އެމްޑަބްލިއުއެސްސީން ރާއްޖޭގައި ހިންގަމުންދާ މަޝްރޫޢުތަކުގެ މަސައްކަތް ހަލުވިކުރުމަށްޓަކާ އިތުރުވެހިކަލްތަކެއް އެކުންފުންޏަށް ގެނެސްފިއެވެ.
މިއަދު އެމްޑަބްލިއުއެސްސީގައި ބޭއްވި ރަސްމިއްޔާތެއްގައި ވަނީ އެކުންފުނީގެ މަސައްކަތްތަކަށް އަލަށް ގެނައި 4 އެކްސްކަވޭޓަރާ، ކެރޭނެއް ދައްކާލާފައެވެ. މިރަސްމިއްޔާތުގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިންގ ޑިރެކްޓަރ އިބްރާހީމްފަޒުލް ރަޝީދު ވިދާޅުވީ އެކުންފުނިން މިހާރުވެސް ފަންސަވީސް ޕްރޮޖެކްޓެއްގެ މަސައްކަތް އެކި ސަރަހައްދުތަކުގައި ހިންގަމުންދާކަމަށެވެ. އަދި މި ޕްރޮޖެކްޓްތަކުގެ އިތުރުންވެސް 9 ޕްރޮޖެކްޓެއްގެ އަމަލީ މަސައްކަތް ފެށުމުގެ މަރުހަލާގައިވާކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ފަޒުލް ވިދާޅުވިއެވެ.
img:http://s1.psmnews.mv/images/660x400/14647993479852.jpg|އެމްޑަބްލިޔުއެސްސީއަށް އަލަށް ގެނައި ވެހިކަލްތައް ދައްކާލުމަށް ބޭއްވި ރަސްމިއްޔާތުގެ ތެރެއިން- ފޮޓޯ: ޕީއެސްއެމް ނިއުސް
އަލަށްގެނެވުނު މި ވެހިކަލްތަކުގެ ސަބަބުން މަސައްކަތްތައް ހަރުދަނާ ގޮތެއްގައި ކުރިޔަށްގެންދިއުމަށް މަގުފަހިވެގެންދާނެކަން ފަޒުލް ފާހަގަކުރެއްވިއެވެ.
އެމްޑަބްލިއުއެސްސީއަށް ލޭންޑިންގކްރާފްޓެއް ގެނައުމުގެ އެއްބަސްވުމުގައި ފެބުރުއަރީ މަހުގައި ވަނީ ސޮއިކުރައްވާފައެވެ. އަދި މިލޭންޑިންގ ކްރާފްޓް މިއަހަރުގެ ތެރޭގައި ގެނެވޭނެކަމަށް އެމްޑަބްލިއުއެސްސީން މަޢުލޫމާތުދެއްވައެވެ.