ޖަނަވާރުތަކަށް ދޭންޖެހޭ ބޭސް ހެޔޮ އަގެއްގައި ލިބޭނެގޮތް ހެދުމަށް ދަނީ މަސައްކަތްކުރަމުން: ވަޒީރު

ގޭބިސީތަކުގައި ގެންގުޅޭ ޖަނަވާރުތަކަށް ބޭނުންވާ ބޭސްފަރުވާއާއި ވެކްސިންފަދަ ތަކެތި، ހެޔޮއަގެއްގައިި އަދި ފަސޭހައިން ލިބޭނެ މަގު ތަނަވަސްކުރުމަށް މަސައްކަތްކުރައްވަމުން ގެންދަވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމްލާ ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަމުންނެއެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އާއިޝަތު ރަމީލާ ވިދާޅުވީ ވެޓެރިނަރީ ޚިދުމަތް ފުޅާކުރުމަކީ އެ ވުޒާރާއިން ހާއްސަ އިސްކަންދީގެން ކުރިއަށްގެންދާ މަސައްކަތެއްކަމަށެވެ. މި މަސައްކަތުގެ ތެރެއިން، ވެޓެރިނަރީ ކްލިނިކްތައް ޤާއިމްކުރުމާއެކު، ޚާއްޞަ ޑޮކްޓަރުންނާއި ނަރުހުން ރާއްޖެ ގެނައުމުގެ މަސައްކަތް ކުރައްވަމުން ގެންދަވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ އަމިއްލަ ފަރާތްތަކުން ހިންގާ ވެޓެރިނަރީ ޚިދުމަތްތައް މިހާރުވެސް ރާއްޖޭގައި ލިބެން ހުރި ނަމަވެސް، ޖަނަވާރުތަކަށް ޖެހޭ ބަލިތައް ދެނެގަނެ، އެކަށީގެންވާ ފަރުވާ ދިނުމަށް ބޭނުންވާ ހަރުދަނާ ނިޒާމެއް ޤާއިމްވެފައި ނެތްކަމަށެވެ. އަދި ގޭގައި ގެންގުޅޭ ޖަނަވާރުތަކަށް ބޭނުންވާ ބޭސްފަރުވާ ރާއްޖެއިން ލިބެން ނެތުްކަންވެސް ވަޒީރު ފާހަގަކުރެއްވިއެވެ.

ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. އާއިޝަތު ރަމީލާ ވިދާލުވީ، ރާއްޖެއަށް އެތެރެކުރެވޭ ޖަނަވާރުތަކަށް ހަދަންޖެހޭ ޚާއްޞަ ސިއްޙީ ޓެސްޓުތައް ހެދުމަށް ބޭނުންވާ އާލާތްތައް މިވަގުތު ރާއްޖޭގައި ލިބެން ނެތުމަކީވެސް ޖަނަވާރުތަކުގެ ޞިއްޙަތާއި ރައްކާތެރިކަން ކަށަވަރުކުރުމަށް ހުރަސްއެޅޭ ކަމެއްކަމުގައި ވަޒީރު ވިދާޅުވިއެވެ.

"އެތެރެކުރެވޭ ދިރޭތަކެތި އެއީ ދޫނި ކަމުގައި ވިޔަސް ބުޅާ ކަމުގައި ވިޔަސް، އެއާޕޯޓުގައި މިހުންނަ ކަރަންޓީނު ފެސިލިޓީގައިވެސް ކުރަންޖެހޭ ބައެއް ޓެސްޓުތައް އެބަހުރި. އެ ޓެސްޓުތައް ކުރުމަށްޓަކައި ބޭނުންވާ ބައެއް އާލާތްތަކަކީވެސް މިހާރު އެހާ ފަސޭހައިން މިހާރު އަޅުގަނޑުމެންނަށް ލިބެން ހުންނަ އެއްޗިއްސެއް ނޫން" ވަޒީރު ވިދާޅުވިއެވެ.

ވަޒީރު ވިދާޅުވީ ޖަނަވާރުތަކުގެ ރައްކާތެރިކަން ކަށަވަރުކުރުމުގެ ގޮތުން މިއީ ރާއްޖޭގައި އިތުރަށް ތަރައްޤީކުރުމަށް ބޮޑަށް ބޭނުންވެފައިވާ ދާއިރާއެއްކަމަށެވެ. އަދި މި ދާއިރާ ކުރިއެރުވުމަށްޓަކައި އެ ވުޒާރާއިން މިހާރުވެސް ގިނަގުނަ މަސައްކަތްތަކެއް ކުރަމުންދާކަމުގައި ވަޒީރު ވިދާޅުވިއެވެ.

ޖަނަވާރުތަކަށް ރައްކާތެރި ހެޔޮއަގެއްގައި ބޭހާއި ފަރުވާގެ އާލާތްތައް ލިބެނޭގޮތް ތަނަވަސްކޮށްދިނުމަށް ކަމާގުޅުންހުރި އިދާރާތަކާ މަޝްވަރާތައް ކުރިއަށްދާކަމަށް ޑރ. ރަމީލާ ފާހަގަކުރެއްވިއެވެ. މިގޮތުން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އާއި، އިމްޕޯޓުކުރެވޭ ބޭހުގެ ފެންވަރު ކަށަވަރުކުރާ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އާއެކުވެސް މަޝްވަރާ ކުރެވުނުކަމަށް ވަޒީރު ވިދާޅުވިއެވެ.

ރާއްޖެއަށް އެތެރެކުރެވޭ އަދި ރާއްޖޭގައި ގެންގުޅޭ ޖަނަވާރުތަކާ ގުޅުންހުރި ކަންކަން ހަރުދަނާކޮށް ބެލެހެއްޓުމަށްޓަކައި އެ ވުޒާރާއިން ކުރަމުންދާ މަސައްކަތުގެ ތެރެއިން ޖަނަވާރާބެހޭ ޤާނޫނެއްގެ ޑްރާފްޓް އެކުލަވާލައި ބަންޑާރަ ނައިބުގެ އޮފީހަށް ހުށަހަޅާފައިވާކަން ވަޒީރު ފާހަގަކުރެއްވިއެވެ.

ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. އާއިޝަތު ރަމީލާ ވިދާޅުވީ ޕެޓް ޝޮޕްތަކުގެ އިންސްޕެކްޝަން ތަކެއްވެސް ހިންގަމުން އަންނަކަމަށެވެ.