މަސްވެރިކަމުގެ ލައިސަންސް ނަގާފައިވާ ދޯނިތަކަށް އޮކްޓޫބަރު މަސް ނިމުމުގެ ކުރިން ދަފުތަރުކުރެވޭނެ

މަސްވެރިކަމުގެ ލައިސަންސް ނަގާފައިވާ ހުރިހާ ދޯންޏަކާއި، ފަޅުވެރިން އޮކްޓޯބަރު މަސް ނިމުމުގެ ކުރިން ދަފުތަރުކޮށް ނިންމުމަކީ އަމާޒެއްކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެއްޖެއެވެ.

އެވުޒާރާއިން މިހެން ވިދާޅުވީ މަސްވެރިން ދަފުތަރު ކުރުމުގެ މަސައްކަތް އަވަސް ކުރުމަށްޓަކައި އެވުޒާރާގެ ޓީމުތައް އަތޮޅުތަކަށް ދަތުރުކުރަން ފެށުމާއި ގުޅިގެންނެއެވެ.

މަސްވެރިންގެ ދަފްތަރުގައި ބައިވެރިވުމަށް ހުޅުވާލާފައިވަނީ މިދިޔަ ފެބްރުއަރީމަހުގެ 16 ވަނަ ދުވަހު ށ. ކޮމަންޑޫގައި ބޭއްވި ރަސްމިއްޔާތެއްގައެވެ.

ދަފުތަރު ކުރުމުގެ މަސައްކަތް އަވަސްކުރުމަށް ރާއްޖެ 6 ޒޯނަކަށް ބަހާލައިގެން މަސްވެރިކަމާ ބެހޭ ވުޒާރާގެ ޓީމުތައް އަންނަނީ މަސައްކަތް ކުރަމުންނެވެ. އަދި ކުރިއަށް އޮތް ދުވަސްތަކުގައި ރާއްޖޭގެ ހުރިހާ އަތޮޅަކަށް ވުޒާރާގެ ޓީމުތައް ދަތުރުކުރުމަށް ވަނީ ހަމަޖެހިފައެވެ. މިދަތުރުގައި މަސްވެރިން ދަފުތަރު ކުރުމުގެ މަސައްކަތާއި، ކެޔޮޅު އެޕްލިކޭޝަނާ ގުޅޭ މައުލޫމާތު މިޓީމުތަކުން ފޯރުކޮށްދޭނެއެވެ.

މިހަފުތާގައި މިޓީމުތައް ޅ، ދ، ލ، ގއ، ގދ، އަދި ސ. އަތޮޅުގައި ހަރަކާތްތެރިވާނެކަމަށާއި އަދި ޚާއްޞަކޮށް މަސްކިރާ ސަރަހައްދުތަކުގައި ކުރިއަށް އޮތް ދުވަސްތަކުގައި ޓީމުތައް މަސައްކަތް ކުރަމުންދާނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މައުލޫމާތުދެއްވައެވެ.

މަސްވެރިންގެ ޤައުމީ ދަފްތަރެއް އެކުލަވާލެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުފުޅެކެވެ.

މިދަފުތަރު އެކުލަވާލުމުގެ މައިގަނޑު އެއް ބޭނުމަކީ މަސްވެރިކަމަކީ ޕްރޮފެޝަނަލް މަސައްކަތެއްގެ ގޮތުގައި ކަނޑައެޅި މަސްވެރިންނަކީވެސް އެހެނިހެން މަސައްކަތްތަކެކޭ އެއްފަދައިން ދަޢުލަތުން ބަލައިގަންނަ ޢާމްދަނީ ލިބޭ މަސައްކަތެއްކުރާ ބައެއްގެ ގޮތުގައި ކަނޑައެޅުމެވެ.

މަސްވެރިން ދަފުތަރު ކުރަނީ އެންޑްރޮއިޑް އަދި އައިއޯއެސް ފޯނުތަކުގައި ބޭނުންކުރެވޭ 'ކެޔޮޅު' އެޕްލިކޭޝަނުންނެވެ.

މަސްވެރިން ދަފުތަރުގެ މަސައްކަތުގެ ތެރެއިން ށ، ރ، ގއ، ގދ އަދި ޏ. އަތޮޅުން މަސްވެރިކަން ކުރާ %50 އަށްވުރެ ގިނަ މަސްދޯނި ދަފްތަރުގައި ރަޖިސްޓަރީ ކުރެވިފައިކަމަށް މަސްވެރިކަމާ ބެހޭ ވުޒާރާއިން ވިދާޅުވެއެވެ. އެވުޒާރާގެ އަމާޒަކީ މަސްވެރިކަމުގެ ލައިސަންސް ނަގާފައިވާ ހުރިހާ ދޯންޏަކާއި އެދޯނިތަކުގެ ފަޅުވެރިން އޮކްޓޯބަރު މަސް ނިމުމުގެ ކުރިން ދަފުތަރުކޮށް ނިންމުން ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެއެވެ.

މަސްވެރިކަމާ ބެހޭ ވުޒާރާއިން ވިދާޅުވީ މަސްވެރިންގެ ދަފްތަރު އެކުލަވާލެއްވުމާއެކު އެސިނާޢަތުގައި ހަރަކާތްތެރިވާ ބިދޭސީންގެ ސަބަބުން ރާއްޖެއިން ބޭރުވަމުންދާ ފައިސާ ރާއްޖޭގެ އިޤްތިޞާދުގައި ހިފެހެއްޓޭނެކަމަށް.