"ޑިސްކަވާ މޯލްޑިވްސް" ސިލްސިލާ ވެބިނަރގެ ފުރަތަމަ ސެޝަން ފަރަންސޭސިވިލާތުގެ މާކެޓަށް!

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަނުން "ޑިސްކަވާ މޯލްޑިވްސް" ގެ ނަމުގައި ސިލްސިލާ ވެބިނާއެއް ފަށައިފިއެވެ. މި ވެބިނަރތަކަކަކީ ދުނިޔޭގެ ކީ މާކެޓްތަކުގައި ރާއްޖޭގެ ޑެސްޓިނޭޝަން ޕްރެޒެންސް އިތުރަށް ހަރުދަނާކުރުމަށާއި ޓްރެވަލް ޓްރޭޑް ޕްރޮފެޝަނަލުންނާއި ގުޅުން ބަދަހިކުރުމުގެ މަގްސަދުގައި ކުރިއަށް ގެންދާ ވެބިނަރތަކެކެވެ.

މި ވެބިނަރ ފަށާފައިވަނީ ފަރަންސޭސިވިލާތުގެ މާކެޓަށް އަމާޒުކޮށްގެން މިމަހުގެ 21 ގައެވެ. ކޮންމެ ވެބިނާއެއްގައި ވެސް ގާތްގަނޑަކަށް 60-80 ޓްރެވަލް ޕްރޮފެޝަނަލުންނާއި ޓްރޭޑް މީޑިއާއަށް ޓާގެޓް ކުރާކަމަށް އެމްއެމްޕީއާރުސީން ވަނީ ބުނެފައެވެ. މި ވެބިނަރ ސިލްސިލާ ކުރިއަށް ގެންދަނީ އެކި މާކެޓުތަކުގައި ޓްރެވަލް އެޖެންޓުންނާއި ޓުއާ އޮޕަރޭޓަރުންނާ އެކު ހަރުދަނާ ގޮތެއްގައި މުއާމަލާތް ކުރެވޭނެ އިންތިޒާމު ހަމަޖެއްސުމުގެ ގޮތުން އެ މާކެޓެއްގެ މާދަރީ ބަހުރުވައިންނެވެ.

"ޑިސްކަވަރ މޯލްޑިވްސް" ވެބިނާ ސިލްސިލާގައި ރާއްޖޭގެ ފަތުރުވެރިކަމުގެ ސިނާއަތުގެ ޕާޓްނަރުންގެ އަގުހުރި މައުލޫމާތު ހުރި ޕްރެޒެންޓޭޝަންތައް ފެނިގެންދާނެއެވެ. ފަރަންސޭސިވިލާތުގެ މާކެޓަށް އަމާޒުކޮށްގެން ބޭއްވި ފުރަތަމަ ވެބިނާ ސެޝަނަކީ ފަރަންސޭސިވިލާތް އަދި ފަރަންސޭސި ބަހުން ވާހަކަ ދައްކާ ޤައުމުތަކުގައި އެންމެ މަޤްބޫލް ފަތުރުވެރިކަމުގެ މަންޒިލްގެ ގޮތުގައި ރާއްޖޭގެ ހިތްގައިމުކަން ދައްކުވައިދިން ސެޝަނެއްކަމަށް އެމްއެމްޕީއާރުސީން ވަނީ ބުނެފައެވެ.

މި ވެބިނާ ސިލްސިލާގެ މައިގަނޑު މަގުސަދަކީ މުހިންމު އަދި ކުރިއަރަމުން އަންނަ މާކެޓްތަކުން ރާއްޖެއަށް އަންނަ ފަތުރުވެރިންގެ އަދަދު ދެމެހެއްޓުމާއި އިތުރުކުރުމެވެ. އެމްއެމްޕީއާރުސީގެ އަމާޒަކީ ދުނިޔޭގެ ފަތުރުވެރިންގެ މެދުގައި ރާއްޖޭގެ ދަރަޖަ އިތުރަށް ހަރުދަނާކުރުމެވެ. "ޑިސްކަވަރ މޯލްޑިވްސް" ވެބިނާގެ ތެރެއިން ފަތުރުވެރިކަމުގެ ތަފާތު އުފެއްދުންތަކާއި، ރާއްޖޭގައި ލިބެންހުރި ތަފާތު ތަޖުރިބާތައް ފާހަގަކޮށް، އެކި ބާވަތުގެ ފަތުރުވެރިން ރާއްޖެއައުމަށް ޝައުޤުވެރިކުރުވުމަކީވެސް އަމާޒެއްކަމަށް އެމްއެމްޕީއާރުސީން ވަނީ ބުނެފައެވެ.

މިއަހަރުގެ ފާއިތުވި 8 މަސް ދުވަހުގެ ތެރޭގައި ރާއްޖެއަށް އެކި މުހިންމު މާކެޓްތަކުން އަންނަ ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފައެވެ. "ޑިސްކަވާ މޯލްޑިވްސް" ވެބިނާ ސިލްސިލާގެ މަގްސަދަކީ އެކި ސަރަޙައްދުތަކުގައި ޑެސްޓިނޭޝަން ޕްރެޒެންސް އިތުރަށް ހަރުދަނާކޮށް، ރާއްޖެއަށް ގިނަ އަދަދެއްގެ ފަތުރުވެރިން ގެނައުމެވެ.