އިންޝުއަރެންސް ޤާނޫނެއް ނެތުމަކީ ޤައުމަށް ލިބޭ އުނިކަމެއް: މެންބަރުން

މިހާތަނަށް ރާއްޖޭގައި އިންޝުއަރެންސާ ގުޅޭ ޤާނޫނެއް ނެތުމަކީ ޤައުމަށް ލިބޭ އުނިކަމެއްކަމަށް ރައްޔިތުންގެ މަޖިލީހުން މެންބަރުން ވިދާޅުވެއްޖެއެވެ. މެންބަރުން މިހެން ވިދާޅުވި ސަރުކާރުގެ ފަރާތުން މަޖިލީހަށް ހުށަޅުއްވާފައިވާ، އިންޝުއަރެންސް ބިލުގެ އިބްތިދާޢީ ބަހުސްގެ ތެރެއިންނެވެ. ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ މަހިބަދޫ ދާއިރާގެ މެންބަރު އަޙްމަދު ޠާރިގެވެ.

މަޖިލީހަށް ބިލު ހުށަހަޅުއްވަމުން މަހިބަދޫ ދާއިރާގެ މެންބަރު އަޙްމަދު ޠާރިގު ވިދާޅުވީ މިހާތަނަށް ރާއްޖޭގައި 5 ކުންފުންޏަށް އިންޝުއަރެންސްގެ ހުއްދަ ދީފައިވާއިރު 10 ބްރޯކަރުންނާއި 60 އެޖެންޓުންނަށް ހުއްދަ ދީފައިވާ ކަމަށެވެ. މިއީ ނިސްބަތުން ކުޑަ އަދަދަކަށް ވީނަމަވެސް ޤާނޫނުތަކުން އިންޝުއަރެންސް ކުރުމަށް މަޖުބޫރުކުރާއިރު އެކުންފުނިތަކާއި ބްރޯކަރުން އަދި އެޖެންޓުން ރެގިއުލޭޓް ކުރަންޖެހޭކަމަށް ޠާރިގު ވިދާޅުވިއެވެ.

"ރާއްޖޭގައި މި ވަރަށް އާރލީ ސްޓޭޖެއްގައި އިންޝުއަރެންސްގެ ޚިދުމަތްތައް މިއޮތީ. އެމްއެމްއޭގައި އޮތް ގަވާއިދެއްގެ ދަށުން އަޅުގަނޑުމެންގެ އިންޝުއަރެންސް ކުންފުނިތައް ޚިދުމަތް ދެމުން ދަނީ." ޠާރިގު ވިދާޅުވިއެވެ.

ބިލަށް ބަހުސް ކުރައްވަމުން މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ވިދާޅުވީ ދުނިޔޭގައި އިންޝުއަރެންސް ނިޒާމަކީ ޒަމާންތަކެއްވެފައިވާ ނިޒާމަކަށްވާއިރު ރާއްޖޭގައިވެސް އިންޝުއަރެންސްގެ ވާދަވެރި މާކެޓެއް އުފެދިފައިވާ ކަމަށެވެ. ނަމަވެސް ސީދާ ޤާނޫނެއް ނެތުމުން ބައެއް ފަރާތްތަކަށް ލިބެން ޖެހޭ ޙައްގުތައް ނުލިބޭކަމަށް މެންބަރު ވިދާޅުވިއެވެ.

ރިފާޢު ވިދާޅުވީ އަދިވެސް ގިނަ ރައްޔިތުން އިންޝުއަރެންސް ގަބޫލުކުރަނީ ޚަރަދެއްގެ ގޮތުގައި ކަމަށާއި، އެހެންކަމުން އިންޝުއަރެންސްގެ މުހިންމުކަން ރައްޔިތުންނަށް ކިޔައިދޭން ޖެހޭ ކަމަށެވެ. އަދި ކޮމިޓީ މަރުހަލާހައި ބިލަށް ގެންނަންޖެހޭ ބަދަލުތައްވެސް ރިފާޢު ހިއްސާ ކުރެއްވިއެވެ.

