ޒުވާނުންނަށް ބަސް ނުބުނެވޭނެކަމެއް މިސަރުކާރުގައި ނޯންނާނެ: ރައީސުލްޖުމްހޫރިއްޔާ

މިސަރުކާރުގައި ޒުވާނުންނަށް ބަސް ނުބުނެވޭނެ ކަމެއް ނޯންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ، ދިވެހި ޒުވާނުންގެ ޤައުމީ ލަފާދޭ ކޮމިޓީ އިފްތިތާހުކޮށް ކޮމެޓީގެ ފުރަތަމަ ބައްދަލުވުމުގައި ވާހަކަފުޅުދައްކަވަމުންނެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީ އިފްތިތާހުކޮށްދެއްވާ މެންބަރުންނަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ބެޖު އަރުވާފައެވެ. މި ރަސްމިއްޔާތު އޮތީ ރައީސުލްޖުމްހޫރިއްޔާގެ އޮފީހުގައެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީގެ ފުރަތަމަ ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ، ޤައުމުގެ އާބާދީގެ އެންމެ ބޮޑު ބައެއް ހިއްސާކުރަނީ ޒުވާނުންކަމަށެވެ. ޒުވާނުންނަކީ ދައުލަތް ހިންގުމުގައި އަދި ދައުލަތުގެ އެހެން ހުރިހާ ކަމެއް ބައްޓަން ކުރުމުގައި ބަސް އިއްވާނެ ބަޔަކަށް ވާނެކަމަށެވެ. ރައީސަށް ލަފާއަރުވާ ކޮމެޓީއެއް އުފެދުމަކީ ވަރަށް އުފާފުޅުކުރައްވާކަމެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.

"ޒުވާނުންނަށް އެއްވެސް ކަހަލަ ލިމިޓެއް ވަކި ކަމެއްގައި ބަސް ނުބުނެވޭނެކަހަލަ ކަމެއް ނޯންނަގޮތަށް ދައުލަތުގެ ހުރިހާ ކަމެއްގައި ދިވެހިރާއްޖޭގެ އިމުގެ ތެރޭގައި ހިނގާ ކޮންމެ ކަމެއްގައިވެސް އަޅުގަނޑުގެ ޤާނޫނީ ޒިންމާ އަދާކުރުމުގައި ތިބޭފުޅުންނަށް ލަފާދެއްވޭނެ. އަޅުގަނޑު އެދިގެން ކަމެއް ކުރުމަށްވުރެ ބޮޑަށް ތިބޭފުޅުން އަޅުގަނޑު ގާތުގައި ކަންކަން ކުރަން ތިބޭފުޅުންނަށް ފެންނަ އެންމެ ރަނގަޅު ގޮތެއް ވިދާޅުވުމުގެ ފުރުސަތު މިއޮތީ." ރައީސް ވިދާޅުވިއެވެ.

ރައީސް ވަނީ ކޮމިޓީގެ ހުރިހާ މެންބަރުންވެސް ވަކި މީހެއްގެ ނުފޫޒަކަށް ނުޖެހި މިނިވަންކަމާއެކު މަސައްކަތްކުރުމަށް އިލްތިމާސްކުރައްވާފައެވެ. މީގެއިތުރުން ސީދާ ޒުވާނުންނަށްޓަކައި ކަންތައްތަކެއް ކުރުމުގެ އިތުރުން މުޅި މުޖްތަމައުގެ އެހެން ހުރިހާ ކަމަކަށްވެސް ޒުވާނުންގެ ފަރާތުން އުފެއްދުންތެރި ގޮތެއްގައި މަސައްކަތްތަކެއް ކޮށްދެއްވުމަށް ރައީސް ވަނީ އެދިވަޑައިގަންނަވާފައެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީގައި 15 މެންބަރުން ތިބެއެވެ. އޭގެތެރޭގައި ރައީސުލްޖުމްހޫރިއްޔާ އައްޔަންކުރައްވާ 2 މެންބަރުންނާއި، ކުޅިވަރު، މާކެޓިން، އެންޖީއޯތައް، ޕޮލިޓިކަލް، އެކައުންޓިން އެންޑް ފައިނޭންސް، މީޑިއާ އަދި ކޮލެޖްތައް ތަމްސީލްކުރާ ޒުވާނުން ހިމެނެއެވެ.