މޯލްޑިވިއަންގެ ދަތުރުތައް އަލުން ބަންގްލަދޭޝަށް ފަށައިފި

ޤައުމީ އެއަރލައިން، މޯލްޑިވިއަނުން ބަންގްލަދޭޝްގެ ޑާކާއަށް ކުރަމުން އައި ދަތުރުތައް އަލުން ފަށާފައިވާކަމަށް މޯލްޑިވިއަނުން ވިދާޅުވެއްޖެއެވެ. މޯލްޑިވިއަނުން ބަންގްލަދޭޝަށް ކުރަމުންއައި ދަތުރުތައް މެދުކަނޑާލީ އެޤައުމުގައި ހިނގަމުންދިޔަ ހަމަނުޖެހުންތަކާއި ގުޅިގެން ހާލަތު ގޯސްވުމުން މިމަހުގެ 6ވަނަ ދުވަހުއެވެ.

މޯލްޑިވިއަނުން ވިދާޅުވީ މިހާރު އަލުން ބަންގްލަދޭޝްއަށް ކުރަމުންއައި ދަތުރުތައް ފަށައިގެން ކުރިއަށްދާކަމަށެވެ. ނަމަވެސް ފްލައިޓްގެ ޢަދަދު ވަނީ މަދުކޮށްފައެވެ.

ކުރިން ހަފްތާއަކު 2 ދަތުރު މޯލްޑިވިއަނުން ބަންގްލަދޭޝަށް ކުރަމުންދިޔަނަމަވެސް މިހާރު ކުރަނީ ހަފްތާއަކު އެންމެ ދަތުރެއްކަމަށް މޯލްޑިވިއަނުން ވިދާޅުވެއެވެ.

ބަންގްލަދޭޝަކީ މޯލްޑިވިއަނުން ދަތުރުކުރަމުންދާ ބައިނަލްއަޤްވާމީ މަދު މަންޒިލްތަކުގެ ތެރެއިން މަންޒިލެކެވެ. މޯލްޑިވިއަނުން ބައިނަލްއަޤްވާމީ ދަތުރުތައް މިހާރު ކުރަމުންދަނީ ބަންގްލަދޭޝްގެ އިތުރުން އިންޑިއާގެ ޓްރިވެންޑްރަމާއި، ކޮޗިން އަދި ބެންގަލޫރަށެވެ.

މޯލްޑިވިއަނަށް ވައިޑް ބޮޑީ އެއަރކްރާފްޓް ހޯދައި އިތުރު މަންޒިލްތަކަށް އެ އެއަރލައިންގެ ދަތުރުތައް ބޭއްވުމަށް ދަނީ މަސައްކަތް ކުރަމުންނެވެ.