ހއ.އަތޮޅުގެ ސިއްޙީ ޚިދުމަތްދޭ ހުރިހާ މަރުކަޒަކަށް ދިވެހި ނަރުހުން ހޯދަނީ

ހއ އަތޮޅުގެ ޞިއްޙީ ދާއިރާގައި ތިބި ހުރިހާ ބިދޭސީ ނަރުހުންގެ ބަދަލުގައި ދިވެހި ނަރުހުން ހޯދަމުން އަންނަކަމަށް އެއަތޮޅު ހޮސްޕިޓަލުން ވިދާޅުވެއްޖެއެވެ.

ހުރިހާ ބިދޭސީ ނަރުހުންގެ ބަދަލުގައި ދިވެހި ނަރުހުން ހޯދުމުގެ އަމާޒަށް ވާޞިލްވުމަށް ހއ އަތޮޅު ހޮސްޕިޓަލުންވަނީ މިހާރު މަސައްކަތް ފަށާފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ހއ އަތޮޅުން ހޮސްޕިޓަލުން ވިދާޅުވީ ހއ އަތޮޅުގެ ހުރިހާ ޞިއްޙީ މަރުކަޒަކަށާއި އަތޮޅު ހޮސްޕިޓަލުގައި ތިބި ހުރިހާ ބިދޭސީ ނަރުހުންގެ ބަދަލުގައި ދިވެހި ނަރުހުން ހޯދެންދެން، ނަރުހުން ހޯދަން އިޢުލާން ކުރަމުންގެންދާނެ ކަމަށެވެ. އެގޮތުން ކޮންމެ 3 މަހަކުން 1 މަހު ނަރުހުން ހޯދަން އިޢުލާންކުރާނެކަމަށް ހއ އަތޮޅު ހޮސްޕިޓަލުން ވިދާޅުވިއެވެ.

ހއ. ދިއްދޫގައި ހުންނަ އަތޮޅު ހޮސްޕިޓަލުންވަނީ މިމަހުގެ 6 ވަނަ ދުވަހު 51 ނަރުހުން ބޭނުންވާކަމަށް ބުނެ އިޢުލާނެއްކޮށްފައެވެ. އެގޮތުން އަތޮޅުގެ އެންމެ ރަށެއް ފިޔަވައި އެހެން ހުރިހާ ރަށެއްގެ ޞިއްޙީ މަރުކަޒުތަކަށާއި އަތޮޅު ހޮސްޕިޓަލަށް ޖުމްލަ 51 ނަރުހުން ބޭނުންވާކަމަށް އިޢުލާންގައިވެއެވެ.

ނަރުހުން ހޯދަނީ ހއ. އަތޮޅު ހޮސްޕިޓަލާއި އެއަތޮޅުގެ 13 ސިއްޙީ މަރުކަޒަކަށް:

• ހއ އަތޮޅު ހޮސްޕިޓަލަށް 13 ނަރުހުން
• ބާރަށު ޞިއްޙީމަރުކަޒަށް 6 ނަރުހުން
• މުރައިދޫ ޞިއްޙީމަރުކަޒަށް 2 ނަރުހުން
• ތަކަންދޫ ޞީއްޙީމަރުކަޒަށް 6 ނަރުހުން
• ހޯރަފުށީ ޞިއްޙީމަރުކަޒަށް 4 ނަރުހުން
• ތުރާކުނު ޞިއްޙީމަރުކަޒަށް ނަރުހެއް
• އުލިގަމް ޞިއްހީ މަރުކަޒަށް ނަރުހެއް
• މޮޅަދޫ ޞިއްހީ މަރުކަޒަށް 2 ނަރުހުން
• ކެލާ ޞިއްހީ މަރުކަޒަށް 8 ނަރުހުން
• ވަށަފަރު ޞިއްހީ މަރުކަޒަށް 3 ނަރުހުން
• ފިއްލަދޫ ޞިއްހީ މަރުކަޒަށް 2 ނަރުހުން
• މާރަންދޫ ޞިއްހީ މަރުކަޒަށް ނަރުހެއް
• އުތީމު ޞިއްހީ މަރުކަޒަށް 2 ނަރުހުން

