ސުޕްރީމް ކޯޓުގެ އަހަރީ ދުވަހާ ގުޅުވައިގެން އާންމުނަށް ކޯޓު ހުޅުވާލަނީ

ދިވެހިރާއްޖޭގެ ސުޕްރީމް ކޯޓުގެ އަހަރީ ދުވަހާ ގުޅުވައިގެން މި މަހުގެ 22 ވަނަ ދުވަހު އެ ކޯޓު އާންމުކޮށް ހުޅުވާލަން ނިންމައިފިއެވެ.

ސުޕްރީމް ކޯޓުން ވިދާޅުވީ، އެ ކޯޓަށް 16 އަހަރު ފުރުމާ ގުޅިގެން މި މަހުގެ 22 ވާ އާދީއްތަ ދުވަހުގެ މެންދުރު 12:00 ގައި އާންމު ފަރާތްތަކަށް ކޯޓު ހުޅުވާލެވޭނެ ކަމަށެވެ. މިގޮތަށް ހުޅުވާލުމުން ކޯޓަށް ޒިޔާރަތްކޮށް، ކޯޓާ ގުޅޭ ކަންކަން ބަލާލެވޭނެ ކަމަށްވެސް އެ ކޯޓުން ވިދާޅުވެއެވެ.

މި އޯޕަންޑޭގައި ބައިވެރިވާން ބޭނުންވާ ފަރާތްތަކުން 7258392 އަށް ގުޅައިގެން ނުވަތަ ފޯމު މެދުވެރިކޮށް އޮންލައިންކޮށް މި މަހުގެ 19 ވަނަ ދުވަހުގެ މެންދުރު 13:30 ގެ ކުރިން ރަޖިސްޓްރީވުމުގެ ފުރުސަތު ވަނީ ހުޅުވާލާފައެވެ.

ދިވެހިރާއްޖޭގެ ސުޕްރީމް ކޯޓުގެ އޯޕަންޑޭ ހަރަކާތުގައި ބައިވެރިވުމުގެ ދައުވަތު އަރުވަމެވެ.
ރަޖިސްޓްރީ ކުރެއްވުމަށް: https://t.co/ZmzS04KkL1 pic.twitter.com/CLXR2oJClj

— Supreme Court of the Maldives (@SCMaldives) September 16, 2024

މި ހަރަކާތުގައި ބައިވެރިވުމަށް ބޭނުންވަނީ ފުރިހަމަ ނަމާއި އައިޑީ ކާޑު ނަންބަރު އަދި ގުޅޭނެ ފޯން ނަންބަރެވެ.

ދިވެހި ތާރީޚުގައި ސުޕްރީމް ކޯޓެއް ފުރަތަމަ ފަހަރަށް ޤާއިމު ކުރެވުނީ 18 ސެޕްޓެންބަރު 2008 ވަނަ ދުވަހުއެވެ.