ސްޓޮކް މަދުވި މަހުގެ އުފެއްދުންތައް ކުރިއަށްއޮތް 3 ހަފްތާތެރޭގައި ބާޒާރުން ލިބެން ފަށާނެ: މިފްކޯ

ސްޓޮކް މަދުވި މިފްކޯގެ މަހުގެ އުފެއްދުންތައް ކުރިއަށްއޮތް 3 ހަފްތާ ތެރޭގައި ދަތިކަމެއް ނެތި ބާޒާރުން ލިބެން ހުންނާނެކަމަށް އެ ކުންފުނިން ވިދާޅުވެއްޖެއެވެ. މަސްވެރިކަން ދަށްވެ މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން އުފައްދަމުންދާ ކަނޑުމަހުގެ ބައެއް އުފެއްދުންތައް ލިބުން މިދިޔަ ދުވަސްތަކުގައި ވަނީ ދަތިވެފައެވެ.

ޕީއެސްއެމް ނިއުސްއަށް މައުލޫމާތު ދެއްވަމުން މިފްކޯގެ ޕްރޮޑަކްޝަން ފެސިލިޓީސް މެނޭޖްމަންޓްގެ ޖެނެރަލް މެނޭޖަރ ހާމިދު ނަޒީމް އިބްރާހިމް ވިދާޅުވީ، މަސްވެރިކަން ދަށްވުމުގެ ސަބަބުން ސްޓޮކް މަދުވި އުފެއްދުންތައް ކުރިއަށްއޮތް 3 ހަފްތާ ތެރޭގައި ބާޒާރުން ދަތިކަމެއްނެތި ލިބެންހުންނާނެކަމަށެވެ. މީގެތެރޭގައި ވަޅޯމަހާއި، ރިހާކުރާއި، އަދި ގިތެޔޮމިރުސް މަސްދަޅު ހިމެނެއެވެ.

މި ތަކެތި ލިބުން ބާޒާރުގައި ދަތިވެގެންދިޔައީ މަސްވެރިކަން ދަށްވުމުގެ ސަބަބުންކަމަށް އޭނާ ފާހަގަކުރެއްވިއެވެ. ނަމަވެސް މިހާރު މުޅި ރާއްޖެއަށްވެސް މަސްވެރިކަން ރަނގަޅުވެ މިފްކޯއަށް ކިރުވާ މަހުގެ އަދަދު އިތުރުވެފައިވާތީ މި އުފެއްދުންތަކުގެ ޕްރޮޑަކްޝަން މަސައްކަތް ފަށައިގެން ކުރިއަށްދާކަން އޭނާ ފާހަގަކުރެއްވިއެވެ.

ޕްރޮޑަކްޝަން މަސައްކަތްތަކާއި ލޮޖިސްޓިކްގެ މަސައްކަތްތައް ނިމި ކުރިއަށްއޮތް 3 ހަފްތާގެ ތެރޭގައި އުފެއްދުންތައް ބާޒާރަށް ނެރެވޭނެކަމަށް ވިދާޅުވިއެވެ.

މި 3 ބާވަތް ބާޒާރުގައި ލިބުން ދަތިވިނަމަވެސް މިފްކޯގެ އެހެން އުފެއްދުންތައް އެއްވެސް ދަތިކަމެއް ނެތި މިހާރުވެސް ބާޒާރުން ލިބެން ހުންނާނެކަމަށް މިފްކޯއިން ވަނީ ބުނެފައެވެ. މިފްކޯއަށް ކިރާ މަހުގެ ވަކި އިންސައްތައެއް ކޮންމެ އުފެއްދުމަކަށްވެސް ޚާއްސަކުރެއެވެ. އެއީ ހުރިހާ ބާވަތެއްގެ އުފެއްދުންތައްވެސް ބާޒާރުން ލިބޭނެ އިންތިޒާމް ހަމަޖެއްސުމުގެ ގޮތުންނެވެ.

މި މަސް ފެށުނުއިރު އުތުރާއި މެދުތެރޭގެ އަތޮޅުތަކަށް ވަނީ މަސްވެރިކަން ރަނގަޅުވެފައެވެ. އަދި މިހާރު ދެކުނުގައިވެސް މަސްވެރިކަން ރަނގަޅުވެފައިވާކަމަށް މިފްކޯއިން ވަނީ ބުނެފައެވެ.