ހުޅުމާލޭގައި ގަވާއިދާ ޚިލާފަށް ބަހައްޓާފައި ހުރި ވެހިކަލްތައް އެހެން ތަނަކަށް ބަދަލުކުރަނީ

ހުޅުމާލޭގައި ގަވާއިދާ ޚިލާފަށް ދިގު މުއްދަތަކަށް ބަހައްޓާފައިވާ އުޅަނދުފަހަރު ޓޯކުރުމާއި، އެހެން ސަރަޙައްދަކަށް ބަދަލުކުރުމުގެ މަސައްކަތް މާދަމާއިން ފެށިގެން ކުރިއަށް ގެންދިއުމަށް ނިންމާފައިވާކަމަށް ފުލުހުން ޚިދުމަތުން ވިދާޅުވެއްޖެއެވެ.

މި މަސައްކަތަކީ ހުޅުމާލޭގެ މަގުތަކާއި ސަރަޙައްދުތަކުގައި ހިނގާބިނގާވެ އުޅުމަށް ފަސޭހަކުރުމަށާއި، އާންމު ދިރިއުޅުމުގެ މާހައުލު އިތުރަށް ރަނގަޅުކުރުމަށް އަމާޒުކޮށްގެން ކުރިއަށް ގެންދާ މަސައްކަތެކެވެ.

ދިވެހި ފުލުހުންގެ ޚިދުމަތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ހުޅުމާލޭގެ މަގުތަކާއި ގޯޅިތަކުގައި ގަވާއިދާ ޚިލާފަށް ދިގު މުއްދަތަކަށް ބަހައްޓާފައިވާ އުޅަނދުފަހަރު އެހެން ސަރަހައްދަކަށް ބަދަލުކުރުމާއި، އަދި ޓޯވ ކުރުމުގެ މަސައްކަތް ފެށުމަށް ނިންމާފައިވާކަމަށެވެ. މިމަސައްކަތަކީ ދިވެހި ފުލުހުންގެ ޚިދުމަތާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ދަތުރު ފަތުރާއި މަދަނީ އުދުހުންތަކާއި ބެހޭ ވުޒާރާ ގުޅިގެން ކުރިއަށް ގެންދިއުމަށް ހަމަޖެހިފައިވާ މަސައްކަތެކެވެ. މި މަސައްކަތް ފެށުމަށް ހަމަޖެހިފައިވަނީ މާދަމާގެ ހެނދުނު 8:00ގައި ކަމަށް ފުލުހުން ޚިދުމަތުން ވިދާޅުވެއެވެ.

ހުޅުމާލޭގެ މަގުތަކާއި ގޯޅިތަކުގައި ގަވާއިދާ ހިލާފަށް، ގިނަ ދުވަސް ވަންދެން ބަހައްޓާފައިހުރި އުޅަނދުތައް އެހެން ސަރަހައްދަކަށް ބަދަލު ކުރުމާއި ޓޯވ ކުރުމާ ގުޅޭ pic.twitter.com/Gx1RkecYuh

— Maldives Police (@PoliceMv) September 13, 2024

އެޗްޑީސީން މިފަހުން ވަނީ ހުޅުމާލެ ސަހަރާ ކުރިމަތީ އޮތް 90،000 އަކަފޫޓުގެ ބިމެއް ފުލުހުންނާއި ޓްރާންސްޕޯޓް މިނިސްޓްރީގެ ބޭނުމަށް ދޫކޮށްފައެވެ. މި ބިމުގެ 50،000 އަކަފޫޓް ޚާއްސަކޮށްފައިވަނީ ޓެކްސީތައްފަދަ ހަތަރުފުރޮޅުލީ ވެހިކަލްތަކަށެވެ. އަދި 40،000 އަކަފޫޓްގެ ސަރަޙައްދު ޚާއްސަކޮށްފައިވަނީ ހުޅުމާލެ މަގުތަކުގައި ޤަވާއިދާ ޚިލާފަށް ޕާކްކޮށްފައި ހުންނަ ވެހިކަލްތައް ޓޯ ކުރުމަށްފަހު ގެނެސް ބެހެއްޓުމަށެވެ.

މާލެ ސަރަޙައްދަށް ކުރިމަތިވެފައިވާ އުޅަނދުތައް ތޮއްޖެހުމުގެ މައްސަލަ ހައްލުކުރުމަށް ސަރުކާރުންގެންދަވަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ރާއްޖެއަށް އެތެރެކުރާ އުޅަނދުތައް ލިމިޓްކުރުމާއި، އުޅަނދުތަކުގެ އުމުރު ކަނޑައެޅުމާއި، ޕާކިންއަށް ޚާއްސަ ސަރަޙައްދުތައް ކަނޑައެޅުން ފަދަ މުހިންމު ފިޔަވަޅުތައް ހިމެނެއެވެ. މި ފިޔަވަޅުތަކުގެ ސަބަބުން، މާލެ ސަރަޙައްދުގައި އުޅަނދުފަހަރު ދުއްވުމާއި ބޭއްވުމުގެ ނިޒާމު އިތުރަށް ހަރުދަނާވެ، ރައްޔިތުންނަށް ލުއިފަސޭހަކަން ލިބިގެންދާނެ ކަމަށް އުންމީދުކުރެވެއެވެ.