"މިއީ މިއަދަށް މާ ބޮޑަށްވެސް ލަސްވެފައިވާ ބިލެއް. މީގެ ހުރި ކަންބޮޑުވުންތަކަށް ކޮމިޓީ ލެވެލްގައި ކަމާބެހޭ ހުރިހާ މުއައްސަސަތާތައްގެނެސް، މިއަދު ރާއްޖޭގައި ތަމްސީލް ކުރާ ހުރިހާ އިންޝުއަރެންސް ކުންފުނިތަކެއްގައި ހުރި ކަންބޮޑުވުންތަކަށް ރިއާޔަތްކޮށް، މި ވިޔަފާރި ކުރުމުގައި ހުރި ގޮންޖެހުންތަކަށް ހައްލު ހޯދޭނެ ގޮތަށް މި ބިލް ފުރިހަމަވެގެންދާނެކަމަށް އުއްމީދުކުރަން،" ރިފާޢު ވިދާޅުވިއެވެ.

ހޯރަފުށި ދާއިރާގެ މެންބަރު ޢަލީ މޫސާ ވިދާޅުވީ ތަރައްގީވެފައިވާ ޤައުމުތަކުގެ އުފެއްދުންތެރިކަމުގައި އިންޝުއަރެންސްގެ ފައިދާ ހިއްސާ ކުރާ ކަމަށެވެ. އަދި އިންޝުއަރެންސް ދާއިރާއަކީ ކުރިއެރުވޭނެ ދާއިރާއެއް ކަމަށާއި، އެކި ދާއިރާތަކާ ގުޅޭގޮތުން އިންޝުއަރެންސާބެހޭ ބިލް ބައްޓަންކުރުން މުހިންމު ކަމަށް ޢަލީ މޫސާ ވިދާޅުވިއެވެ.

މެންބަރު ވިދާޅުވީ ތަރޑް ޕާޓީ މޮޓޯ އިންޝުއަރެންސް ދިވެހި ބަހުން އޮންނަގޮތަށް ޤާނޫނުގައި ހިމަނަން ޖެހޭ ކަމަށާއި ރާއްޖޭގައި ހިންގަމުން އަންނަ ރިސޯޓުތައް ރާއްޖޭގެ ކުންފުނިތަކުގައި އިންޝުއަރެންސް ކުރާގޮތް ހަދަންޖެހޭ ކަމަށެވެ.

"ރާއްޖޭގެ ރިސޯޓް ސެކްޓާއަކީ ވަރަށް ބޮޑު އިންޑަސްޓްރީއަކަށްވެ، ވަރަށް ބޮޑަށް ވެލިއު ހައި އިންޑަސްޓްރީއަކަށްވެފައި އެކަމަކު އިންޑަސްޓްރީގެ ބޮޑުބައެއް ޤައުމުން ބޭރުގައި އިންޝުއަރކުރާ ކަމީ ޤައުމަށް ލިބިގެންދާ ގެއްލުމެއް ކަމުގައި އަޅުގަނޑު ދެކެން." ޢަލީ މޫސާ ވިދާޅުވިއެވެ.

އިންޝުއަރެންސާ ބެހޭ ބިލުގައިވާ ގޮތުން އެ ބިލު ޤާނޫނަކަށްވުމުން ރާއްޖޭގެ އިންޝުއަރެންސްގެ ދާއިރާގެ ފެންވަރު ހިފެހެއްޓުމަށް އެފަދަ ވިޔަފާރިތަކުގެ ހަރުދަނާ އަދި ރައްކާތެރި އުސޫލުތައް އެކަށައަޅައި، އެ އުސޫލުތަކާ އެއްގޮތަށް ވިޔަފާރިތައް ހިންގާތޯ ބަލާނެއެވެ. މީގެ ސަބަބުން އިންޝުއަރެންސް ޕޮލިސީ ނަގާ ފަރާތްތަކުގެ ޙައްގުތައް ރައްކާތެރިކުރެވި، ދާއިރާ ތަރައްގީކޮށް ވާދަވެރިކަން ފުޅާކުރުވޭނެ ކަމަށްވެސް ބިލުގައި ވަނީ ބަޔާންކޮށްފައިވެއެވެ.

ރާއްޖޭގެ އިންޝުއަރެންސް ދާއިރާއަކީ އާންމުންގެ ބޭނުންތަކާ އެއްގޮތަށް އިންޝުއަރެންސްގެ ޚިދުމަތްތައް ފޯރުކޮށްދޭ އަދި ރާއްޖޭގެ އިޤްތިޞާދީ ކުރިއެރުމަށް މަގުފަހިކޮށްދޭ ދާއިރާއެއްކަމުގައި ހެދުމަކީ މި ޤާނޫނުގެ މަޤްޞަދެއްކަމަށް ބިލުގައިވަނީ ބަޔާންކޮށްފައެވެ.