ވޯލްޑް ޖޫނިޔާ ޝެފް ޗެލެންޖުގެ ފަނޑިޔާރަކަށް ދިވެހި ޝެފް މަހާ

ވޯލްޑް ޖޫނިޔާ ޝެފް ޗެލެންޖް 2024ގައި ފަނޑިޔާރުކަން ކުރުމުގެ ފުރުޞަތު މަޝްހޫރު ދިވެހި ޝެފް މަހާ ނަސީރަށް ލިބިއްޖެއެވެ.

މި މުބާރާތަކީ ބައިނަލްއަޤްވާމީ ގިނަ ޝެފް ފަނޑިޔާރުން ބައިވެރިވާ، 12 ޤައުމެއްގެ ޝެފް ޓީމުތަކާއި، ތައިލެންޑުގެ 4 ޓީމެއް ވާދަކުރާ މުބާރާތެކެވެ.

ދިވެހިރާއްޖޭގެ އިތުރުން މި މުބާރާތުގައި ބައިވެރިވާ ޤައުމުތަކުގެ ތެރޭގައި ސިންގަޕޫރު، މެލޭޝިއާ، ދެކުނު ކޮރެއާ، މޮންގޯލިއާ، ކެމްބޯޑިއާ، ވިއެޓްނާމްގެ އިތުރުން އިންޑޮނޭޝިއާ، ޗައިނާ، އެމެރިކާ، އޮސްޓްރޭލިއާ އަދި ގްރީސް ހިމެނެއެވެ.

މަޝްހޫރު ޝެފް މަހާއަކީ ކުރީގެ ޝެފްސް ގިލްޑް އޮފް މޯލްޑިވްސްގެ ސެކްރެޓަރީ ޖެނެރަލްކަން ކޮށްފައިވާ ފަރާތެކެވެ. މިހާރު މަހާ މަސައްކަތް ކުރަމުންދަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންގެ ބޯޑް މެމްބަރެއްގެ ގޮތުގައެވެ.

ފާއިތުވި އަހަރުތަކުގެ ތެރޭގައި މަހާ ވަނީ ކަލިނަރީގެ ދާއިރާއިން ޤައުމީ އަދި ބައިނަލްއަޤުވާމީ އެތައް އެވޯޑުތަކެއް ހާސިލްކޮށްފައެވެ.

މަހާ އަކީ މިހާރު ރާއްޖޭގައި ތިބި މަދު އަންހެން އެގްޒެކެޓިވް ޝެފުންގެ ތެރެއިން އެކަކެވެ. އަދި ރާއްޖެއިން މާސްޓާ ޝެފުގެ ލަގަބު ލިބުނު ފުރަތަމަ ދިވެހި ޝެފެވެ.

ތައިލެންޑުގެ ބެންކޮކްގައި ކުރިއަށްދާ ވޯލްޑް ޖޫނިޔާ ޝެފް ޗެލެންޖް މުބާރާތް ކުރިއަތްދަނީ މި މަހުގެ 28 އިން 31 އަށެވެ.