އިމާމުން ތާޒާކުރުމުގެ ޕްރޮގްރާމްގައި މިހާތަނަށް 157 އިމާމުން ބައިވެރިވެއްޖެ
-
މި ޕްރޮގްރާމް ކުރިއަށް ގެންދަނީ 11 ސަރަހައްދަކަށް ބަހާލައިގެން
-
މި ޕްރޮގްރާމުގައި ޖުމްލަ 9 މާއްދާއެއް ކިޔަވައިދޭނެ
އިމާމުން ތާޒާކުރުމުގެ ގައުމީ މަޝްރޫއުގެ ދަށުން މިހާތަނަށް 157 އިމާމުން ތަމްރީނުކޮށްފައިވާކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއްޖެއެވެ.
އިސްލާމީ ކަންތައްތަކާބެހޭ ވުޒާރާއިން ވިދާޅުވީ އިމާމުން ތާޒާކުރުމުގެ ގައުމީ މަޝްރޫއުގެ ދަށުން ކުރިއަށްގެންދާ ޕްރޮގުރާމުގެ ތިންވަނަ ބުރު 40 އިމާމުން ފުރިހަމަކޮށް، ސެޓްފިކެޓު ހާސިލްކޮށްފައިވާ ކަމަށެވެ. މި ތަމްރީނު ޕްރޮގުރާމް ކުރިއަށް ގެންގޮސްފައިވަނީ ވ އަދި މ އަތޮޅުގެ އިމާމުންނަށްކަމަށްވެސް އެ ވުޒާރާއިން ވުދާޅުވެއެވެ.
މިހާތަނަށް އިމާމު ކޯސް ފުރިހަމަކޮށްފައިވަނީ ގއ،ގދ އަތޮޅުން 77 އިމާމުން، ފުވައްމުލަކުން 40 އިމާމުން، މ، އަދި ވ އަތޮޅުން 40 އިމާމުން ވަނީ ތަމްރީނު ވަނީ ވެފައެވެ. މިއާއެކު ޖުމްލަ 157 އިމާމުން ޕްރޮގްރާމް ނިންމާ ސެޓްފިކެޓު ހާސިލްކޮށްފައިވާކަން އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.
އިމާމުން ތަމްރީންކުރުން ނުވަތަ ތާޒާކުރުމުގެ ގައުމީ މަޝްރޫއަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ކުރިއަށްގެންދާ ޕްރޮގުރާމެއްކަމަށް އެ ވުޒާރައިން ވިދާޅުވެއެވެ.
މި ޕްރޮގްރާމުގައި ޖުމްލަ 9 މާއްދާއެއް ކިޔަވައިދޭކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި، ތަޖުވީދުގެ ޢިލްމާއި، ތަފްސީރާއި، ފިޤުހާއި، ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިއްމު ކަންކަން އުނގަންނައިދޭނެކަމަށް އެ ވުޒާރާއިން ވިދާޅުވެއެވެ.
މީގެއިތުރުން މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް މި ޕްރޮގުރާމުގެ ތެރެއިން އިމާމުންގެ ޝަޚްޞިއްޔަތު ބިނާކުރެވޭނެކަމަށްވެސް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.
އިސްލާމީ ކަންތައްތަކާބެހޭ ވުޒާރާއިން ވިދާޅުވީ ސަރުކާރުގެ އަމާޒަކީ އިމާމުން ތާޒާކުރުމުގެ ގައުމީ މަޝްރޫއުގެ ތެރެއިން މި އަހަރުގެ ނިޔަލަށް 700 އިމާމުން ތަމްރީންކުރުންކަމަށެވެ.