ރާއްޖޭގެ 5 ސަރަހައްދެއްގައި ސްޕޯޓްސް ފިޝިން ހާބަރުތައް ތަރައްޤީކުރަން މަޝްވަރާކޮށްފި

ރާއްޖޭގެ 5 ސަރަހައްދެއްގައި ސްޕޯޓްސް ފިޝިން ހާބަރުތައް ތަރައްގީ ކުރުމާ ގުޅޭގޮތުން މަޝްވަރާކުރައްވައިފިއެވެ. މިމަޝްވަރާތައް ކުރައްވާފައިވަނީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމާއި ފަތުރުވެރިކަމާބެހޭ ވަޒީރު އިބްރާހިމް ފައިޞަލްއެވެ.

މިމަޝްރޫޢަކީ މަސްވެރިކަން ސިންދަފާތު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަށައަޅުއްވާފައިވާ ސިޔާސަތުގެ ދަށުން ކުރިއަށް ގެންދަން ރާވާފައިވާ މަޝްރޫޢެކެވެ. އަދި މިއީ ދިވެހި ޒުވާނުންގެ މެދުގައި މަޤުބޫލުވަމުން އަންނަ ހަރަކާތެއް ކަމަށްވާ ސްޕޯޓްސް ފިޝިންއަށް މަގުފަހިކޮށްދިނުމަށް އަމާޒުކޮށްގެން ކުރިއަށް ގެންދާ މަސައްކަތެކެވެ.

މިބައްދަލުވުމުގައި މަސްވެރިކަމާ ބެހޭ ވަޒީރުވަނީ ސްޕޯޓްސް ފިޝިން ހާބަރުތައް ތަރައްގީކުރަން ހުށަހަޅާ 5 ސަރަހައްދުގެ މަޢުލޫމާތު ވަޒީރު ފައިޞަލްއާ ހިއްސާކުރައްވާފައެވެ. މީގެ އިތުރުން، ސިނާޢަތެއްގެ ގޮތުގައި މެރިކަލްޗަރ ތަރައްގީކޮށް ރާއްޖޭގައި އުފައްދާ ތަކެތި އިތުރުކުރުމަށް ރައީސުލްޖުމްހޫރިއްޔާ ވަރަށް ބޮޑަށް އިސްކަން ދެއްވާކަންވެސް ވަޒީރު ޝިޔާމް ފާހަގަ ކުރެއްވިއެވެ.

މިބައްދަލުވުމުގައި ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވީ މިމަޝްރޫއު އަވަސްކުރުމަށް ފަތުރުވެރިކަމާބެހޭ ވުޒާރާއިން ފުރިހަމަ އެއްބާރުލުން ދެއްވާނެ ކަމަށެވެ. އަދި އެވުޒާރާގެ ފަންނީ ބޭފުޅުންގެ އެހީތެރިކަން މަސްވެރިކަމާބެހޭ ވުޒާރާއަށް ދެއްވާނެކަމަށްވެސް ވިދާޅުވިއެވެ.

ސްޕޯޓްސް ފިޝިން ހާބަރުތަކެއް ގާއިމުކުރުމަކީ މިސަރުކާރުގެ މެނިފެސްޓޯގެ މަސްވެރިކަމާބެހޭ ދާއިރާއިން ހިމަނާފައިވާ ވަޢުދެކެވެ. މިމަޝްރޫޢުގެ ސަބަބުން ރާއްޖޭގެ މަސްވެރިކަމާއި ފަތުރުވެރިކަމުގެ ދާއިރާއަށް އިތުރު ކުރިއެރުން ލިބޭނެކަމަށް މަސްވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.