް ވަނީ އިލްތިމާސްކުރައްވާފައެވެ.
ކޮމިޝަނަރ ވަނީ ރަށްރަށުގެ ތަރައްގީގައިވެސް ފުލުހުންގެ ދައުރު މުހިންމުކަން ފާހަގަކުރައްވާފައެވެ.
ކޮމިޝަނަރ އޮފް ޕޮލިސް ހއ. އަތޮޅަށް ކުރައްވަމުން ގެންދަވާ މި ދަތުރުފުޅުގައި ވަނީ ރަށްރަށުގެ ކުށުގެ ހާލަތު ބައްލަވައި ރައްޔިތުންގެ ހުރި ކަންބޮޑުވުންތައް ދެނެގަނެ އެކަންކަން ހައްލުކުރުމަށް ފުލުހުންނާ ގުޅިގެން ކުރެވެންހުރި ކަންކަމާމެދު މަޝްވަރާކުރައްވާފައެވެ. އަދި ކުށްމަދުކޮށް ރައްޔިތުންގެ ސަލާމަތާއި ރައްކާތެރިކަމަށް މަސައްކަތްކުރުމަށާއި ރައްޔިތުންނާ ގުޅިގެން މަސައްކަތްކުރުމާ ގުޅޭގޮތުންވެސް މަޝްވަރާކުރައްވާފައިވެއެވެ.
މި މަހު 7 އަށް ކުރިއަށްގެންދާ މި ދަތުރުފުޅުގައި ހއ. ދިއްދޫ، ކެލާ، އުތީމުގެ އިތުރުން ބާރަށް، ފިއްލަދޫ، ތަކަންދޫ، މާރަންދޫ، ހޯރަފުށި، ތުރާކުނު، އުލިގަން އަދި އިހަވަންދުއަށް ސީޕީ ވަޑައިގަންނަވާނެއެވެ. މި ދަތުރުފުޅުގައި ސީޕީގެ އަރިހުގައި ފުލުހުންގެ އިސް ބޭފުޅުން ބައިވެރިވެވަޑައިގަންނަވައެވެ.
މިއީ ރަށްރަށުގެ ކުށުގެ ހާލަތާއި ރައްޔިތުންގެ ކަންބޮޑުވުންތައް ދެނެގަނެ، އެކަންކަން ހައްލުކުރުމަށް ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރެއްވުމަށް ކުރިއަށްގެންދާ ހަރަކާތެއް ކަމަށް ދިވެހި ފުލުހުންގެ ޚިދުމަތުން ވިދާޅުވެއެވެ.