ފުވަައްމުލަކު ސިޓީ ނޭޗަރ ޕާކް އިތުރަށް ތަރައްޤީކުރަނީ

ފުވައްމުލަކު ސިޓީގެ ނޭޗަރ ޕާކް އިތުރު ޙިދުމަތްތަކާއެކު ތަރައްގީކުރާނެކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.

ވަޒީރު މިހެން ވިދާޅުވީ، ސިޓީތަކަށް ކުރައްވަމުން ގެންދަވާ ދަތުރުފުޅުގައި ފުވައްމުލަކު ސިޓީއަށް ވަޑައިގެން އެ ސިޓީގެ ނޭޗަރ ޕާކުގެ ހާލަތުބައްލަވާލެއްވުމަށްފަހު، ޕީއެސްއެމްނިއުސްއަށް ދެއްވި އިންޓާވިއުއެއްގައެވެ.

މޫސުމީ ބަދަލުތަކާއި، ތިމާވެށްޓާއި، ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވީ، ފުވައްމުލަކު ސިޓީގައި ލޯކަލް ޓޫރިޒަމް ކުރިއަރާފައިވާއިރު، ރަށުގެ ނެޗަރޕާކް ހިމެނޭ ސަރަހައްދަކީ ގުދުރަތީ ގޮތުން އުފެދިފައިވާ މުހިއްމު ތަނަކަށްވުމުން ފަތުރުވެރިންގެ ޝައުޤުވެރިވާ ގޮތަށް އެތަން ތަރައްޤީކުރަން އިސްކަންދޭންޖެހޭ ކަމަށެވެ.

މީގެއިތުރުން، ފުވައްމުލަކު ސިޓީ ކައުންސިލާއި ނޭޗަރ ޕާކު ބަލަހައްޓާ ފަރާތުންވެސް ބޭނުންވަނީ އެސަރަޙައްދަށް ޒިޔާރަތްކުރާ ފަތުރުވެރިންނަށް ފޯރުކޮށްދެވޭ ޚިދުމަތްތައް ފުޅާކޮށް، ތަނުގެ ބޭނުން ފަސޭހަކަމާއެކު ހިފޭނެ ގޮތްތައް ޤާއިމުކޮށްދިނުމަށް ކަމަށް ވަޒީރު ވިދާޅުވިއެވެ.

ވަޒީރުގެ ވިދާޅުވީ ނޭޗަރ ޕާކު ތަރައްގީކުރުމުގެ މަޝްރޫޢުގެ ދަށުން އިތުރު ބްރޯޑްވޯކްތަކެއް ޤާއިމުކުރުމާއި، ޕާކު ވަށައިގެންވާ ގަސްގަހާ ގެހި ފަސޭހައިން ބަލައިލެވޭނެ ގޮތަށް މަގުތަކެއް ތަރައްޤީކުރުން ހިމެނޭ ކަމަށެވެ. މީގެ އިތުރުން، ނޭޗަރ ޕާކު އިތުރަށް ތަރައްޤީކުރުމަށް ފުވައްމުލަކު ސިޓީ ކައުންސިލާ މަޝްވަރާކުރައްވައި، ޕްލޭނެއް އެކުލަވާލައްވައި، އެ މަސައްކަތް ކުރިއަށް ގެންދަވާނެ ކަމުގެ ޔަޤީންކަން ވަޒީރު ދެއްވިއެވެ.

"އަޅުގަނޑުމެން މިކަމަށް ކައުންސިލާއެކު މަސައްކަތްކޮށް ޕްލޭންއެއް އެކުލަވާލެވި އަޅުގަނޑުމެންނަށް މިކަންކަން ކުރިއަތް ގެންދެވޭނެ ގޮތަކަށް ރާވާފައި ސިޓީ ކައުންސިލާއެކު ކުރިއަތް ގެންދާނަން. ދެން އަޅުގަނޑުވެސް ބޭނުންވަނީ މި ކަހަލަ ނޭޗަރ ޕާކްސްތަކާއި މުހިންމު ހިމާޔަތްކޮށްފައި ހުރި ސަރަހައްދުތައް ރަނގަޅު ގޮތުގައި ބޭނުން ކުރެވޭ ތަންތަނަށް ހެދުން" ވަޒީރު ވިދާޅުވިއެވެ.

މޫސުމީ ބަދަލުތަކާއި، ތިމާވެށްޓާއި، ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވީ، ސަރުކާރުން ނިންމާފައިވާ ގޮތަށް މިހާރު ހުރި ޤުދުރަތީ މާހައުލުތައް އިތުރަށް ތަރައްޤީކުރުމުގެ އިތުރުން، ދިވެހިރާއްޖޭގެ ކޮންމެ އަތޮޅެއްގައި 1 ނޭޗަރ ޕާކް ގާއިމުކުރުމުގެ މަސައްކަތް ކުރިއަށް ގެންދަވާނެ ކަމަށެވެ.

ކުރިއަށް އޮތް 5 އަހަރުގެ ތެރޭގައި ރާއްޖޭގައި ހުރި ނޭޗަރ ޕާކުތައް ފުރިހަމައަށް ތަރައްޤީވެގެންދާނެ ކަމަށް ވަޒީރުވަނީ ވިދާޅުވެފައެވެ.

2018 ވަނަ އަހަރުގެ ސެޕްޓެމްބަރ 14ގައި ހުޅުވުނު ފުވައްމުލަކު ނޭޗަރ ޕާކަކީ އެސިޓީގެ ދަޑިމަގި ކިޅީގެ ވަށައިގެންވާ ފެންގަނޑުތަކާއި ފަސްގަނޑުތައް ހިމެނޭގޮތަށް އޮންނަ ތިމާވެށްޓާ ރައްޓެހި ޕާކެކެވެ.

ފުވައްމުލަކު ސިޓީގެ ނޭޗަރޕާކާއި އެސަރަހައްދު ތަރައްޤީކޮށްފައިވަނީ ޔޫރަޕިއަން ޔޫނިއަންގެ ފަންޑުން ހިންގި މޫސުމަށް އަންނަ ބަދަލުތަކާ އެކަށީގެންވާގޮތަށް ޕާކުތައް ތަރައްޤީކުރުމުގެ މަޝްރޫޢުގެ ދަށުންނެވެ.

އެތަން ފަރުމާކޮށްފައިވަނީ ޕާކަށް ޒިޔާރަތްކުރާ ފަރާތްތަކަށް އެތަނުގެ ޤުދުރަތީ މަންޒަރުގެ ރީތިކަން ބަލާލައި، ކުޅީގައި ކެނޯ އަދި ޕެޑަލް ބޯޓު ދުއްވުން ފަދަ ކުޅިވަރުތަކާއެކުގައެވެ.