ކޮންގޯގެ މިނިވަންދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި

ކޮންގޯގެ މިނިވަންދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.

ރައީސުލްޖުމްހޫރިއްޔާ، ކޮންގޯގެ 64 ވަނަ މިނިވަން ދުވަހުގެ ތަހުނިޔާ ފޮނުއްވީ އެ ޤައުމުގެ ރައީސް ޑެނިސް ސަސޯ އެންގުއެސޯއަށާއި ބޮޑުވަޒީރު އަނަޓޯލް ކޮލިނޭ މަކަސޯއަށް ފޮނުއްވި މެސެޖެއްގައެވެ. އެ މެސެޖުގައި ރައީސް ވަނީ ދިވެހި ސަރުކާރާއި ދިވެހީންގެ ނަމުގައި ކޮންގޯގެ ރައްޔިތުންނަށާއި އެ ޤައުމުގެ ސަރުކާރަށް ހެޔޮ އެދުންތައް ފޮނުއްވާފައެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ ކޮންގޯގެ ރައީސާއި ބޮޑުވަޒީރަށް ދުޅަހެޔޮ ޞިއްޙަތަކަށް އެދިވަޑައިގަންނަވަމުންނެވެ. އަދި، އެ ޤައުމުގެ ރައްޔިތުންނަށް ކުރިއެރުމާއި ފާގަތިކަން ލިބިގެންދިއުމަށް އެދިވަޑައިގަންނަވާ ކަމަށްވެސް ރައީސުލްޖުމްހޫރިއްޔާ ފޮނުއްވެވި މެސެޖުގައި ވިދާޅުވިއެވެ.

ކޮންގޯއަށް މިނިވަންކަން ލިބުނީ 15 އޯގަސްޓް 1960ގައެވެ.