މާކަނޑުގެ ދިރުންތަކާއި ސަރަޙައްދުތައް ޙިމާޔަތްކުރުމާގުޅޭ އދ.ގެ މުޢާހަދާގައި ރާއްޖެއިން ސޮއިކޮށްފި

މާކަނޑުގެ ދިރުންތަކާއި ސަރަޙައްދުތައް ޙިމާޔަތްކޮށް ރައްކާތެރިކުރުމާ އަދި ދެމެހެއްޓެނިވި ގޮތުގައި ބޭނުންކުރުމާގުޅޭ މުޢާހަދާ (ބީ.ބީ.އެން.ޖޭ. މުޢާހަދާ) ގައި ދިވެހިރާއްޖެއިން ސޮއިކޮށްފިއެވެ.

އދ. ގެ މައިމަރުކަޒުގައި އިއްޔެ ބޭއްވި ރަސްމިއްޔާތެއްގައި، "ބަޔޯޑައިވަރސިޓީ ބިޔޯންޑް ނޭޝަނަލް ޖުރިސްޑިކްޝަން" މުޢާހަދާގައި ދިވެހިރާއްޖޭގެ ފަރާތުން ސޮއިކުރެއްވީ، ދިވެހިރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ޢަލީ ނަޞީރު މުޙައްމަދެވެ. ރާއްޖެއަކީ މި މުޢާހަދާގައި ސޮއިކުރި 92 ވަނަ ޤައުމެވެ.

މި މުޢާހަދާއަކީ މާކަނޑުގެ މާހައުލީ ނިޒާމުތައް ރައްކާތެރިކޮށް ޙިމާޔަތްކުރުމަށް މިހާތަނަށް ބައިނަލްއަޤްވާމީ ފެންވަރުގައި ކުރެވުނު އެންމެ މުހިންމު އެއް މަސައްކަތެވެ. ކަނޑުގެ ސަރަޙައްދު ޙިމާޔަތްކުރުމަށާއި ދެމެހެއްޓެނިވި ގޮތުގައި ބޭނުންކުރުމަށް މަގުފަހިކުރުވާ މިފަދަ މުޢާހަދާއެއްގައި ރާއްޖެ ކަހަލަ ޖަޒީރާ ޤައުމަކުން ބައިވެރިވުމަކީ ވަރަށް މުހިންމުކަމެއް ކަމަށް ސަރުކާރުން ވިދާޅުވެއެވެ.

މި މުޢާހަދާގައި ރާއްޖެއިން ސޮއިކުރުމާ ގުޅިގެން، މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހިމް ވިދާޅުވީ، ކަނޑުގެ ވަސީލަތްތައް ރައްކާތެރިކޮށް ދެމެހެއްޓުމަށްޓަކައި، ރާއްޖެ ފަދަ ކަނޑުގެ ސަރަޙައްދު ބޮޑު ޤައުމަކުން މިފަދަ މުޢާހަދާއެއްގައި ބައިވެރިވުމަކީ، ތާރީޚީ ގޮތުންވެސް ފާހަގަކުރެވޭ މުހިންމު ކާމިޔާބީއެއް ކަމުގައެވެ.

I am pleased to announce that Maldives has just signed the #HighSeasTreaty at the #UN and plans to ratify it during #UNGA this September. As a #LargeOceanState, this is a historical breakthrough and key milestone towards conservation and sustainable use of our ocean resources.… pic.twitter.com/ouLM2TZ7le

— Thoriq Ibrahim (@Thoriqibrahim) September 4, 2024

މި މުޢާހަދާގައި ސޮއިކުރަން ވަޒީރުންގެ މަޖިލީހުން ނިންމެވީ މިދިޔަ ފެބްރުއަރީ މަހު 11 ގައެވެ. އަދި މި މުޢާހަދާގައި ސޮއިކުރަން ރައްޔިތުންގެ މަޖިލީހުން ސަރުކާރަށް ރުހުން ދިނީ މިދިޔަ މެއި މަހު 14 ގައެވެ.

މި މުޢާހަދާގައި ދިވެހިރާއްޖެއިން ސޮއިކުރުމާއި ގުޅިގެން ޚާރިޖީ ވަޒީރު މޫސާ ޒަމީރު ވިދާޅުވީ، މިއީ ރާއްޖޭގެ އެންމެ އަގުހުރި ވަސީލަތްތައް ކަމުގައިވާ ކަނޑާއި އޭގެ ދިރުންތައް ޙިމާޔަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ޚާއްސަ އަހައްމިއްޔަތު ދައްކުވައިދޭ ރަމްޒެއްކަމަށެވެ.

ޚާރިޖީ ވަޒީރު ވިދާޅުވީ މި މުޢާހަދާއިން ޤައުމީ އިޚްތިޞާޞުން ބޭރުގެ ސަރަޙައްދުތަކުގައި ކަނޑުގެ ދިރުންތައް ޙިމާޔަތްކުރުމަށް ކުރެވޭ މަސައްކަތްތައް އިތުރުވެގެންދާނެކަމަށެވެ. އަދި މިކަމުގެ ސަބަބުން ފަތުރުވެރިކަމާއި މަސްވެރިކަމުގެ ސިނާޢަތަށް ކުރިއެރުން ލިބިގެންދާނެކަމަށް ވަޒީރު ފާހަގަކުރެއްވިއެވެ.

