މަސްވެރިކަން ރަނގަޅުވެ ފާއިތުވި ދެދުވަހު 47 ޓަނުގެ މަސް ކިރުވައިފި
-
މަސްވެރިކަން ރަނގަޅީ މ. އަތޮޅު ހިމެނޭ ސަރަހައްދަށް
-
އެ ސަރަހައްދުގައި މަސް ކިރަން 2 ބޯޓެއް އެބައޮތް
ފާއިތުވި 2 ދުވަހު 47 ޓަނުގެ މަސް ކިރުވާފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް، މިފްކޯއިން ވިދާޅުވެއްޖެއެވެ. މުޅި ރާއްޖެއަށް މަސްވެރިކަން ދަށްވުމަށްފަހު ބައެއް ސަރަޙައްދުތަކަށް މަސްވެރިކަން މިހާރު އަންނަނީ ރަނގަޅުވަމުންނެވެ.
ފާއިތުވި 2 ދުވަހު އުތުރާއި މެދުތެރޭގެ އަތޮޅުތަކަށް ވަނީ މަސްވެރިކަން ރަނގަޅު ވެފައެވެ. އެހެންކަމުން އެ ސަރަހައްދުތަކުން ކިރާ މަހުގެ ޢަދަދުވެސް އިތުރުވެފައިވާކަމަށް މިފްކޯއިން ވިދާޅުވެއެވެ.
މިފްކޯއިން ވިދާޅުވީ، މިމަހުގެ 4 ވަނަ ދުވަހު 27 ޓަނުގެ މަސް ކިރާފައިވާކަމަށެވެ. އަދި ހޯމަ ދުވަހު އެކަނިވެސް 20 ޓަނުގެ މަސް ކިރާފައިވާކަމަށް މިފްކޯއިން ވިދާޅުވެއެވެ. މިއީ މ. އަތޮޅު ހިމެނޭ ސަރަހައްދުން ކިރާފައިވާ މަހުގެ ޢަދަދެވެ. މަސްވެރިކަން މިހާރު އެންމެ ރަނގަޅީ މ. އަތޮޅު ހިމެނޭ ސަރަހައްދުގައިކަމަށް މިފްކޯއިން ވަނީ ވިދާޅުވެފައެވެ.
މ. އަތޮޅު ހިމެނޭ ސަރަހައްދުގެ މަސްވެރިކަން ރަނގަޅު ވުމުގެ ސަބަބުން މިފްކޯގެ 2 ބޯޓެއް އެ ސަރަހައްދުގައި މިހާރު ދަނީ ހަރަކާތްތެރިވަމުންނެވެ. އެއީ މަހާކަލަމިންޖާއާއި، "ރަންދި 23" އެވެ. މަހާކަލަމިންޖާއަކީ ދުވާލަކު 60 ޓަނާއި 80 ޓަނުގެ މަސް ފިނިކުރުމުގެ ޤާބިލްކަން ހުރި އުޅަނދެކެވެ. އަދި "ރަނދި 23" އަކީ 27.5 ޓަނުގެ މަސް ރައްކާކުރުމުގެ ޤާބިލްކަން ހުރި އުޅަނދެކެވެ.
މިފްކޯއިން ވިދާޅުވީ، މިއަދުވެސް މަސްވެރިކަން ރަނގަޅުކަމަށެވެ. އަދި މިފްކޯގެ މަސް ކިރާ ބޯޓުތަކުން މައުލޫމާތުދޭ ގޮތުގައި މިއަދުވެސް ގިނަ އަދަދަކަށް މަސް ކިރާނެކަމަށް ލަފާކުރެވޭކަމަށް ވަނީ ވިދާޅުވެފައެވެ.