މުޅި މާލޭގައި ފުލުހުންގެ ހަރަކާތްތެރިވުން އިތުކުރަނީ، ކޮންމެ 5 މިނެޓަކުން ފުލުހަކު ފެންނާނެ

ފުލުހުންގެ ހަރަކާތް އިތުރުކުރުމަށް މިހާރު ފަށާފައިވާ މަސައްކަތަކީ ވަކި ދުވަސްވަރަކަށް ކުރިއަށްގެންދާ މަސައްކަތެއް ނޫންކަމަށާއި، މިއީ ހުއްޓާލާނެ މަސައްކަތެއް ނޫންކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

މާލެއާއި އަތޮޅުތަކުގައި ފުލުހުން ފަށާފައިވާ ޚާއްސަ އޮޕަރޭޝަނާއި ގުޅޭގޮތުން ކޮމިޝަނަރ އޮފް ޕޮލިސް ޢަލީ ޝުޖާއު ދެއްވި ބަސްދީގަތުމެއްގައި ވިދާޅުވީ ސީނިއާ ފުލުހުން ހިމެނޭގޮތަށް، މުޅި ރާއްޖޭގަވެސް ފްރަންޓްލައިންގައި ހަރަކާތްތެރިވާ ފުލުހުން އިތުރުކޮށް ފުލުހުންގެ ހަރަކާތްތެރިވުން މިހާރަށްވުރެ އިތުރުކުރުމަށް ފުލުހުންގެ ސީނިއަރ މެނޭޖްމަންޓުން ގިނަ ނިންމުންތަކެއް ނިންމަވާފައިވާކަމަށެވެ.

އެގޮތުން މިވަގުތުވެސް 360 ފުލުހުން ތަމްރީންކޮށް ޚިދުމަތަށް ނެރުމުގެ މަސައްކަތް ކުރަމުންދާކަމަށް ސީޕީ ވިދާޅުވިއެވެ.

ސީޕީ ވިދާޅުވީ މާލެ ސަރަޙައްދުގައި ހިނގާ އެކްސިޑެންޓްތައް އިތުރުވަމުން ދިއުމާގުޅިގެން މާލެ ސަރަޙައްދު ބެލެހެއްޓުމުގައި ޚާއްސަ ސިޔާސަތުތަކެއް ކަނޑައަޅާ ތަންފިޒުކުރަން ފަށާފައިވާކަމަށެވެ.

އެގޮތުން މަގުތައް ބެލެހެއްޓުމަށް މަގުތަކަށް ފުލުހުން ނިކުންނަ މިންވަރާ ހަރަކާތްތެރިވުން އިތުރުކުރުމުގެ ސަބަބުން، ރައްޔިތު މީހާ މަގުމައްޗަށް ނުކުމެ ދަތުރު ކުރަން ފަށައި ފަސް މިނިޓް ހޭދަވެގެންދާއިރު މަގުމަތިން ފުލުހަކު ފެންނަ މިންވަރަށް ފުލުހުންގެ ޕްރެސެންސް އިތުރުކުރަމުންދާކަމަށެވެ. އެކަން ހާސިލުކުރުމަށް މިހާރު ގިނަ މަސައްކަތްތަކެއް ކުރަމުންދާއިރު، މިހާރު ޓްރޭނިންގ ހަދަމުންދާ ފުލުހުން ޓްރޭނިންއަށްފަހު ޚިދުމަތަށް ނިކުތުމުން މި މަޤުސަދު ހާސިލްވާނެކަމަށް ސީޕީ ޢަލީ ޝުޖާއު ވިދާޅުވިއެވެ.

މިހާރު މަގުތަކުގައި ބާރުބޮޑުވާ ގަޑިތަކުގައި މާލޭގެ 21 ސަރަޙައްދެއްގައި ފުލުހުން ހަރަކާތްތެރިވަމުން ގެންދާކަން ސިޕީ ފާހަގަކުރެއްވިއެވެ.

