މަސްވެރިންނަށް ހެޔޮއަގުގައި ތެޔޮ ލިބޭނެ އިންތިޒާމް ހަމަޖައްސަން މަސައްކަތްކޮށްދޭނަން: ވަޒީރު ޝިޔާމް
-
ވަޒީރު މިހެން ވިދާޅުވީ ނައިއިފަރު މަސްވެރިންނާއެކު ބޭއްވި ބައްދަލުކުރެއްވުމުގައި
-
މަސްވެރިންގެ ކަންބޮޑުވުންތައް ވަނީ އަޑުއައްސަވާފައި
މަސްވެރިންނަށް ހެޔޮއަގުގައި ތެޔޮ ލިބޭނެ އިންތިޒާމެއް ހަމަޖައްސައިދިނުމަށް މަސައްކަތްކޮށްދެއްވާނެކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު ޝިޔާމް މިހެން ވިދާޅުވީ ނައިފަރު މަސްވެރިންނާ ބައްދަލުކުރައްވައި އެފަރާތްތަކުގެ ކަންބޮޑުވުންތައް އަޑުއެއްސެވުމަށްފަހު ދެއްކެވި ވާހަކަފުޅުގައެވެ.
މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވިދާޅުވީ، މި ބައްދަލުވުމުގައި މަސްވެރިން އެމީހުންގެހުރި ބައެއް ކަންބޮޑުވުންތައްވެސް ވަޒީރާއި ހިއްސާކުރެއްވިކަމަށާއި އެގޮތުން ތެލުގެ އަގު ބޮޑުވުމުގެ ކަންބޮޑުވުން ޚާއްސަގޮތެއްގައި ފާހަގަކުރެއްވިކަމަށެވެ.
އެހެންކަމުން އެސްޓީއޯ އާއި އަދި އެކުންފުނީގެ ސަބްސިޑަރީ ކުންފުނި، އެފްއެސްއެމްއާއި ވާހަކަދައްކައިގެން މަސްވެރިންނަށް ހެޔޮ އަގުގައި ތެޔޮ ލިބޭނެ އިންތިޒާމެއް ހަމަޖައްސައިދިނުމަށް މަސްވެރިން އެދިފައިވާތީ އެކަމަށް މަސައްކަތް ކޮށްދެއްވާނެކަމުގެ ޔަޤީންކަން ވަޒީރު ޝިޔާމް ވަނީ މަސްވެރިންނަށް ދެއްވާފައެވެ.
ވަޒީރު އަޙްމަދު ޝިޔާމް ޅ. ނައިފަރު މަސްވެރިންނާއި ކައުންސިލް މެންބަރުންނާ ބައްދަލުކުރެއްވުން.
— Ministry of Fisheries and Ocean Resources (@MFORmv) August 30, 2024
މި ބައްދަލުކުރެއްވުމުގައި މަސްދޯނިފަހަރުގައި އަޅާ އާރްއެސްޑަބްލިއު ނިޒާމާއި މަސްވެރިންގެ ދަފްތަރާއި މަސްވެރި ވުޒާރާއިން ކުރިއަށްގެންދާ އެހެނިހެން މަޝްރޫއުތަކާ ގުޅޭ މައުލޫމާތު… pic.twitter.com/60zMlvwEy3
މީގެ އިތުރުން މި ބައްދަލުވުމުގައި ސަރުކާރުން ކުރިއަށްގެންދާ މަސްވެރިންގެ ދަފްތަރާއި ބެހޭ މައުލޫމާތު މަސްވެރިންނާ ހިއްސާކޮށްފައިވާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވިދާޅުވިއެވެ. އެގޮތުން ދަފްތަރުވާނެގޮތާއި، ދަފްތަރުވުމުގެ ސަބަބުން މަސްވެރިންނަށް ލިބިގެންދާނެ ފައިދާތަކުގެ މައުލޫމާތު ހިއްސާކޮށްފައިވާކަމަށްވެސް އެވުޒާރާއިން ވިދާޅުވިއެވެ.
މީގެއިތުރުން ލޮނުފެނުން މަސް ފިނިކުރާ ނިޒާމް، އާރުއެސްޑަބްލިއު ސިސްޓަމް ހަރުކުރުމަށް ލޯނު ދޫކުރާ ގޮތުގެ މައުލޫމާތުވެސް މިބައްދަލުވުމުގައި ވަނީ މަސްވެރިންނާއި ހިއްސާކޮށްފައެވެ.
ވަޒީރު ޝިޔާމްގެ އުފަންރަށްކަމުގައިވާ ޅ. ނައިފަރަކީ މަސްވެރި ރަށެކެވެ. އެރަށުގެ ގިނަ ޒުވާނުންވެސް މަސްވެރިކަމުގައި ހަރަކާތްތެރިވެއެވެ. އެރަށުގައި މަސްވެރިކަންކުރާ 25 ވަރަކަށް ދޯނި އޮވެއެވެ.