ސޫރިޔާ ސަރުކާރުގެ ކޮންޓްރޯލްގެ ދަށުގައިވާ ދެރަށްކަމަށްވާ ޖަބްލާ އާއި ތަރްތޫސް އަށް ދިން ޓެރަރިސްޓް ޙަމަލާތަކެއްގައި ސަތޭކަ ފަންސާހަށްވުރެ ގިނަ މީހުން މަރުވެ ދުއިސައްތަ އެއްހާ މީހުން ޒަޚަމްވެއްޖެއެވެ.
މިދެރަށުގެ އެކިތަންތަނަށް މިޙަމަލާތައް ދިނީ ކާރުބޮންތަކެއް ގޮއްވާލައި ބަޔަކު އަމިއްލައަށް މަރުވެގެންކަމަށް އިންސާނީ ހައްގުތަކަށް މަސައްކަތްކުރާ ސޫރިޔާގެ މުސްތަގިއްލު ޖަމާއަތެއްކަމަށްވާ ސީރިޔަން އޮބަޒަވޭޓްރީ ފޯރ ހިޔުމަން ރައިޓްސް އިން ބުނެއެވެ. މިދެހަމަލާގެ ޒިންމާ އައިއެސްޖަމާއަތުން މިހާރުވަނީ އުފުލާފައެވެ.
މެޑިޓަރޭނިޔަން ކަނޑުގެ އައްސޭރިފަށުގައިވާ ޖަބްލާ އާއި ތަރްތޫސް އަކީ ސޫރިޔާގައި ހިނގަމުންދާ ދާޚިލީ ހަނގުރާމައިގެ އަސަރު މާބޮޑަށް ނުކުރާ، ނިސްބަތުން އަމާން ދެރަށެވެ. އެދެރަށަށް ހޯމަދުވަހު ދިން ޓެރަރިސްޓް ޙަމަލާތަކުގެ ޒިންމާ ވަނީ ހައްދު ފަހަނަޅާފައިވާ އައިއެސް ޖަމާއަތުން އުފުލާފައެވެ.
img:http://s1.psmnews.mv/images/660x400/14640688853743.jpg|ސޫރިޔާގައި ބޮމުގެ ހަމަލާ ދީފައިވާ ސަރަހައްދެއް- ފޮޓޯ: ޒިންހުއާ
އައިއެސްގެ "އަލްއަޢްމާގް" ނޫސް އެޖެންސީން ބުނީ ޖަބްލާ އާއި ތަރްތޫސްގެ 5 ސަރަހައްދެއްގައި އެޖަމާޢަތުގެ ހަނގުރާމަވެރިން އަމިއްލައަށް މަރުވެގެން ކާރުބޮމުގެ ޙަމަލާތައް ދީފައިވާނެކަމަށާ އަދި އިތުރު ދެތަނެއްގައި ބޮން ގޮއްވާފައިވާނެ ކަމަށެވެ. މިއީ އެދެރަށުގައި ދިރިއުޅޭ ސޫރިޔާގެ ބައިމަދު އަލަވީ ޖަމާއަތުގެ މީހުންނަށް އަމާޒުކޮށްދިން ޙަމަލާތަކެއްކަމަށްވެސް އައިއެސް އިންނެރުނު ބަޔާނެއްގައި ބުނެފައިވެއެވެ. އަލަވީންނަކީ ސޫރިޔާގެ ރައީސް ބައްޝާރުލްއަސަދު ނިސްބަތްވެ ވަޑައިގަންނަވާ ޝިއައީ މަޛްހަބެކެވެ. ނަމަވެސް އައިއެސްގެ ޓެރަރިސްޓް ޙަމަލާތަކުގައި އަލަވީންގެ އިތުރުން ސުންނީންނާއި ދުރުޒީންވެސް މަރުވިކަމަށް ރިޕޯޓްތައް ބުނެއެވެ. ތަރްތޫސަށް ދިން ކާރުބޮމުގެ ޙަމަލާއެއްގެ މަންޒަރު ދުށް އެރަށުގެ ރައްޔިތެއް ކަމަށްވާ މުޙައްމަދު މުތްލެޖް ބުނީ ކާރުބޮމެއް ގޮއްވާލި މަންޒަރު އޭނާއަށް ފެނުނު ކަމަށާ އެހަމަލާއާއެކު އެތަށްބަޔަކު މަރުވެގެން ބިންމައްޗަށް ވެއްޓުނުކަމަށެވެ.
