ޤައުމީ ދުވަހާއި ގުޅުވައިގެން 5 ސެޕްޓެމްބަރުވެސް ބަންދު
-
ޤައުމީ ދުވަހަކީ ސެޕްޓެމްބަރު 4
-
ޤައުމީ ދުވަހުގެ ޙާއްސަ ޖަލްސާ މާލެއާއި އުތީމުގައި ބާއްވާނެ
ޤައުމީ ދުވަހާ ގުޅުވައިގެން އަންނަ ސެޕްޓެމްބަރު މަހުގެ 5 ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވައިފިއެވެ.
ދިވެހިރާއްޖޭގެ ޤައުމީ ދުވަހަކީ ރަބީޢުލްއައްވަލްމަހުގެ 1 ވަނަ ދުވަހުއެވެ. މި ދުވަސް މިއަހަރު ދިމާވަނީ އަންނަ ސެޕްޓެމްބަރު މަހުގެ 4 ވަނަ ދުވަހާއެވެ.
ރައީސުލްޖުމްހޫރިއްޔާގެ އޮފީހުން ނެރުއްވި ދެންނެވުމެއްގައި ވިދާޅުވީ ސެޕްޓެމްބަރު 5 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވާކަމަށެވެ.
ޤައުމީ ދުވަސް ފާހަގަކުރުމުގެ ގޮތުން މިއަހަރު ހާއްސަ ޖަލްސާ މާލެއާއި ހއ. އުތީމުގައި ބާއްވަން ސަރުކާރުން ވަނީ ނިންމަވާފައެވެ.
މީގެ އިތުރުން މި ދުވަސް ފާހަގަކުރުމަށް ށ. އަތޮޅު ކައުންސިލުން އިސްނަގައިގެން އެ އަތޮޅު މާއުނގޫދޫގައި ހަރަކާތްތަކެއް ހިންގުމަށް ރާވާފައިވާކަމަށްވެސް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ވިދާޅުވެއެވެ.
ޤައުމީ ދުވަސް ފާހަގަކުރަނީ ޕޯޗުގީޒުންގެ އަޅުވެތިކަމުގެ ދަށުން ރާއްޖެ މިނިވަންވި ދުވަހާ ގުޅިގެންނެވެ. ޕޯޗުގީޒުންގެ ކިބައިން ރާއްޖެ މިނިވަންވީ 1573 ވަނަ އަހަރު، އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމާއި އިތުރު 5 ބޭކަލަކު އިސްވެކުރެއްވި ޖިހާދުގެ ސަބަބުންނެވެ.