ފަގީރުކަން ވަޒަންކުރާ މިންގަނޑުގެ ސަބަބުން ތަރައްޤީ ހަމަހަމަކުރަން ފަސޭހަވޭ: ގެދޮރުވެރިކަމާބެހޭ ވަޒީރު

ފަގީރުކަން ވަޒަންކުރާ މިންގަނޑު، މަލްޓި ޑިމެންޝަނަލް ޕޮވާޓީ އިންޑެކްސް (އެމްޕީއައި)ގެ ސަބަބުން މާލެއާއި އަތޮޅު ތެރެ ހަމަހަމަކަމާއެކު ތަރައްގީ ކުރުމަށް ފަސޭހަވެފައިވާކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވަޒީރު ޑރ. ޢަލީ ޙައިދަރު އަހުމަދު ވިދާޅުވެއްޖެއެވެ. ވަޒީރު މިހެން ވިދާޅުވީ އުޒްބަކިސްތާނުގައި ކުރިއަށްދާ މަލްޓިޑައިމެންޝަނަލް ޕޮވަޓީ ޕިއާސް ނެޓްވޯކްގައި ވާހަކަދައްކަވަމުންނެވެ.

ގެދޮރުވެރިކަމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވީ މަލްޓި ޑިމެންޝަނަލް ޕޮވާޓީ އިންޑެކްސް، އެމްޕީއައި ބަލައިގަތުމުގެ ސަބަބުން ދިވެހިންގެ ދިރިއުޅުމުގެ ފެންވަރު ރަނގަޅުކުރުމަށް މުހިންމު އެކި ދާއިރާތައް ދެނެގަނެ، އެކަމަށް ހައްލު ހޯދުމުގެ ފުރުސަތު ސަރުކާރަށް ލިބިފައިވާކަމަށެވެ. އަދި ރާއްޖެ އިތުރަށް ތަރައްޤީކުރާއިރު ވެރިކަންކުރާ މާލެއާއި އަތޮޅުތެރެ ހަމަހަމަކަމާއެކު ތަރައްޤީކުރަންޖެހޭކަމަށާއި، އެގޮތަށް ކަންކަން ބައްޓަން ކުރުމަށް އެމްޕީއައިގެ ސަބަބުން ގިނަ ފަސޭހަތަކެއް ލިބޭކަމަށްވެސް ވަޒީރު ވިދާޅުވިއެވެ.

ވަޒީރުގެ ވާހަކަފުޅުގައިވަނީ ސަރުކާރުން ކުރިއަށްގެންދާ އިސްލާޙީ ފިޔަވަޅުތަކަށްވެސް އަލިއަޅުއްވާލައްވާފައެވެ. އެގޮތުން ސަރުކާރުން އަމާޒުހިފައިވަނީ ސަބްސިޑީއާއި އިޖުތިމާޢީ އިނާޔަތްތައް އެންމެ ބޭނުންޖެހިފައިވާ މީހުންނަށް ދެވޭނެ އިންތިޒާމު ހަމަޖެއްސުމަށް ކަމަށް ވަޒީރު ވިދާޅުވިއެވެ.

އެމްޕީއައި ތައާރަފްކުރުމާއެކު މޯލްޑިވްސް ބިއުރޯ އޮފް ސްޓެޓިސްޓިކްސް އިން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާ ގުޅިގެން ރާއްޖޭގެ ފަގީރުކަމުގެ ނިސްބަތް ދެނެގަނެ އެ ނިސްބަތް ދަށްކުރުމަށް މަސައްކަތްތަކެއް ފަށައިފައިވާކަންވެސް ވަޒީރު ވަނީ ފާހަގަކުރައްވާފައެވެ. އެގޮތުން 2020 ވަނަ އަހަރު އެމްޕީއައިގެ ފުރަތަމަ ހޯދުމުން އެނގިފައިވާ ގޮތުން ރާއްޖޭގެ އާބާދީގެ ނިސްބަތުން ކޮންމެ 10 މީހަކުން އެކަކީ ފަގީރެއްކަމަށް ވަޒީރު ވިދާޅުވިއެވެ. އެހެންކަމުން ރާއްޖޭގެ އާބާދީގެ 28 އިންސައްތައަކީ ފަގީރުންކަމަށް ވަޒީރުގެ ވާހަކަފުޅުގައި ވަނީ ވިދާޅުވެފައެވެ.

‎އާމްދަނީގެ ފަގީރުކަމުގެ ބަދަލުގައި ބަލާ މަލްޓި ޑިމެންޝަން ޕޮވަޓީ އިންޑެކްސް ނުވަތަ އެމްޕީއައިއަކީ ތަފާތު އެކި ނަޒަރުން ފަގީރުކަން ވަޒަންކުރުމަށް އެކުލަވާލެވޭ މިންގަނޑެކެވެ.