މާލޭގައި އަންހެނަކު ރަހީނުކުރި މައްސަލައާ ގުޅިގެން ފުލުހުންގެ ބެލުމުގެ ދަށުގައި ހުއްޓާ މަރުވި އަޠުހަރުގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް މިއަދު ފޮނުވާފައިވާކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ އާދަމް އަޠުހަރުގެ ހަށިގަނޑުގެ ޕޯސްޓްމޯޓަމް ހެދުމަށް ނިންމާފައިވާކަމަށެވެ. ނަމަވެސް ޕޯސްޓްމޯޓަމް ހެދުމަށް ފޮނުވީ ކޮން ޤައުމަކަށްކަމެއް ފުލުހުން ވިދާޅެއް ނުވެއެވެ.
ފުލުހުން އަތުހަރު ހައްޔަރު ކޮށްފައިވަނީ މިދިޔަ މަހުގެ 29 ވަނަ ދުވަހު މާލޭގައި އަންހެނެއްގެ ކަރުގައި ވަޅި ޖައްސައި އެއަންހެން މީހާ ރަހީނު ކުރުމަށް މަސައްކަތްކުރުމާއި ގުޅިގެންނެއެވެ.
އަންހެންމީހާ ސަލާމަތްކުރުމުގެ މަސައްކަތުގެ ތެރެއިން، ފުލުހަކު ވަނީ އޭނާގެ ފަހަތުން ބޮލުގައި މުގުރުން ޖަހާ ބިންމައްޗަށް ވައްޓާލާފައިއެވެ. ހައްޔަރު ކުރުމުގެ ތެރޭގައި އަތުހަރަށް އެކިވަރުގެ ޒަހަމްތައް ލިބިފައިވާކަން ފުލުހުން ވަނީ ވިދާޅުވެފައެވެ.
އެންމެ ފުރަތަމަ އަތުހަރަށް ފަރުވާދީފައިވަނީ އޭޑީކޭ ހޮސްޕިޓަލުގައެވެ. ފަރުވާ ދިނުމަށްފަހު ދޫކޮށްލާފައިވަނިކޮށް، ފިޓު ޖެހިގެން ކަމަށް ބުނެ އައިޖީއެމްއެޗުގައި ފަރުވާދިނެވެ. އެޔައްފަހު ފުލުހުން ވަނީ ދޫނިދޫއަށް ގެންގޮސްފައެވެ.
ދާޚިލީ ސަލާމާތާއި ފަންނިއްޔާތާއިބެހޭ ވުޒާރާއިން ވަނީ އަޠުހަރު މަރުވުމުގެ ކުރިން ދޫނިދޫ ޖަލުގައި އޭނާ ހުރިއިރު ކަން ހިންގާފައިވާ ގޮތް ފެންނަ ފުޓޭޖްތައް ނޫސްވެރިންނަށް ދައްކާފައެވެ. މީގެ އިތުރުން އަންހެނަކު ރަހީނުކޮށްގެން އުޅުނު ވަގުތު އޭނާއާއި ފުލުހުން މުޢާމަލާތު ކުރަން މަސައްކަތް ކުރާ ވީޑިއޯއެއްވެސް ވަނީ ދައްކާފައެވެ. ނޫސްވެރިންނަށް ވީޑިއޯތައް ދެއްކުމުގެ ކުރިން އޭނާގެ އާއިލާއަށްވެސް އެވީޑިއޯތައްވަނީ ދައްކާފައެވެ.