ވަގަށް ނަގާފައިވާ ގިނަ އަދަދެއްގެ އިލެކްޓްރޯނިކް ސާމާނާއެކު 2 މީހަކު ހައްޔަރުކޮށްފި

މާލޭގެ ގެއެއްގެ ތެރޭގައި ހުރި މީހެއްގެ އަތުން ވަގަށް ނަގާފައިވާ ކަމަށް ޝައްކުކުރެވޭ ގިނަ އަދަދެއްގެ އިލެކްޓްރޯނިކް ސާމާނުތަކެއް ފެނުނު މައްސަލައެއްގެ ތުހުމަތުގައި 2 މީހަކު ހައްޔަރުކޮށްފިއެވެ.

ފުލުހުން ވިދާޅުވީ، އިއްޔެ ހަވީރު 16:05 ހާއިރު ހައްޔަރުކޮށްފައިވަނީ ބ. ދަރަވަންދޫ، ވިދުވަރު، އުމުރުން 32 އަހަރުގެ ހުސެއިން ޝާއިފް އާއި މ. ދާރުލްގަރާރު، އުމުރުން 30 އަހަރުގެ އިސްމާއިލް ވިޝާލްއެވެ.

ފުލުހުން ވިދާޅުވީ މާފަންނުގެ އެއްގޭގެ ފާޚާނާގެ ފެންލައިޓުން ވަދެ ކޮޓަރީގައި ނިދާފައި ތިބި ދެމީހެއްގެ އަތުން ވައްކަންކޮށް، އެއްވެސް ހަރަކާތެއް ކޮށްފިނަމަ މަރާލާނެ ކަމަށް ބުނެ ބިރުދައްކައި އެ ދެމީހުންގެ މޮބައިލް ފޯނާއި ލެޕްޓޮޕަކާއި އަދި އެހެނިހެން ތަކެތި ފޭރުނު މައްސަލައެއް ސެޕްޓެމްބަރ މަހުގެ 4 ވަނަ ދުވަހުގެ ދަންވަރުގެ ވަގުތެއްގައި ރިޕޯޓް ކޮށްފައިވާކަމަށެވެ.

ފޭރުމަށްފަހު ދެ މީހުން ފިލައިގެން ގޮސްފައިވަނީ ފާޚާނާއަށް ވަދެ އެތެރޭން ދޮރު ތަޅުލައި ފެންލައިޓުން ނުކުމެގެންކަމަށްވެސް ފުލުހުން ވަނީ ވިދާޅުވެފައެވެ.

މި ދެ މީހުން ރޭގެ ވަގުތެއްގައި ހައްޔަރުކޮށް އެގޭން ފޭރުނު ލެޕްޓޮޕާއި މޮބައިލް ފޯނުތައް ވަނީ ހޯދާފައެވެ. އަދި އެމީހުން ވަގަށް ނަގާފައިވާ ކަމަށް ތުހުމަތު ކުރެވޭ އެހެނިހެން ތަކެތިވެސް އެމީހުން އަތުން ފެނިފައިވާކަމަށް ފުލުހުން ވިދާޅުވެއެވެ.

މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.