ފުލުހުންގެ ޚިދުމަތުގެ އާސާރުތައް ދައްކާލުމަށް ޚާއްޞަ މައުރަޒެއް

ދިވެހި ފުލުހުންގެ ޚިދުމަތުގެ ދުވަހާ ގުޅުވައިގެން، "ފުލުހުންގެ އާސާރު ދައްކާލުން" ގެ ނަމުގައި ޚާއްޞަ މައުރަޒެއް ހުޅުވައިފިއެވެ. މި މައުރަޒު ހުޅުވާފައިވަނީ ދާރުލް އާސާރުގައެވެ. މި މައުރަޒު ރަސްމީކޮށް ހުޅުވައިދެއްވީ ދިވެހިބަހާއި، ސަގާފަތާއި އަދި ތަރިކައާބެހޭ ވަޒީރު، އާދަމް ނަޞީރު އިބްރާހީމެވެ.

"ފުލުހުންގެ އާސާރު ދައްކާލުން" މި މައުރަޒަކީ، ކުރީގެ ޒަމާނުއްސުރެ މިއަދާ ހަމައަށް ފުލުހުންގެ ޚިދުމަތުގައި ބޭނުންކޮށްފައިވާ އަދި މިހާރުވެސް ބޭނުންކުރަމުންދާ އާލާތްތަކާއި، ލިޔެކިޔުންތަކާއި އަދި އެހެނިހެން ތަކެތި ޢާންމުންނަށް ދައްކުވައިދޭ މައުރަޒެކެވެ. މި މައުރަޒުގެ ސަބަބުން، ފުލުހުންގެ ޚިދުމަތުގެ ތާރީޚާއި ތަރައްޤީއަށް އައިސްފައިވާ ކުރިއެރުންތައް ދަސްކުރުމުގެ ފުރުޞަތު ލިބިގެންދާނެއެވެ.

މައުރަޒު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން، ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ، ދިވެހި ފުލުހުންގެ ޚިދުމަތަކީ ދިގު ތާރީޚެއް އޮތް މުއައްސަސާއެއް ކަމަށެވެ. މި ޚިދުމަތަށް ގަރުނެއް ފުރެން ކައިރިވެފައިވާއިރު، މިހާރުގެ ޖީލަށާއި އަންނަން އޮތް ޖީލުތަކަށް ދައްކުވައިދެވޭނެ ގިނަ ކަންތައްތަކެއް ހުރިކަމަށް ކޮމިޝަނަރ ފާހަގަކުރެއްވިއެވެ.

ކޮމިޝަނަރ ޝުޖާޢު ވިދާޅުވީ، މި މައުރަޒުގައި ފުލުހުންގެ ޚިދުމަތާ ގުޅުންހުރި ގިނަ ތަކެތި ފެންނަން ހުންނާނެކަމަށެވެ.

މީގެ އިތުރުން، ދުނިޔޭގެ ކޮންމެ ޤައުމެއްގައިވެސް ފުލުހުންގެ މަސައްކަތަކީ ވަކި ހަމަތަކަކާއި އުސޫލުތަކެއްގެ މަތިން ހިންގާ ޚިދުމަތެއްކަމަށް ކޮމިޝަނަރ ވިދާޅުވިއެވެ. އަދި ދިވެހި ފުލުހުންގެ ޚިދުމަތަކީވެސް ހަމަ އެފަދައިން ވަކި ހަމަތަކަކާއި އުސޫލުތަކެއްގެ މަތިން ހިންގަމުންދާ ޚިދުމަތެއްކަން ޝުޖާއު ފާހަގަކުރެއްވިއެވެ.

"ފުލުހުން ބޭނުންކުރާ ސާމާނާއި އާލާތާއި ޔުނީފޯރމަކީވެސް ވަކިގޮތަކަށް ފަރުމާ ކުރެވިފައިވާ އެއްޗެއް. އެކަން ހަމަ ފުލުހުންގެ ޚިދުމަތުގައި 91 އަހަރު ވެގެންދާއިރު އެކަންތައްތައް ދުނިޔޭގެ އެހެން ގައުމުތަކުގައި ފެންނަ ސިފަތައް ދިވެހި ފުލުހުންގެ ޚިދުމަތުން ފެނިގެން ދާނެ" ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވިއެވެ.

ކޮމިޝަނަރ އޮފް ޕޮލިސް، ޢަލީ ޝުޖާޢު ވިދާޅުވީ، މި މައުރަޒަކީ ދިވެހި ފުލުހުންގެ ޚިދުމަތުގެ އުފެދުމާއި ތަރައްޤީގެ މަރުޙަލާތައް ދައްކުވައިދޭ މުހިންމު ވަސީލަތެއްކަމަށެވެ. މީގެ އިތުރުން، މި މައުރަޒުން ދިވެހި ފުލުހުންގެ ޚިދުމަތުގެ މުހިންމުކަމާއި އޭގެ އަގު ވަޒަންކުރުމުގެ ފުރުޞަތު ލިބިގެންދާނެއެވެ.

އަދި ކުރިމަގުގެ ޖީލުތަކަށް ފުލުހުންގެ ޚިދުމަތާ ގުޅުމަށް ޝައުޤުވެރިކަން އުފެއްދުމަކީވެސް މި މައުރަޒު ބޭއްވުމުގެ އެންމެ މައިގަނޑު އެއް މަޤްޞަދުކަމުގައި ކޮމިޝަނަރ އޮފް ޕޮލިސް ފާހަގަކުރެއްވިއެވެ. މި މައުރަޒަކީ ފުލުހުންގެ ދާއިރާއަށް ޝައުޤުވެރިވާ ފަރާތްތަކަށް މަޢުލޫމާތު ލިބި، އިތުރު ހިތްވަރު ލިބިގަތުމުގެ ފުރުޞަތެއްކަމުގައިވެސް އެމަނިކުފާނު ވިދާޅުވިއެވެ.

"ފުލުހުންގެ އާސާރު ދައްކާލުން " މައުރަޒު ކުރިއަތް ދާނީ މިމަހުގެ 1އިން 3އަށް ދާރުން އާސާރުގައެވެ. މި މައުރަޒު ހުޅުވިފައި ހުންނާނީ ހެނދުނު 9:00އިން 18:00އަށެވެ. އަދި ރޭގަނޑު 20:00އިން 22:00އަށެވެ.

ރާއްޖޭގައި މަދަނީ ޚިދުމަތެއްގެ ގޮތުގައި ފުލުހުންގެ ޚިދުމަތް ދޭންފެށިތާ މިހާރުވަނީ 20 އަހަރުވެފައެވެ. މީގެ 91 އަހަރުކުރިން ނޭޝަނަލް ސެކިއުރިޓީ ސާވިސްގެ ތެރެއިން ފޯރުކޮށްދެމުންދިޔަ ފުލުހުންގެ ޚިދުމަތް 2004 ވަނަ އަހަރުގެ ސެޕްޓެންބަރު މަހުގެ 1 ވަނަ ދުވަހުވަނީ މަދަނީ ވަކި މުއައްސަސާއެއްގެ ގޮތުގައި ޤާއިމުކޮށްފައެވެ.