މިއަހަރުގެ ކުރިއަށްއޮތް ތަނުގައި 6 ނުވަތަ 8 ރިސޯޓު ހުޅުވޭނެ: ވަޒީރު ފައިޞަލް

މިއަހަރުގެ ކުރިއަށް އޮތް ތަނުގައި 6 ނުވަތަ 8 ރިސޯޓް ހުޅުވޭނެކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ. ވަޒީރު ވިދާޅުވީ، ރިސޯޓްތައް ހުޅުވުން އަވަސްކުރުމަށް ފަތުރުވެރިކަމާއި ބެހޭ ވުޒާރާގެ ފަރާތުން ފުރިހަމަ އެއްބާރުލުން ދެމުންދާކަމަށެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވީ، މިސަރުކާރުން ވެރިކަމަށް އައިސް ބެލިއިރު ރިސޯޓް ހަދަން ދޫކޮށް ނުހެދި ގިނަދުވަސްވެފައިވާ 63 ރަށެއް ފާހަގަވެފައިވާކަމަށެވެ. މީގެތެރެއިން ބައެއް ރަށްރަށަކީ ވަރަށް ޒަމާންވަންދެން ނަގާފައިހުރި އަދި އެއްވެސް ވަރަކަށް މަސައްކަތް ނުކޮށް ހުރި ރަށްތަކެއްކަމަށެވެ. އެއްވެސް މަސައްކަތެއް ނުކޮށް 22 ވަރަކަށް ރަށް އޮތްކަމަށް ވަޒީރު ވިދާޅުވިއެވެ. އެރަށްތަކާ މެދު ގޮތެއް ނިންމުމަށް މިހާރު ބަންޑާރަ ނައިބުގެ ލަފައަކަށް އެދިފައިވާނެކަމަށް ވަޒީރު ވިދާޅުވިއެވެ.

"އެރަށްރަށަށް ގޮތެއް ނިންމަން މިހާރު އަޅުގަނޑު ވާނީ އޭޖީގެ ލަފަޔަކަށް އެދިފައި. އެހެންވީމަ އޭޖީގެ ލަފާ އަޅުގަނޑުމެންނަށް ލިބުނީމަ އެ އޮންނަ އުސޫލުތަކުގެ ތެރެއިން އެރަށްތައް ވަކިކުރުމުގެ މަސައްކަތް އަޅުގަނޑުމެން ކުރިއަށްގެންދާނަން. އަޅުގަނޑުމެން ބޭނުން އެރަށްތައް އަލުން މާކެޓަށް ނެރެވޭނެ ގޮތެއް ހޯދަން. އެހެންވީމަ އެކަން ކުރަނީ. އެއީކީ އެއްވެސް މީހެއްގެ އަތުގައި ރަށެއް އޮވެގެނެއް ނޫން." ފައިޞަލް ވިދާޅުވިއެވެ.

ފަތުރުވެރިކަމާއި ބެހޭ ވަޒީރު ވިދާޅުވީ، މިގޮތަށް ނުހެދި ގިނަދުވަސް ވެފައި ހުރި ބައެއް ރަށްތައް ދޫކޮށްފައިވާ ފަރާތްތަކާއި މިހާރު މަޝްވަރާކުރައްވާފައިވާކަމަށެވެ. މިނިސްޓްރީން މަސައްކަތް ކުރަނީ އިތުރު އިންވެސްޓަރަކު އެތަނަށް އިންވެސްޓްކުރަން ބޭނުންވާނަމަ އެއްކޮށް މަސައްކަތްކުރެވޭނެ މާހައުލެއް ޤާއިމްކޮށްދިނުމަށް ކަމަށާއި، ނުވަތަ ހެޑް ލީޒް ފޮރިން އިންވެސްޓަރަކަށް ބަދަލުކުރަން ބޭނުންނަމަވެސް މިނިސްޓްރީން ދޭންޖެހޭ އެހީތެރިކަންވެސް ދޭނެކަމަށް ވަޒީރު ވިދާޅުވިއެވެ. ފައިޞަލް ވިދާޅުވީ، މިއަހަރުގެ ބާކީއޮތް ތަނުގައި 6 ނުވަތަ 8 ރިސޯޓް ހުޅުވޭނެކަމަށް ޤަބޫލުކުރެއްވޭކަމަށެވެ.

"6 ރިސޯޓް ނުވަތަ 8 ރިސޯޓް އަޅުގަނޑު ހަނދާންވަނީ މިއަހަރުގެ ތެރޭގައި އަޅުގަނޑުމެންނަށް އެބަ ހުޅުވޭ. މިއަންނަ އަހަރާއި އެކީގައި ވެއްޖިއްޔާ އަޅުގަނޑަށް ހީވަނީ އެއަދަދު 15 ވަރަކަށް ރަށަށް އަރައިގެންދާނެހެން. މީގެ ކޮންމެ ރިސޯޓެއް ހުޅުވިގެން ދިއުމަކީވެސް އިންޑަސްޓްރީއަށް ލިބޭ ވަރަށް ބޮޑު ކާމިޔާބެއް އަދި އެއިރުން ދައުލަތައްވެސް އާމްދަނީ އިތުރުވެގެންދާނެ ހުޅުވޭ ކޮންމެ ރިސޯޓަކާއިއެކުގައިވެސް. އަދި އެތައް ސަތޭކަ ވަޒީފާއެއް އުފެދިގެންދާނެ." ފައިޞަލް ވިދާޅުވިއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި މިވަގުތު 174 ރިސޯޓެއް ވަނީ ފަތުރުވެރިންނަށް ޚިދުމަތް ދިނުމަށް ހުޅުވާފައެވެ. މިއީ ޖުމްލަ 42965 އެނދެވެ.