"މި މުޢާހަދާއަކީ ބައިނަލްއަޤްވާމީ އެއްބާރުލުމާއި ކަނޑު ޙިމާޔަތްކުރުމަށް އެކުގައި މަސައްކަތްކުރުމުގެ ވަޢުދުގެ ހެއްކެއް. ދިވެހިރާއްޖެއިން މިކަމުގައި އަޅުގަނޑުމެންގެ ދައުރު އަދާކުރުމަށް ތައްޔާރަށް މިތިބީ." ޚާރިޖީ ވަޒީރު ވިދާޅުވިއެވެ.

Today, the Maldives signed the #BBNJ Agreement as its 92nd signatory.

The signing of the Agreement is a testament to President Dr @MMuizzu's commitment to protect our most cherished resources - the ocean and its biodiversity. The people of #Maldives heavily rely on the… pic.twitter.com/C8PT4Tztik

— Moosa Zameer (@MoosaZameer) September 4, 2024

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވީ މި މުޢާހަދާގެ މައިގަނޑު މަޤްޞަދަކީ، މިހާރަށާއި ދުރު މުސްތަޤުބަލަށް، ޤައުމީ އިޚްތިޞާޞުން ބޭރުގެ ސަރަޙައްދުތަކުގައިވާ ކަނޑުގެ ދިރުންތައް ރައްކާތެރިކޮށް، ދެމެހެއްޓެނިވި ގޮތެއްގައި ބޭނުންކުރުމެވެ.

މި މުޢާހަދާގައި މައިގަނޑު 4 ކަމަކަށް އަލިއަޅުވާލާފައިވެއެވެ. އޭގެ ތެރޭގައި ކަނޑުގެ ޖެނެޓިކް ވަސީލަތްތަކުގެ ފައިދާތައް ހަމަހަމަކަމާއި އިންސާފުވެރިކަމާއެކު ބެހުމާއި، ކަނޑުގެ ސަރަޙައްދުތައް ޙިމާޔަތްކޮށް ބެލެހެއްޓުމަށް ބޭނުންވާ އޭރިއާ ބޭސްޑް މެނޭޖްމަންޓް ޓޫލްސް އެކުލަވާލުމާއި، ތިމާވެށްޓަށް ކުރާ އަސަރުތައް ވަޒަންކުރުމުގެ އިތުރުން މެރިން ޓެކްނޮލޮޖީގެ ދާއިރާއިން ކެޕޭސިޓީ އިތުރުކުރުން ހިމެނެއެވެ.


މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ވިދާޅުވީ މި މުޢާހަދާ ތަންފީޒުވުމުން، ދެމެހެއްޓެނިވި ތަރައްޤީގެ ގިނަ ލަނޑުދަނޑިތައް ހާސިލުކުރުން އަވަސްވެގެންދާނެކަމަށެވެ. ހަމައެހެންމެ މޫސުމީ ބަދަލުތައް ކޮންޓްރޯލްކުރުމާއި، ކާބޯތަކެތީގެ ރައްކާތެރިކަމާއި ފެންވަރު ދެމެހެއްޓުމުގައި މުހިންމު ދައުރެއް އަދާކުރާނެކަމަށް އެ ވުޒާރާއިން ވިދާޅުވެއެވެ.

އދ. ގެ ކަނޑުގެ ޤާނޫނާބެހޭ މުޢާހަދާގެ ދަށުން، ޤައުމީ އިޚްތިޞާޞުން ބޭރުގެ ސަރަޙައްދުތަކުގައިވާ ކަނޑުގެ ދިރުންތައް ރައްކާތެރިކޮށް، ދެމެހެއްޓެނިވި ގޮތެއްގައި ބޭނުންކުރުމާބެހޭ މުޢާހަދާ ނުވަތަ ބީބީއެންޖޭ މުޢާހަދާ ފާސްކޮށްފައިވަނީ 19 ޖޫން 2023 ގައެވެ. މި މުޢާހަދާ ފާސްކުރީ އދ. ގެ ބެލުމުގެ ދަށުން ބޭއްވުނު، ޤައުމީ އިޚްތިޞާޞުން ބޭރުގެ ސަރަޙައްދުތަކުގެ ކަނޑުގެ ދިރުންތަކާބެހޭ ސަރުކާރުތަކުގެ މެދުގައި ބޭއްވުނު ބައްދަލުވުމުގައެވެ.

20 ސެޕްޓެމްބަރު 2025 ގެ ނިޔަލަށް ހުރިހާ ޤައުމަކުން ސޮއި ކުރުމަށް ހުޅުވާލާފައިވާ މި މުޢާހަދާއަށް އަމަލުކުރަން ފަށާނީ 60 ވަނަ ގައުމުން މި މުޢާހަދާ ތަސްދީޤުކުރިތާ 120 ދުވަސް ފަހުންނެވެ.