ހއ. އަތޮޅަށް ނަރުހުން ހޯދަން އިޢުލާންކޮށްފައިވަނީ ރެޖިސްޓަރޑް ނަރުހުންގެ ޕަބްލިކް ސަރވިސް ރޭންކް 5 އަދި 7 އަށެވެ. އެގޮތުން ޕަބްލިކް ސަރވިސް ރޭންކު 5 އަށް ނަގާ ނަރުހުން ވާން ޖެހޭނީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ގަބޫލްކުރާ، ނަރސިންގ ދާއިރާއަކުން ގައުމީ ސަނަދުތަކުގެ އޮނިގަނޑުގެ ލެވެލް 5 ނުވަތަ 6 ގެ ސަނަދެއް ހާސިލްކޮށްފައިވުމާއެކު އެ ކައުންސިލްގައި ރަޖިސްޓްރީކޮށް، އަދާހަމަ ޕްރެކްޓިސިންގ ލައިސަންސް ލިބިފައިވާ މީހުންނަށެވެ. ރޭންކް 5 ގެ ނަރުހުންނަށް އަސާސީ މުސާރައިގެ ގޮތުގައި 11428 ރުފިޔާ އާއި 5333 ރުފިޔާގެ އެލަވަންސްގެ އިތުރުން ހާޒިރީ އިނާޔަތްވެސް ލިބޭނެކަމަށް އިޢުލާނުގައިވެއެވެ.

އަދި ޕަބްލިކް ސަރވިސް ރޭންކު 7އަށް ނަގާ ނަރުހުން ވާން ޖެހޭނީ މޯލްޑިވްސް ނަރސިންގ އެންޑް މިޑްވައިފްރީ ކައުންސިލް ގަބޫލްކުރާ، ނަރސިންގ ދާއިރާއަކުން ގައުމީ ސަނަދުތަކުގެ އޮނިގަނޑުގެ ލެވެލް 7 ނުވަތަ 8 ގެ ސަނަދެއް ހާސިލްކޮށްފައިވުމާއެކު އެކައުންސިލުގައި ރަޖިސްޓްރީކޮށް، އަދާހަމަ ޕްރެކްޓިސިންގ ލައިސަންސް ލިބިފައިވާ މީހަކަށެވެ. ރޭންކް 7ގެ ނަރުހުންނަށް އަސާސީ މުސާރައެއްގެ ގޮތުގައި 13057 ރުފިޔާ އާއި 6094 ރުފިޔާގެ އެލަަވަންސެއްގެ އިތުރުން ހާޒިރީ އިނާޔާތްވެސް ލިބޭނެއެވެ.

ނަރުސްކަމަށް އެދި ހުށައަޅަންޖެހޭ ހުރިހާ ލިޔެކިޔުމެއް އަންނަ ބުރާސްފަތި ދުވަހުގެ ކުރިން ހއ. އަތޮޅު ހޮސްޕިޓަލުގެ އިދާރީ އޮފީހަށް ހުށައަޅަންޖެހޭއިރު އެ ހޮސްޕިޓަލުގެ އީމެއިލް، [email protected] އަށްވެސް ލިޔެކިޔުން ހުށައެޅޭނެކަމަށް އެ ހޮސްޕިޓަލުން ބުނެއެވެ. ހުށައަޅަންޖެހޭ ލިޔެކިޔުންތަކުގެ ތަފްސީލް ގެޒެޓުގައި ވަނީ ޝާއިޢުކޮށްފައެވެ.

ހއ. އަތޮޅު ހޮސްޕިޓަލުން ވިދާޅުވީ، ނަރުސްކަމަށް މީހަކު ހޮވުމަށް ބާއްވާ އިންޓަވިއު އާއި އިމްތިޙާނު އޮންނާނީ މިމަހުގެ 15 އިން އަންނަ މަހުގެ 31 ވަނަ ދުވާހާ ދެމެދު ދިއްދޫގައި ހުންނަ ހއ. އަތޮޅު ހޮސްޕިޓަލްގެ އިދާރީ އޮފީހުގައިކަމަށެވެ.