ޕަބްލިކް ސަރވިސް މީޑިއާ، ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް ގ. ދިލްކަޝް، މުޙައްމަދު ސަޢީދު އައްޔަނުކުރައްވައިފިއެވެ.
މިކަމާއި ގުޅިގެން ޕްރައިވެޓައިޒޭޝަން ބޯޑުން ނެރުއްވި ބަޔާނުގައި ވިދާޅުވީ މުޙައްމަދު ސަޢީދު އައްޔަނުކުރައްވާފައިވަނީ މެނޭޖިން ޑިރެކްޓަރ އަދި ޑިރެކްޓަރުންގެ ބޯޑުގެ މެންބަރުކަމުގެ މަޤާމަށްކަމަށެވެ.
ސަޢީދު މި މަޤާމަށް އައްޔަނުކުރެއްވީ ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕްރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނުގެދަށުންނެވެ.
މުޙައްމަދު ސަޢީދު މަޤާމަށް އައްޔަނުކުރެއްވީ ޕަބްލިކް ސަރވިސް މީޑިއާގެ މެނޭޖިން ޑިރެކްޓަރުކަމުގެ މަޤާމުގައި ހުންނެވި ގދ.ގައްދޫ، އަތިރީގެ ޒީނާ ޒާހިރު އެ މަޤާމުން އިސްތިއުފާދެއްވުމުންނެވެ.
މުޙައްމަދު ސަޢީދު ވަނީ 1989 ވަނަ އަހަރުން ފެށިގެން ސަރުކާރުގެ އެކި މަޤާމްތައް ފުރުއްވާފައެވެ. އެގޮތުން އެޑިއުކޭޝަން މިނިސްޓްރީގެ ޕަރމަނަންޓް ސެކްޓްރީކަމާއި ޑިރެކްޓަރ ޖެނެރަލްގެ މަޤާމުވެސް ފުރުއްވާފައިވެއެވެ. އަދި މީޑިއާ އޮފިސަރެއްގެ މަޤާމުން ފެށިގެން ތައުލީމީ ދާއިރާގެ އެކިއެކި މަޤާމުތައް ފުރުއްވާފައިވެއެވެ. މީގެއިތުރުން ސަރުކާރުގެ މުހިންމު އެކިއެކި ކޮމިޓީތަކާއި އާސަންދަ ކުންފުނީގެ ބޯޑު މެންބަރުކަންވެސް ކުރައްވާފައިވެއެވެ.
މުޙައްމަދު ސަޢީދު ވަނީ އިނގިރޭސި ވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ހާސިލްކުރައްވާފައެވެ. ސަޢީދު ވަނީ މީޑިއާ ދާއިރާއިންވެސް ތަޢުލީމު ހާސިލުކުރައްވާފައެވެ. އެގޮތުން ޔޫކޭ ލަންޑަން، މީޑިއާ ޕްރޮޑަކްޝަން ސަރވިސްގައި، ޑިޕްލޮމާ އިން އެޑްވާންސް ޓެލެވިޜަން ޕޮރޮޑަކްޝަން އެންޑް ޑިރެކްޝަން ޓެކްނީކްސް ކޯސް ފުރިހަމަކުރައްވާފައިވެއެވެ.