ވިލާތުގެ އިއްތިހާދު ނުވަތަ އީޔޫއަކީ ރާއްޖެއަށް މުހިންމު ބައިވެރިއެއްކަމަށް ޚާރިޖީ ވަޒީރާ ދުންޔާ މައުމޫން ވިދާޅުވެއްޖެއެވެ.
މިއަދު ފެށުނު މޯލްޑިވްސް އީޔޫ ޕޮލިސީ ޑައިލޮގްގެ ބައްދަލުވުން ފަށްޓަވައިދެއްވާ ވާހަކަފުޅު ދައްކަވަމުން ޚާރިޖީ ވަޒީރާ ދުންޔާ މައުމޫން ވިދާޅުވީ، އިޔޫއަކީ ރާއްޖެއަށް މުހިންމު ބައިވެރިއަކަށް ވަނީ ރާއްޖެއަށް ޔޫރަޕުގެ އިއްތިޙާދުގެ ޤައުމުތަކުން ގިނަ އަދަދެއްގެ ފަތުރުވެރިން ޒިޔާރަތްކުރުމާއި، އަދި އެ އިއްތިޙާދުގެ ޤައުމުތަކުން ރާއްޖެއަށް ފޮރިން އިންވެސްޓްމަންޓްތައްވެސް ލިބެމުންދާތީކަމަށެވެ. އަދި ޓުއަރިޒަމް މާސްޓަރ ޕްލޭން ތަރައްޤީކުރުމާއި، ޓޫރިޒަމާބެހޭ ޤަވާއިދުތައް އެކުލަވާލުމުގައިވެސް ޓޫރިޒަމްގެ އެންމެ ޅަފަތުގައިވެސް އެހީތެރިކަން ލިބިފައިކަން މިނިސްޓަރ ފާހަގަކުރެއްވިއެވެ.
މިނިސްޓަރ ދުންޔާ ވިދާޅުވީ މި ބައްދަލުވުމަކީ ސީދާ ގޮތެއްގައި އީޔޫއާ އަދި ރާއްޖެއިންވެސް އެންމެ އިންކަންދޭ ކަންކަމާމެދު މަޝްވަރާކުރުމަށް ހުޅުވިގެންދާ މުހިންމު ފުރުޞަތެއްގެ އިތުރުން ދެފަރާތުގެ ގުޅުން ވަރުގަދަ ކުރުމަށްވެސް ލިބުގެންދާ ފުރުޞަތެއްކަމަށެވެ. އަދި މި ބައްދަލުވުމުގެ ސަބަބުން ރާއްޖޭގެ މުހިންމު ޕޮލިސީތަކާބެހޭ އެންމެ ފަހުގެ މަޢުލޫމާތުތައް ލިބިގެންދާނެކަން މިނިސްޓަރ ފާހަގަކުރެއްވިއެވެ.
މިނިސްޓަރ ދުންޔާގެ ވާހަކަފުޅުގައި ރާއްޖޭގައި ޑިމޮކްރަސީ ހަރުދަނާކުރުމަށް ދިވެހިސަރުކާރާ ގުޅިގެން އީޔޫއިން އެކްޓިވް ރޯލެއް އަދާކުރެއްވުމަށް އެދިވަޑައިގަންނަވާ ކަމަށްވެސް ވިދާޅުވިއެވެ.
ރާއްޖޭގެ ޝަރުޢީ ނިޒާމް ހަރުދަނާކުރެއްވުމަށް އީޔޫގެ އެހީތެރިކަން ލިބިފައިވާކަން ފާހަގަކުރައްވާ ވާހަކަދައްކަވަމުން މިނިސްޓަރ ވަނީ މޫސުމަށް އަންނަ ބަދަލުތަކާ ގުޅޭކަންކަމުގައިވެސް ވިލާތުގެ އިއްތިޙާދާއި، އެ އިއްތިހާދުގައި ހިމެނޭ ޤައުމުތަކުން ލިބެމުންދާ އެއްބާރުލުން ފާހަގަކުރައްވާފައެވެ.