މި މަސައްކަތްތައް މޮނިޓަރކޮށް ވިލަރެސް ކުރުމަށް ޒަމާނީ ކޮމިއުނިކޭޝަން ސެންޓަރެއް މާލެ އަދި ހުޅުމާލޭގައި މިހާރު ވަނީ ޤާއިމުކޮށްފައެވެ. ސީނިއާ ފުލުހުން މި ސެންޓަރުގައި 24 ގަޑިއިރު ޑިއުޓީ ކުރަމުން ގެންދާކަމަށް ސީޕީ ޢަލީ ޝުޖާއު ވިދާޅުވިއެވެ. މުޅި މާލޭގެ ސީސީޓީވީ ނިޒާމް މަރުކަޒީކޮށް، ކޮންޓްރޯލްކޮށް މޮނިޓަރ ކުރަމުން ގެންދާނީ މި ސެންޓަރުގައެވެ.

ފުލުހުން ހަރަކާތެރިވަމުންދާ ސީދާ ސަރަހައްދު އެ ސެންޓަރުން ވަގުތުން ބަލައިލެވޭނެއެވެ. އަދި ފުލުހުންގެ މަސައްކަތްތަކަށް ބޭނުންވާ މައުލޫމާތު ޓެކްނޮލޮޖީގެ އެހީގައި އެ ސެންޓަރުން ވަގުތުން އެއްކޮށް ވަގުތުން އެނަލައިޒްކުރަމުންދާނެއެވެ.

މީގެއިތުރުން ގޭންގު ކުށްތައް ހުއްޓުވުމަށް ޤާއިމުކުރި ވިންގާއެކު، މާލެއާއި ހުޅުމާލޭގައި ގޭންގުތައް ހަރަކާތްތެރިވާ ސަރަޙައްދުތައް، އެކަމަށް ޚާއްސަ ފުލުހުން ޤަވައިދުން ބަލަހައްޓަމުންދެއެވެ. އަދި ގޭންގު ކުށްތަކާ ދެކޮޅަށް ގިނަ މަސައްކަތްތަކެއް ކުރިއަށްގެންގޮސް ކުރިއެރުންތައް ހޯދަމުންދާކަމަށް ސީޕީ ވިދާޅުވިއެވެ.

ހަމައެހެންމެ ސްކޫލްތައް ކައިރީ ސީނިއާ ފުލުހުން ހަރަކާތްތެރިވާގޮތަށް ފެށި މަސައްކަތް މިހާރުވެސް އެގޮތުގައި ކުރިއަށްދާކަމަށް ސީޕީ ވިދާޅުވިއެވެ.

މާލެއެކޭ އެއްގޮތަށް އަތޮޅުތަކުގައިވެސް ފުލުހުންގެ ޚިދުމަތްތައް ފުޅާކޮށް ހަރަކާތްތެރިވުން އިތުރުކުރުމަށް ދަނީ ގިނަ މަސައްކަތްތަކެއް ކުރަމުންނެވެ.

ސީޕީ އަލީ ޝުޖާއު ވިދާޅުވީ، ރައްކާތެރިކަން ކަށަވަރުކުރުމަށް ކުރާ މަސައްކަތުގައި ފުލުހުންގެ ބައިވެރިވުން އިތުރުކޮށް، ރައްޔިތުންނަށް ރައްކާތެރިކަމުގެ އިޙުސާސުކޮށްދިނުމަކީ މިހާރު ކުރަމުންދާ މަސައްކަތްތަކުން ފުލުހުންގެ ޚިދުމަތުން ނެރެން ބޭނުންވާ އެންމެ މުހިންމު ނަތީޖާކަމަށެވެ. މިހާރު ފަށާފައިވާ މަސައްކަތްތަކުގެ ހެޔޮ ނަތީޖާ ފެނި، އަމާންކަމާ ރައްކާތެރިކަން ކަށަވަރު މުޖުތަމަޢުއެއް ބިނާކުރާނެކަމުގެ ޔަޤީންކަން ސީޕީގެ މެސެޖުގައި ވަނީ ދެއްވާފައެވެ.