img:http://s2.psmnews.mv/images/660x400/14640689533374.jpg|ސޫރިޔާގައި ބޮމުގެ ހަމަލާ ދީފައިވާ ސަރަހައްދެއް- ފޮޓޯ: ޒިންހުއާ
ތަރްތޫސް އަކީ ސޫރިޔާގައިވާ ރަޝިޔާގެ އެންމެ ބޮޑު އަސްކަރީ ބޭސް ވެސް އޮންނަ ރަށެވެ. އެރަށުގައި ރަޝިޔާގެ ކަނޑުގެ ސިފައިންގެ ބޭހަކާއި އަސްކަރީ ބަނދަރެއް އޮވެއެވެ. އަދި ޖަބްލާގައި ރަޝިޔާގެ ވައިގެ ބޭހެއްވެސް އޮވެއެވެ. މިދެރަށަށް ދިން ޓެރަރިސްޓް ޙަމަލަތަކާ ގުޅިގެން ރަޝިޔާގެ ރިޔާސީ ގަނޑުވަރު ކްރެމްލިންއިން ބުނެފައިވަނީ މިއީ ޓެރަރިޒަމާ ހަނގުރާމަ ކުރުމަށްޓަކައި ސޫރިޔާގެ ރައީސް ބައްޝާރުލްއަސަދުގެ ސަރުކާރާ ގުޅިގެން އިތުރަށް މަސައްކަތް ކުރަންޖެހޭކަން ހާމަވެގެންދިޔަ ހަމަލާތަކެއް ކަމަށެވެ. ކްރެމްލިންގެ ތަރްޖަމާން ޑިމިޓްރީ ބިސްކޯވް ވިދާޅުވީ ޖަބްލާއާއި ތަރްތޫސްއަށް ދިން ޓެރަރިސްޓް ޙަމަލާތަކަކީ ސޫރިޔާގެ އަމަނާބެހޭ ހާލަތުގެ ބަލިކަށިކަން ހާމަވެގެންދިޔަ ޙަމަލާތަކެއް ކަމަށާ މިފަދަ ޙަމަލާތަކުން ސަލާމަތް ވުމަށްޓަކައި ސޫރިޔާގެ އިދިކޮޅު ފަރާތްތަކާއި ސަރުކާރާ ދެމެދު ޖެނީވާގައި ދައްކަމުން ގެންދިޔަ ސުލްޙައިގެ ވާހަކަތައް އަލުން ފެށުމުގެ މުހިއްމުކަން ހާމަވެގެން ހިނގައްޖެ ކަމަށެވެ.
ޖެނީވާގައި ކުރިޔަށްދިޔަ ސޫރިޔާގެ ސުލްހައިގެ ވާހަކަތައް ރޫޅިގެން ދިޔައީ އެވާހަކަތަކުން ކުރިއެރުން ނުލިބޭކަމަށްބުނެ މިމަހުގެ ކުރީކޮޅު ސޫރިޔާގެ އިދިކޮޅު ފަރާތްތައް އެވާހަކަތަކުން ވަކިވުމާގުޅިގެންނެވެ. ޖަބްލާއާއި ތަރްތޫސަށް އައިއެސް އިން ދިން ޓެރަރިސްޓް ހަމަލާތަކުން އެޖަމާއަތް ދޭން ބޭނުންވި މެސެޖަކީ އެމެރިކާއިސްވެ އޮވެގެންދޭ ޙަމަލާތަކާ އަދި ރަޝިޔާއިން ދޭ ޙަމަލާތަކުންވެސް އެޖަމާއަތް ބަލިކޮށް ނުލެވޭކަމުގެ މެސެޖް ކަމަށް މުރާސިލުން ބުނެއެވެ.