ހުޅުމާލޭގައި ކާރެއް ކޮންޓްރޯލްނުވެ ހިނގި އެކްސިޑެންޓްގައި ތުހުމަތުކުރެވޭ މީހުންނަށް ދައުވާކުރަނީ
-
މި އެކްސިޑެންޓް ހިނގީ ޖުލައި 31 ވަނަ ދުވަހު
-
3 މީހުންނަށް ދައުވާ ކުރަން ވަނީ ހުށައަޅާފައި
މިދިޔަ ޖުލައިމަހުގެ 31 ވަނަ ދުވަހު ހުޅުމާލެ ދެވަނަ ފިޔަވަހީގައި ހިނގި ނުރައްކާތެރި އެކްސިޑެންޓުގައި ތުހުމަތުކުރެވޭ މީހުންނަށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ދިވެހި ފުލުހުންގެ ޚިދުމަތުން ވިދާޅުވީ، މި މައްސަލަ ޕްރޮސެކިއުޓަރ ޖެނެރަލްގެ އޮފީހުން މިއަދު ބަލައިގެންފައިވާކަމަށެވެ.
މި އެކްސިޑެންޓާއި ގުޅިގެން 3 މީހަކު ވަނީ ފުލުހުން ހައްޔަރުކޮށްފައެވެ. އޭގެ ތެރޭގައި ހިމެނެނީ ހ. ނޫރަންމާގެއާގެ އިކްރާމުއްރަހްމާންއާއި، މ.ލޭންޑް އޮފް ގާރޑްން އިބްރާހިމް އިކްރާމްގެ އިތުރުން ގއ.ކަނޑުހުޅުދޫ، އާޒާދުގެ ޖިނާހް އިސްމާޢިލްއެވެ.
ހުޅުމާލެ ދެވަނަ ފިޔަވަހީގައި ހިނގި ނުރައްކާތެރި އެކްސިޑެންޓުގައި ކާރު ކޮންޓްރޯލްނުވެ ގޮސް ޖެހިފައިވަނީ މަގުމަތީގައި ޕާކުކޮށްގެން މީހަކު އިން ސައިކަލެއްގައެވެ. އެ އެކްސިޑެންޓުގައި ސައިކަލުގައި އިން މީހާއަށް ވަނީ ބޮޑެތި ހާނީއްކަތަކެއްވެފައެވެ.