ކުރިއަށް އޮތް 4 އަހަރުތެރޭ ހުޅުމާލޭގައި 10 ވަރަކަށް ސްކޫލް ތަރައްޤީކުރެވޭނެ: ރައީސް

ކުރިއަށް އޮތް 4 އަހަރުތެރޭ ހުޅުމާލޭގައި 10 ވަރަކަށް ސްކޫލް ތަރައްޤީކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މާލެ ސިޓީ ކައުންސިލް ޖަލްސާގައި ބައިވެރިވެވަޑައިގަންނަވާ ވާހަކަފުޅުދައްކަވަމުންނެވެ.

މާލޭގެ ތޮއްޖެހުން ކުޑަކުރުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ހުޅުމާލޭ މުޅި ޕްލޭނަށް 22 ސްކޫލް ބޭނުންވާ ކަމަށެވެ. އަދި ކުރިއަށް އޮތް 4 އަހަރުތެރޭ 7 ނޫނީ 10 ސްކޫލް ހުޅުމާލޭގައި ތަރައްޤީކުރެވޭނެ ކަމަށެވެ.

"މިއީ ވަރަށް ބޮޑު މަސައްކަތެއް، ވަރަށް ބޮޑު ބަޖެޓެއް، 1500 އެއްހާ ކުދިންގެ އާބާދީއެއްގެ ޖާގައިގެ ސްކޫލަކަށް ކޮންމެ ސްކޫލެއް ވާން ޖެހޭނެ، 7 ނޫނީ 10 ސްކޫލަކީ ބޮޑުކަމެއް، އެކަމަށް ދޭން ބޭނުންވާ އިސްކަން ދޭނަން،" ރައީސް ވިދާޅުވިއެވެ.

ރައީސް ވިދާޅުވީ ހުޅުމާލޭގައި މިސްކޫލްތައް އިމާރަތްކުރެވިގެން ދިޔުމަކީވެސް ޓްރެފިކްގެ ބާރުބޮޑުވުންވެސް ކުޑަވާނެ ކަމެއް ކަމަށެވެ. އަދި މިސްކޫލްތައް ތަރައްޤީކުރުމުގައި ކަންތައްތައް ފަހިކޮށްދިނުމުގައި މާލެ ސިޓީ ކައުންސިލްގެ އެއްބާރުލުން ބޭނުންވާ ކަމަށެވެ.

ހުޅުމާލެ ދެވަނަ ފިިޔަވަހީގައި ގްރޭޑް 1 އިން ފެށިގެން ގްރޭޑް 10 އަކާއި ހަމައަށް ކިޔަވައި ދިނުމަށް ތަރައްޤީކޮށްފައިވަނީ އެންމެ ސްކޫލެކެވެ. އެއީ ޞަލާޙުއްދީން ސްކޫލެވެ. އެހެންނަމަވެސް ހުޅުމާލޭގެ ދެވަނަ ފިޔަވަހީގެ އާބާދީ އިތުރުވެ، އެސްކޫލުން ޖާގަ ލިބުންދަތިވުމުން ސްކޫލަށް ދާން ޖެހެނީ ހުޅުމާލެ ފުރަތަމަ ފިޔަވަހި ނުވަތަ މާލެއަށެވެ.